10000 పరుగుల క్లబ్‌లోకి కోహ్లీ!: మిగిలిన ఆ నలుగురు ఎవరు?

1. సచిన్ టెండూల్కర్ - 18426

కెరీర్ తొలినాళ్లలో మిడిల్ ఆర్డర్‌లో బ్యాటింగ్‌కు వచ్చిన ఈ క్రికెట్ లెజెండ్ 90ల్లో న్యూజిలాండ్‌తో జరిగిన ఓ మ్యాచ్‌లో ఓపెనర్‌గా ప్రమోటయ్యాడు. ఇందుకు కారణం రెగ్యులర్ ఓపెనర్ నవజ్యోత్ సింగ్ సిద్ధూ మెడనొప్పి కారణంగా ఈ మ్యాచ్‌కు దూరమైన కారణంగా. ఈ అవకాశాన్ని సద్వినియోగం చేసుకున్న సచిన్ టెండూల్కర్ ఆ తర్వాత వెనక్కి తిరిగి చూడలేదు. ఓపెనర్‌గా అంతర్జాతీయ క్రికెట్‌లో పరుగుల వరద పారించడంతో పాటు అనేక రికార్డులను తన ఖాతాలో వేసుకున్నాడు. అంతేకాదు వన్డేల్లో పది వేల పరుగులు చేసిన తొలి క్రికెటర్‌గా చరిత్ర సృష్టించాడు.

2. సౌరవ్ గంగూలీ - 11363

టీమిండియా మాజీ కెప్టెన్ అయిన సౌరవ్ గంగూలీ 1990 మధ్య కాలం నుంచి 2000 మొదటి వరకు వన్డేల్లో భారత జట్టుకు అద్భుతమైన ఓపెనింగ్ భాగస్వామ్యాలను నెలకొల్పాడు. సచిన్ టెండూల్కర్‌తో కలిసి సౌరవ్ గంగూలీ నెలకొల్పిన రికార్డులు అనేకం. వీరిద్దరి ఓపెనింగ్ జోడీని విడగొట్టేందుకు దిగ్గజ పేసర్లు సైతం చెమటొడ్చారు. అంతర్జాతీయ క్రికెట్‌లో వీరిద్దరి జోడీ అత్యుత్తమ ఓపెనింగ్ జోడీగా పేరు తెచ్చుకుంది. వీరిద్దరూ కలిసి 136 ఇన్నింగ్స్‌ల్లో 6609 పరుగులు చేశారు.

3. రాహుల్ ద్రవిడ్ - 10889

కెరీర్ తొలి నాళ్లలో వన్డేల్లో నిలదొక్కుకునేందుకు రాహుల్ ద్రవిడ్‌కు చాలా సమయం పట్టింది. అయితే, ఆ తర్వాత వీటన్నింటిని అధిగమించి తన అద్భుతమైన ఆటతీరుతో రాహుల్ ద్రవిడ్ వన్డేల్లో పదివేల పరుగుల మైలురాయిని అందుకున్నాడు. టెస్టు బ్యాట్స్‌మన్‌గా పేరుగాంచిన రాహుల్ ద్రవిడ్ వన్డేల్లో అత్యంత వేగంగా హాఫ్ సెంచరీ సాధించిన క్రికెటర్ల జాబితాలో కపిల్ దేవ్, యువరాజ్‌లతో సంయుక్తంగా ఉన్నాడు. 2003లో న్యూజిలాండ్‌తో జరిగిన మ్యాచ్‌లో రాహుల్ ద్రవిడ్ 22 బంతుల్లో హాఫ్ సెంచరీని సాధించాడు.

4. మహేంద్ర సింగ్ ధోని - 10079

భారత్ తరుపున పదివేల పరుగుల మైలురాయిని అందుకున్న నాలుగో క్రికెటర్‌గా ధోని ఇటీవలే ఈ జాబితాలో చేరాడు. 5, 6, 7 స్థానాల్లో బ్యాటింగ్‌కు వచ్చే ధోని పది వేల పరుగుల మైలురాయిని అందుకోవడం ఆశ్చర్యమే. అంతేకాదు ధోని యావరేజి సైతం 50.90 క్రికెట్ విశ్లేషకులను ఆశ్చర్యానికి గురి చేస్తుంది. ప్రపంచంలో అత్యుత్తమ ఫినిషర్‌గా పేరు తెచ్చుకున్న ధోని... వికెట్ కీపర్‌గా కూడా అనేక రికార్డులను తన ఖాతాలో వేసుకున్నాడు.