మెస్సీ చిరునవ్వులు: పుట్‌బాల్‌లో ఇలా కూడా బంతిని అడ్డుకోవచ్చా?

వినూత్నంగా ఆలోచించిన మార్సెలో బ్రోజోవిక్

బంతిని చేత్తో ఆపితే పౌల్ అవుతుందని కాబట్టి.. శరీరంలోని మిగతా భాగాలతో ఆపే అవకాశం ఆటగాళ్లకు ఉంటుంది. తాజాగా బార్సిలోనా-ఇంటర్‌మిలాన్ జట్ల మధ్య మ్యాచ్ జరిగింది. ఈ మ్యాచ్‌లో మార్సెలో బ్రోజోవిక్ అనే ప్లేయర్ వినూత్నంగా ఆలోచించి బంతిని అడ్డుకున్నాడు.

బంతిని అడ్డుకోవడానికి గోడలా నిలబడ్డ ఆటగాళ్లు

తన సహచర ఆటగాళ్లు బంతిని అడ్డుకోవడానికి గోడలా నిలబడితే అతడు మాత్రం వాళ్ల వెనుక వెళ్లి అడ్డంగా పడుకున్నాడు. సరిగ్గా బార్సిలోనా ప్లేయర్ సురెజ్ ఫ్రీకిక్ కొట్టే సమయంలోనే బ్రోజోవిక్ ఇలా చేశాడు. అతడు ఊహించినట్లే బంతి మిగతా ప్లేయర్స్ అందరినీ దాటేసినా.. అతన్ని తగిలి బంతి గ్రౌండ్ బయటకు వెళ్లిపోయింది.

ఆశ్చర్యానికి లోనైన మెస్సీ

ఈ సన్నివేశాన్ని చూసిన ప్రేక్షకులు ఒక్కసారిగా ఆశ్చర్యానికి లోనయ్యారు. ఆశ్చర్యానికి లోనైన వాళ్లలో అర్జెంటీనా సూపర్ స్టార్, బార్సిలోనా స్టార్ ప్లేయర్ లియోనల్ మెస్సీ కూడా ఉన్నాడు. మెస్సీ చేయి విరగడంతో కొన్ని వారాల పాటు ఫుట్‌బాల్‌కు దూరమయ్యాడు. దీంతో ఈ మ్యాచ్‌ను స్టాండ్స్‌లో తన కొడుకుతో కలిసి చూశాడు.

చిరునవ్వులు చిందించిన మెస్సీ

బ్రోజోవిక్ బంతిని అడ్డుకున్న తీరుపై మెస్సీ చిరునవ్వులు చిందిస్తూ కనిపించాడు. ఈ మ్యాచ్‌లో చివరికి బార్సిలోనానే 2-0 గోల్స్ తేడాతో ఇంటర్‌మిలాన్‌ జట్టుపై విజయం సాధించింది.