'శ్రేయాస్‌ అయ్యర్‌ లవ్‌లో పడ్డాడనుకున్నా.. సైకాలజిస్ట్‌ దగ్గరికి తీసుకెళ్లా'

బ్యాటింగ్‌ గతి తప్పింది:

తాజాగా శ్రేయస్‌ తండ్రి సంతోష్‌ అయ్యర్‌ క్రిక్‌బజ్ షో 'స్పైసీ పిచ్'లో మాట్లాడుతూ పలు విషయాలు వెల్లడించారు. 'శ్రేయస్‌ అయ్యర్‌ 4 ఏళ్ల వయసులోనే బంతిని చక్కగా బాదేవాడు. అది చూసిన నాకు అతడి బ్యాటింగ్‌ ప్రతిభ అర్థమైంది. అందుకే శ్రేయస్‌ను మంచి బ్యాట్స్‌మన్‌గా తీర్చిదిద్దాలని నిర్ణయించుకున్నాం. శిక్షణ ఇప్పించా. అయితే అండర్‌-16 క్రికెట్‌ ఆడే రోజుల్లో శ్రేయస్‌ బ్యాటింగ్‌ గతి తప్పింది. దీన్ని ఓ కోచ్‌ గమనించి నాకు చెప్పాడు' అని సంతోష్‌ అయ్యర్‌ తెలిపారు.

లవ్‌లో పడ్డాడనుకున్నా:

శ్రేయాస్‌ కోచ్ ఓ రోజు నాతో ఏకాంతంగా మాట్లాడాడు. మీ అబ్బాయికి ప్రతిభ ఉంది. కానీ.. ఏకాగ్రతే లేకుండా పోతోంది. ఆటపై ఏమాత్రం దృష్టి సారించలేకపోతున్నాడన్నాడు. ఏం చేయాలో అర్ధం కాలేదు. ప్రేమలో పడడంతో పాటు చెడు సహవాసాలు తమ కుమారుడి దృష్టిని మరల్చాయేమోనని అనుమానించా. ఇక ఆలస్యం చేయకుండా సైకాలజిస్ట్‌ దగ్గరికి తీసుకెళ్లా. ఆందోళన అనవసరమని, అందరికీ ఇలాంటి పరిస్థితి వస్తుందని ఆయన మాకు భరోసా ఇచ్చాడు. తర్వాత ఫామ్‌ను అందుకోవడంతో శ్రేయస్‌ వెనుదిరిగి చూడాల్సిన అవసరం రాలేదు' అని సంతోష్‌ అయ్యర్‌ చెప్పుకొచ్చారు.

నాలుగో స్థానంలో శ్రేయస్‌ సరైనోడు:

గత మూడేళ్లుగా టీమిండియాను ప్రధానంగా వేధిస్తున్న సమస్య మిడిల్‌ ఆర్డర్‌ బ్యాటింగ్‌. మ్యాచ్‌ విన్నర్లుగా భావించే కీలక స్థానాల్లో సరైన బ్యాట్స్‌మన్‌ లేక తీవ్ర ఇబ్బంది పడుతోంది భారత జట్టు. కొన్ని సందర్భాల్లో టాప్‌ఆర్డర్‌ విఫలమైతే ఇక జట్టును ఆదుకునే ఆటగాడే కరువయ్యాడు. అంబటి రాయుడు, అజింక్య రహానె, కేదార్‌ జాదవ్‌, దినేశ్‌ కార్తిక్‌, కేఎల్‌ రాహుల్‌, హార్దిక్‌ పాండ్య, మనీశ్‌ పాండే, రిషభ్‌ పంత్‌.. ఇలా ఎంత మందికి అవకాశం ఇచ్చినా సద్వినియోగం చేసుకోలేకపోయారు. ఇలాంటి పరిస్థితుల్లోనే ఆ స్థానంలో మెరుస్తున్నాడు శ్రేయస్‌ అయ్యర్‌. 18 వన్డేల్లో 748 పరుగులు చేశాడు. ఇందులో ఓ సెంచరీ, 8 అర్ధసెంచరీలున్నాయి.

ఐపీఎల్లోనూ తనదైన ముద్ర:

శ్రేయస్‌ టీమిండియా తరఫునే కాకుండా ఐపీఎల్లోనూ తనదైన ముద్ర వేశాడు. 2015లో ఢిల్లీ జట్టు తొలిసారి అతడిని 2.6 కోట్లకు దక్కించుకుంది. అందుకు తగ్గట్టే శ్రేయస్‌ ఆ సీజన్‌లో 439 పరుగులతో మంచి ప్రదర్శన చేశాడు. తర్వాత 2018లో గౌతమ్ గంభీర్‌ తప్పుకున్నాక ఢిల్లీ జట్టు సారథిగా బాధ్యతలు అందుకున్నాడు. ఆ సీజన్‌లో 14 మ్యాచ్‌ల్లోనే 411 పరుగులతో ఆకట్టుకున్నాడు. ఇక 2019లో బ్యాటింగ్‌లో రాణించడమే కాకుండా కెప్టెన్‌గానూ ప్రశంసలు అందుకున్నాడు. ఏడేళ్ల తర్వాత ఢిల్లీని ప్లేఆఫ్స్‌కు తీసుకెళ్లి జట్టులో కొత్త ఉత్సాహాన్ని తీసుకొచ్చాడు. ఇలా బ్యాట్స్‌మన్‌గానే కాకుండా కెప్టెన్‌గానూ అదరగొడుతున్నాడు.