French Open: స్టేడియానికొచ్చిన స్టార్‌ను చూసి ఫ్రెంచ్ ఓపెన్ విన్నర్ ఇగా స్వియాటెక్ షాకింగ్ రియాక్షన్...!

చెప్పలేనంత సంతోషంగా ఉంది..

ఇక బేయర్న్ మ్యూనిచ్ సూపర్‌స్టార్‌ అయిన రాబర్ట్ లెవాండోస్కీని చూసిన విషయమై స్వియాటెక్ మీడియాతో మాట్లాడుతూ.. ' హానెస్ట్లీ లెవాండోస్కీ స్టాండ్స్‌లో ఉండడం పట్ల చెప్పలేనంత సంతోషంగా ఉన్నాను. అతను పెద్ద టెన్నిస్ అభిమాని కాదో నాకు తెలియదు.. కానీ ఈ మ్యాచ్ కోసం అతను రావడం నిజంగా బాగుంది. అతను చాలా సంవత్సరాలుగా పొలాండ్ దేశ అత్యుత్తమ అథ్లెట్‌గా కొనసాగుతున్నాడు. ఇప్పటికీ అతను నా ఆటను చూడడానికి కోర్టుకు వచ్చాడనే విషయాన్ని నమ్మలేకపోతున్నా. ' అని పేర్కొంది.

ఈ ఏడాది స్వియాటెక్ విజయ పరంపర

ఈ ఏడాది స్వియాటెక్‌ తన విజయపరంపర కొనసాగించింది. ఒక్క మ్యాచ్ కూడా ఓడిపోకుండా ఫ్రెంచ్ ఓపెన్ ఫైనల్‌తో సహా కలిపి వరుసగా 35విజయాలు నమోదు చేసింది. 21ఏళ్ల స్వియాటెక్‌ 2020లో ఫ్రెంచ్‌ ఓపెన్‌లో తొలిసారి విజేతగా నిలిచింది. ఇక రెండో దఫా ఈసారి అనూహ్యంగా ఫైనల్ చేరిన అమెరికన్ టీనేజర్ కోకో గాఫ్‌ ఆమెకు సవాల్ విసిరేందుకు రెడీ అయింది. అయితే స్వియాటెక్‌ భీకర ఫాంలో ఉండడంతో కోకో గాఫ్ తలవంచక తప్పలేదు. ఇక ఫైనల్లో కోకో గాఫ్‌ తీవ్ర ఒత్తిడికి గురయింది. రెండు సెట్లలో కలిసి కేవలం నాలుగు గేమ్‌లు మాత్రమే గెలిచింది.

ఏమాత్రం అవకాశమివ్వకుండా గెలుపు

పోలాండ్ టెన్నిస్ స్టార్.. లాంగ్ ర్యాలీలకు కోకో గాఫ్‌కు అవకాశమివ్వలేదు. పది ర్యాలీల్లోపే దాదాపు పాయింట్లు సాధించింది. తొలి సెట్‌ తొలి గేమ్‌లోనే గాఫ్‌ సర్వీస్‌ను స్వియాటెక్‌ బ్రేక్ చేసింది. ఇక గాఫ్‌కు ఏమాత్రం అవకాశమివ్వకుండా 4-0తో ఆధిక్యంలోకి వెళ్లింది. అయిదో గేమ్‌లో గాఫ్‌ సర్వీస్‌ను కాపాడుకుని మళ్లీ పోటీలోకి వచ్చినా.. స్వియాటెక్ మాత్రం తన ఉనికిని కోల్పోకుండా మళ్లీ రాణించి.. 6-1తేడాతో గెలుపొందింది. రెండో సెట్‌లో కోకో, స్వియాటెక్‌ మధ్య కాస్త హోరాహోరీ సాగింది. కానీ స్వియాటెక్ చివర్లో అవకాశమివ్వకుండా రెండు సెట్లలోనే ఆటను ముగించింది.