పాక్ 312 రన్స్‌తో గెలిస్తేనే! అసలు వన్డేలో ఓ జట్టు గెలిచిన అత్యధిక పరుగుల మార్జిన్ ఎంతో తెలుసా?

2008లో ఐర్లాండ్‌తో జరిగిన వన్డేలో

2008లో ఐర్లాండ్‌తో జరిగిన ఓ వన్డేలో న్యూజిలాండ్ 290 పరుగుల తేడాతో విజయం సాధించింది. ఇదే ఇప్పటివరకు వన్డేల్లో అత్యధిక మార్జిన్ కావడం విశేషం. శుక్రవారం లార్డ్స్ వేదికగా బంగ్లాదేశ్‌తో జరుగుతున్న మ్యాచ్‌లో పాకిస్థాన్ ఈ రికార్డుని బద్దలు కొడితేనే సెమీస్ ఆశలను సజీవంగా ఉంచుకుంటుంది.

టాస్ గెలిచి బ్యాటింగ్ ఎంచుకున్న పాక్

ఇదిలా ఉంటే, ఈ మ్యాచ్‌లో టాస్ గెలిచిన పాకిస్థాన్ కెప్టెన్ సర్ఫరాజ్‌ అహ్మద్ బ్యాటింగ్ ఎంచుకున్నాడు. పాక్ ఎలాంటి మార్పులు చేయలేదు. మరోవైపు బంగ్లా రెండు మార్పులు చేసింది. మహ్మదుల్లా జట్టులోకి వచ్చాడు. ' టాస్ గెలవడం చాలా ముఖ్యం. మాకు వేరే ఆప్షన్ లేదు. ఇక భారీ స్కోర్ చేయాలి' అని సర్ఫరాజ్‌ అన్నాడు.

అనూహ్య విజయం సాధించాలి

ఈ మ్యాచ్ పాక్ జట్టుకు చాలా కీలకం. కుడిచేతి బ్యాట్స్‌మన్‌కు లెగ్ సైడ్, పాయింట్ దిశగా మైదానం చిన్నదిగా ఉండడంతో బౌండరీల మోత మోగే అవకాశం ఉంది. సాంకేతికంగా సెమీ ఫైనల్‌ రేసులో నిలిచిన పాకిస్థాన్‌.. దాన్ని నిజం చేయాలంటే ఈ మ్యాచ్‌లో అనూహ్య విజయం సాధించాలి. విజయం అంటే మామూలు విజయం కాదు.. క్రికెట్ చరిత్రలోనే నిలిచిపోయేలా ఉండాలి.

312 పరుగుల తేడాతో గెలిస్తేనే!

పాకిస్థాన్ మొదటగా బ్యాటింగ్ చేసి 312 పరుగుల తేడాతో విజయం సాధిస్తే సెమీ ఫైనల్‌ రేసులో ఉంటుంది. లేదంటే సెమీస్ రేసు నుంచి తప్పుకుంటుంది. మరోవైపు బంగ్లాదేశ్ ఇప్పటికే టోర్నీ నుండి నిష్క్రమించింది. ప్రపంచకప్‌లో పాకిస్థాన్‌ ఇప్పటివరకు ఎనిమిది మ్యాచ్‌లు ఆడి.. నాలుగు గెలిచి, మూడు ఓడిపోయింది.

పాక్‌ సెమీస్‌ చేరే అవకాశం చాలా తక్కువ

మరొక మ్యాచ్‌ రద్దు అయింది. దీంతో 9 పాయింట్లతో పాయింట్ల పట్టికలో ఐదో స్థానంలో కొనసాగుతోంది. ఒకవేళ బంగ్లాపై గెలిచినా.. 11 పాయింట్లతో న్యూజిలాండ్‌తో సమానంగా ఉంటుంది. అయితే నెట్‌ రన్‌రేట్‌ ఇప్పటికే కివీస్‌కు +0.175 ఉండడం, పాకిస్థాన్‌కు -0.792గా ఉండడంతో పాక్‌ సెమీస్‌ చేరే అవకాశం చాలా తక్కువ.