స్వదేశంలో దక్షిణాఫ్రికాతో టెస్టు సిరిస్: రోహిత్ శర్మ కొత్త ఇన్నింగ్స్!

విండిస్ పర్యటనకు ఎంపికైనప్పటికీ

వెస్టిండిస్ పర్యటనలో భాగంగా టెస్టుల్లో రోహిత్ శర్మ ఎంపికైనప్పటికీ తుది జట్టులో మాత్రం చోటు దక్కలేదు. అయితే, ఈ పర్యటనలో ఓపెనర్‌గా కేఎల్ రాహుల్ పేలవ ప్రదర్శన చేయడంతో ఇప్పుడు తెరపైకి రోహిత్ శర్మ పేరు మరోసారి వచ్చింది. 2014లో అరంగేట్రం చేసిన కేఎల్‌ రాహుల్‌ మాత్రం ఇప్పటికే 36 టెస్టులు ఆడాడు.

రోహిత్ శర్మతో పోలిస్తే కేఎల్ రాహుల్ ప్రదర్శన ఇలా

అయితే, రోహిత్ శర్మతో పోలిస్తే కేఎల్ రాహుల్ ప్రదర్శన ఏమంత గొప్పగా లేదు. ఓపెనింగ్‌ బ్యాట్స్‌మన్‌‌గా కేఎల్ రాహుల్ 36 మ్యాచ్‌ల్లో 34.58 యావరేజితో 2006 పరుగులు చేశాడు. టెస్టుల్లో మిడిలార్డర్‌ బ్యాట్స్‌మన్‌‌గా బరిలోకి దిగిన రోహిత్‌ శర్మ 27 టెస్టుల్లో 39.62 యావరేజితో 1585 పరుగులు సాధించడం విశేషం.

సుదీర్ఘ ఫార్మాట్‌లో రోహిత్ శర్మకు

ఈ నేపథ్యంలో సుదీర్ఘ ఫార్మాట్‌లో రోహిత్ శర్మకు ఓపెనర్‌గా అవకాశమివ్వాలని మాజీ కెప్టెన్ సౌరవ్ గంగూలీ డిమాండ్ చేశాడు. ఈ నేపథ్యంలో జట్టు మేనేజ్‌మెంట్ సైతం త్వరలో సొంతగడ్డపై దక్షిణాఫ్రికాతో జరగనున్న మూడు టెస్టు మ్యాచ్‌ల సిరిస్‌లో రోహిత్ శర్మకు అవకాశం ఇవ్వాలనే ఆలోచనలో ఉన్నట్లు తెలుస్తోంది.

ఎమ్మెస్కే ప్రసాద్ సైతం

టీమిండియా చీఫ్‌ సెలక్టర్‌ ఎమ్మెస్కే ప్రసాద్ మాట్లాడుతూ "విండిస్ సిరీస్‌ తర్వాత సెలక్షన్‌ కమిటీ సమావేశం కాలేదు. ఈసారి మేం కలిసినపుడు రోహిత్‌ను టెస్టుల్లో ఓపెనర్‌గా పంపే అంశంపై చర్చిస్తాం" అని పేర్కొన్నాడు. అదే గనుక జరిగితే మరోసారి రోహిత్ శర్మను టెస్టుల్లో ఓపెనర్‌గా చూడొచ్చు.