సొంతగడ్డపై అదరగొట్టిన బుల్స్: పట్నాపై ఉత్కంఠ విజయం

హైదరాబాద్: సొంతగడ్డపై బెంగళూరు బుల్స్ మరోసారి అదరగొట్టింది. చివరి వరకు ఉత్కంఠగా సాగిన ఈ మ్యాచ్‌లో స్టార్‌ రైడర్‌ పవన్‌ షెరావత్‌(17పాయింట్లు) మరోసారి విజృంభిచడంతో బెంగళూరు బుల్స్ 40-39తో పాట్నా పైరేట్స్‌ విజయం సాధించింది. బెంగళూరు జట్టు తరుపున ట్యాక్లింగ్‌లో మహేందర్‌ సింగ్‌(5పాయింట్లు)తో మెరిశాడు.

నవీన్‌ సూపర్ షో: జైపూర్‌పై ఢిల్లీ ఉత్కంఠ విజయం

ఇక, పాట్నా స్టార్‌ రైడర్‌ పర్‌దీప్‌ నర్వాల్‌(14) చివరి దాకా పోరాడినప్పటికీ జట్టుకు విజయాన్ని అందించలేకపోయాడు. మ్యాచ్ ఆరంభం నుంచీ హోరాహోరీగా సాగింది. మ్యాచ్‌ 12వ నిమిషంలో పర్దీప్‌ ఓ అద్భుతమైన రైడ్‌తో బెంగళూరు బుల్స్‌ను ఆలౌట్ చేయడంతో పట్నా పైరేట్స్ 13-7ఆధిక్యంలోకి దూసుకెళ్లింది.

ఈ క్రమంలో బెంగళూరు బుల్స్ రైడర్స్ పవన్ షెరావత్ విజృంభించి వరుస పాయింట్లు సాధించడంతో పట్నాకు చేరువైంది. తొలి అర్ధభాగం ముగిసే సరికి పాట్నా పైరేట్స్ 29-24తో ఆధిక్యంలో నిలిచింది. ఇక, రెండో అర్ధభాగంలోనూ చాలాసేపు పాట్నా పైరేట్స్ ఆధిక్యంలోనే కొనసాగింది. ఈ క్రమంలో 50సార్లు సూపర్‌ 10 సాధించిన తొలి ప్లేయర్‌గా పర్దీప్‌ చరిత్ర సృష్టించాడు.

ఒకానొక దశలో పట్నా పైరేట్స్ 37-29తో నిలవడంతో అందరూ ఆ జట్టు విజయం ఖాయమని అనుకున్నారు. అయితే, అనూహ్యాంగా బెంగళూరు ఒక్కసారి రేసులోకి వచ్చింది. పర్దీప్‌ నర్వాల్‌ను బెంగళూరు కెప్టెన్ అజయ్‌ ఠాకూర్ ఔట్ చేయడంతో ఆ తర్వాత పాట్నాను ఆలౌట్‌ చేయడంతో బుల్స్‌ పోటీలోకి వచ్చింది. ఆ తర్వాత పైరేట్స్‌ ఆధిక్యాన్ని క్రమంగా తగ్గించింది.

చివర్లో బుల్స్ స్టార్ రైడర్ పవన్‌‌తో పాటు డిఫెండర్లు రాణించడంతో ఏకంగా 38-38తో పాయింట్లు సమం చేసింది. చివరి నిమిషంలో ఒక్క పాయింట్‌ తేడాతో పాట్నాపై విజయం సాధించింది. అంతకముందు హోరాహోరీగా సాగిన మ్యాచ్‌లో ఢిల్లీ 46-44తో జైపూర్‌ పింక్‌ పాంథర్స్‌ను ఓడించింది.

ప్రొ కబడ్డీలో గురువారం
పుణెరి vs యు ముంబా (రాత్రి 7:30 నుంచి)