ఆ ఫార్మూలాతోనే టీమిండియాను ఓడించాం: కేన్ మామ

లాథమ్ లాగేసాడు..

'మ్యాచ్ సగానికి వచ్చే వరకు భారత్ విధించిన లక్ష్యం పోరాడదగినదే అనిపించింది. ఆరంభంలో వికెట్ కాస్త టర్న్ అవ్వడంతో బ్యాటింగ్‌కు ఇబ్బంది అయ్యింది. ముఖ్యంగా క్రాస్ సీమర్స్‌కు అడ్వాంటేజ్ లభించింది. కానీ ఈ మైదానంలో మంచి భాగస్వామ్యం నెలకొల్పితే ఎంతటి లక్ష్యాన్నైనా చేధించవచ్చనే విషయం తెలుసు. టామ్ లాథమ్ అద్భుతమైన ఇన్నింగ్స్ ఆడాడు. దూకుడైన బ్యాటింగ్‌తో చెలరేగాడు. ముఖ్యంగా మిడిల్ ఓవర్లలో మేం ఇద్దరం ఏ ఓవర్‌లో కొట్టాలని చర్చించుకున్నాం. స్విచ్ షాట్లతో లాథమ్ బౌలర్లను ఒత్తిడిలోకి నెట్టాడు. ఈ వికెట్‌పై స్ట్రైట్‌గా బౌలింగ్ చేస్తే బ్యాటింగ్ చేయడం కష్టం.

ఆ బిగ్ ఓవర్..

కానీ లాథమ్ స్విచ్ హిట్‌లతో బౌండరీలకు తరలించాడు. ఓవర్‌కు ఒకటి రెండు స్విచ్ హిట్‌లు ఆడాడు. ముఖ్యంగా శార్దూల్ వేసిన 40వ ఓవర్‌లో 5 బౌండరీలతో మ్యాచ్‌ను మా వైపు తిప్పాడు. అదే జోరును మ్యాచ్ అసాంతం కొనసాగించాడు. నేను చూసి అతి గొప్ప వన్డే ఇన్నింగ్స్‌ల్లో ఇది ఒకటి. ఇది మంచి వికెట్. ముఖ్యంగా స్పిన్ కీలక పాత్ర పోషించింది. ఈ మ్యాచ్‌లో గెలవడం సంతోషంగా ఉంది. మా పేసర్లు అద్భుత ప్రదర్శన కనబర్చారు. నాన్ స్ట్రైకర్‌గా టామీ ఇన్నింగ్స్ చూడటం అద్భుతంగా ఉంది.'అని కేన్ మామ చెప్పుకొచ్చాడు.

అయ్యర్, సుందర్ అదరగొట్టినా..

ఈ మ్యాచ్‌లో ముందుగా బ్యాటింగ్ చేసిన భారత్ నిర్ణీత 50 ఓవర్లలో 7 వికెట్లకు 306 పరుగుల భారీ స్కోర్ చేసింది. శ్రేయస్ అయ్యర్(76 బంతుల్లో 4 ఫోర్లు, 4 సిక్స్‌లతో 80), శిఖర్ ధావన్(77 బంతుల్లో 13 ఫోర్లతో 72), శుభ్‌మన్ గిల్(65 బంతుల్లో ఫోర్, 3 సిక్స్‌లతో 50) హాఫ్ సెంచరీలతో రాణించగా... చివర్లో వాషింగ్టన్ సుందర్(16 బంతుల్లో 3 ఫోర్లు, 3 సిక్స్‌లతో 37 నాటౌట్) మెరుపులు మెరిపించాడు. న్యూజిలాండ్ బౌలర్లలో టీమ్ సౌథీ, లూకీ ఫెర్గూసన్ మూడేసి వికెట్లు తీయగా.. ఆడమ్ మిల్నే ఓ వికెట్ పడగొట్టాడు.

చెలరేగిన లాథమ్, కేన్...

అనంతరం లక్ష్యచేధనకు దిగిన న్యూజిలాండ్ 47.1 ఓవర్లలో 3 వికెట్లకు 309 పరుగులు చేసింది. టామ్ లాథమ్(104 బంతుల్లో 19 ఫోర్లు, 5 సిక్స్‌ర్లతో 145 నాటౌట్) అజేయ శతకంతో చెలరేగగా.. కేన్ విలియమ్సన్(98 బంతుల్లో 7 ఫోర్లు, సిక్స్‌తో 94 నాటౌట్) కీలక ఇన్నింగ్స్ ఆడాడు. భారత బౌలర్లలో ఉమ్రాన్ మాలిక్ రెండు వికెట్లు తీయగా.. శార్దూల్ ఠాకూర్ ఓ వికెట్ పడగొట్టాడు. మిగతా బౌలర్లు దారుణంగా విఫలమయ్యారు. భారత బౌలర్ల వైఫల్యంతో గబ్బర్ సేన భారీ స్కోర్‌ను కాపాడుకోలేకపోయింది.