పుణె వన్డేలో సెంచరీ: హ్యాట్రిక్ సెంచరీలతో చరిత్ర సృష్టించిన కోహ్లీ

By Nageshwara Rao M

Published: Saturday, October 27, 2018, 21:37 [IST]

హైదరాబాద్: టీమిండియా కెప్టెన్ విరాట్ కోహ్లీ పరుగుల వరద పారిస్తున్నాడు. వెస్టిండీస్‌తో పుణె వేదికగా జరుగుతున్న మూడో వన్డేలోనూ రన్ మెషీన్ విరాట్ కోహ్లీ సెంచరీతో చెలరేగాడు. ఈ సిరిస్‌లో కోహ్లీకి ఇది మూడో సెంచరీ. ఫలితంగా అంతర్జాతీయ క్రికెట్‌లో హ్యాట్రిక్ సెంచరీలు నమోదు చేసిన భారత క్రికెటర్‌గా చరిత్ర సృష్టించాడు.

అంతేకాదు ఒకే ప్రత్యర్థిపై వరసగా నాలుగు సెంచరీలు చేసిన ఏకైక బ్యాట్స్‌మన్‌గా ప్రపంచ రికార్డు నెలకొల్పాడు. గువహటి వేదికగా జరిగిన తొలి వన్డేలో 140 (107 బంతుల్లో), విశాఖ వేదికగా జరిగిన రెండో వన్డేలో 157 నాటౌట్ (129 బంతుల్లో) చెలరేగిన సంగతి తెలిసిందే.

తాజాగా పుణె వేదికగా వెస్టిండిస్‌తో జరుగుతున్న మూడో వన్డేలోనూ 110 బంతుల్లో 10 ఫోర్లు 1 సిక్స్‌ సాయంతో కెరీర్‌లో 38వ సెంచరీ పూర్తి చేసుకున్నాడు. దీంతో ఒకే జట్టుపై వరసగా నాలుగు సెంచరీలు చేసిన బ్యాట్స్‌మన్‌గా అరుదైన ఘనత సాధించాడు. హోల్డర్‌‌ వేసిన 38 ఓవర్‌ తొలి బంతికే సింగిల్‌ రాబట్టిన కోహ్లీ వన్డేల్లో 38వ సెంచరీని సాధించాడు.

వన్డేల్లో కోహ్లీ 38వ సెంచరీ

ఈ మ్యాచ్‌లో కోహ్లీ మినహా మిగతా టాపార్డర్‌ బ్యాట్స్‌మన్‌ రోహిత్‌(8), ధావన్‌ (35), రాయుడు (22), పంత్‌ (24), ధోని(7)లు విఫలమయ్యారు. దీంతో భారత్‌ 194 పరుగులకే 5 వికెట్లు కోల్పోయి కష్టాల్లో పడింది. దీంతో కోహ్లీ ఒంటరి పోరాటం చేస్తున్నాడు. లోయర్ ఆర్డర్ బ్యాట్స్‌మెన్‌తో కలిసి జట్టుకు విజయాన్నందించాలని పట్టుదలతో ఆడుతున్నాడు.

39 ఓవర్లకు భారత్ 207/5

మరోవైపు విండీస్ బౌలర్లు కట్టుదిట్టంగా బౌలింగ్ చేస్తుండటంతో పోరు రసవత్తరంగా మారింది. ప్రస్తుతం 39 ఓవర్లలో భారత్ 5 వికెట్ల నష్టానికి 207 పరుగులు చేసింది. కోహ్లీ(103), భువనేశ్వర్ కుమార్(3) క్రీజులో ఉన్నారు. ఈ మ్యాచ్‌లో టాస్ ఓడి తొలుత బ్యాటింగ్ చేసిన విండీస్ 9 వికెట్లకు 283 పరుగులు చేసింది.