ఒత్తిడిని ఎదుర్కొనడంలో
ఒత్తిడిని ఎదుర్కొనడంలో దినేశ్ కార్తీక్ దిట్ట అని ఛీఫ్ సెలక్టర్ ఎమ్మెస్కే ప్రసాద్ వెల్లడించారు. వరల్డ్ కప్లో భారత వికెట్ కీపర్గా ధోనినే వికెట్ కీపింగ్ చేస్తాడని... ఒకవేళ ధోని గాయం కారణంగా మ్యాచ్లకు దూరమైతే అప్పుడు వికెట్ కీపింగ్ బాధ్యతలను దినేశ్ కార్తీక్ నిర్వర్తిస్తాడని తెలిపాడు. వరల్డ్కప్ జట్టులో చోటు దక్కడంపై దినేశ్ కార్తీక్ స్పందించాడు.
ధోని జట్టులో ఉన్నంత వరకూ
"చూడండి, ధోని జట్టులో ఉన్నంత వరకూ.... చిన్న ఫస్ట్ ఎయిడ్ కిట్ మాదిరి జట్టుతో కలిసి ప్రయాణం చేస్తూ ఉండటమే నా పని. ధోనికి గాయమైతే ఆ రోజుకు నేను బ్యాండ్ ఎయిడ్గా పనికొస్తాను" అని దినేశ్ కార్తీక్ సంచనల వ్యాఖ్యలు చేశాడు. అయితే, తాను ఫినిషర్గా No. 4 స్థానంలో బ్యాటింగ్ చేసేందుకు కూడా అర్హుడినేనని, ఆ అర్హతతోనైనా తనకు మరిన్ని అవకాశాలు దక్కుతాయని దినేశ్ కార్తీక్ వెల్లడించాడు. ఐపీఎల్ తర్వాత... ప్రతిరోజూ మంచి ప్రదర్శన చేసేందుకు తాను సిద్ధంగా ఉన్నానని... అంతకముందు కూడా బ్యాట్స్మెన్గా రాణించాను" అని దినేశ్ కార్తీక్ తెలిపాడు.
|
కల సాకారమైంది
వరల్డ్కప్ లాంటి మెగా టోర్నీలో చోటు దక్కించుకోవడంతో తన కల సాకారమైందని దినేశ్ కార్తీక్ అన్నాడు. "వరల్డ్కప్కు ఎంపిక అవడం చాలా సంతోషంగా ఉంది. సుదీర్ఘకాలం తర్వాత ఈ జట్టులో భాగస్వామిని అయినందుకు నా కల సాకారమైంది" అని దినేశ్ కార్తీక్ చెప్పాడు. ఇందుకు సంబంధించిన వీడియోని కోల్కతా నైట్రైడర్స్ జట్టు తన అధికారిక ట్విట్టర్లో అభిమానులతో పంచుకుంది.
దినేశ్ కార్తీక్కు ఇది రెండో వరల్డ్కప్
33 ఏళ్ల దినేశ్ కార్తీక్కు ఇది రెండో వరల్డ్కప్ కావడం విశేషం. 2007లో దినేశ్ కార్తీక్ తన మొట్టమొదటి వరల్డ్కప్ను ఆడాడు. ఆ తర్వాత మళ్లీ 12 ఏళ్లకు వరల్డ్కప్ జట్టులో చోటు దక్కించుకున్నాడు. మే30 నుంచి ఆరంభమయ్యే వరల్డ్కప్కు ఇంగ్లాండ్, వేల్స్ క్రికెట్ బోర్డు సంయుక్తంగా ఆతిథ్యమిస్తోంది. జులై 14న లార్డ్స్ వేదికగా వరల్డ్ కప్ ఫైనల్ మ్యాచ్ జరగనుంది. ఈ మెగా టోర్నీలో జూన్ 5న దక్షిణాఫ్రికాతో కోహ్లీసేన తొలి మ్యాచ్ ఆడనుంది.