విజయానికి షార్ట్‌కట్స్‌ లేవు.. ఎప్పుడూ మోసం చేయొద్దు: సచిన్

విజయానికి దగ్గరి దారులు లేవు:

సచిన్‌ తన క్రికెట్‌ అకాడమీని ప్రారంభించిన తర్వాత మాట్లాడుతూ కుర్రాళ్లలో స్ఫూర్తి నింపే ప్రయత్నం చేశారు. 'జీవితంలో ఎన్నో నేర్చుకున్నా. అంచనాలను అందుకోనప్పుడు క్రమశిక్షణ, ఏకాగ్రత, ప్రణాళిక, అమలుపై ఆలోచించా. నేనూ విఫలమయ్యాను. కానీ.. క్రీడలు, నాకు దొరికిన సరైన జట్టుతో తేరుకున్నా. ఈ క్రమంలో ఎలాంటి దగ్గరి దారులు లేవని అర్థమైంది. కష్టాలు ఎన్ని ఎదురైనా మోసం చేయొద్దు. ఎన్ని సవాళ్లు ఎదురైనా మోసం చేసైనా ముందుకు వెళ్లే ప్రయత్నం అస్సలు చేయొద్దు. అలా చేస్తే అందరి ముందు తల దించుకొని నిలబడాల్సి వస్తుంది' అని సచిన్‌ అన్నారు.

అజిత్‌ సలహాలు అమూల్యమైనవి:

'క్రికెట్‌ గురించి నా సోదరుడు అజిత్‌తో నేను ఎప్పుడూ చర్చించేవాడిని. కెరీర్‌ ఆరంభమైన తొలి రోజు నుంచి వీడ్కోలు పలికే రోజు వరకు అజిత్‌తో మాట్లాడేవాడిని. అతడి సలహాలు ఎంతో అమూల్యమైనవి. నేను చివరి టెస్టులో అవుటైన తర్వాత కూడా దాని గురించి అన్నయ్యతో చర్చించా. మళ్లీ బ్యాటింగ్‌ చేయనని తెలిసి కూడా ఆ షాట్‌ను ఎలా ఆడాల్సిందని ఆయనతో విశ్లేచించుకున్నా. ఇదంతా నేర్చుకోవడమే. ఎప్పుడూ నేర్చుకోవడంను మాత్రం ఆపొద్దు' అని సచిన్ సూచించారు.

పిల్లలపై ఒత్తిడి చేయకండి:

'నన్ను ఇంతటివాడిని చేసిన రెండో వ్యక్తి రమాకాంత్‌ అచ్రేకర్‌ సర్‌. ఆయన్ను ఇప్పుడు నేను మిస్‌ అవుతున్నా. నేనిప్పుడు ఇలా ఉండేందుకు కారణం ఆయనే. నా బాల్యం ఎప్పుడూ గుర్తుంటుంది. మనమంతా సరదాకైనా ఏదో ఒక క్రీడ ఆడాలి. భారత్‌ను క్రీడలను ప్రేమించే దేశంగా మార్చాలి. ఆరోగ్యానికీ, మంచి జీవన శైలికీ ఇది చాలా ముఖ్యం. తల్లిదండ్రులకు సూచించేది ఒక్కటే. క్రీడలైనా, చదువైనా పిల్లలపై ఒత్తిడి చేయకండి' అని సచిన్‌ చెప్పుకొచ్చారు.