'ఓపిగ్గా ఉండటమే మా విజయానికి కారణం'

ఎక్కువ సేపు క్రీజ్‌లో నిలబడితే పరుగులు

"సాధ్యమైనంత ఎక్కువ సేపు క్రీజ్‌లో నిలబడితే పరుగులు సాధించడం కష్టం కాదు. అదే ప‍్రయోగాన్ని వన్డే సిరీస్‌లో అవలంభించాం. మా జట్టు మేనేజ్‌మెంట్‌ నన్ను సుదీర్ఘమైన బ్యాటింగ్‌ చేయాలని ఆదేశించింది. ఆ విషయంలో నేను సక్సెస్‌ అయ్యా. వెస్టిండీస్‌లో వికెట్‌పై రాణించడం ఎప్పుడూ సులభం కాదు. ఇక్కడ కావాల్సింది ఓపిక" అని ఇక్బాల్ పేర్కొన్నాడు.

అందుకు కారణం ఓపిగ్గా ఉండటమే

"నేను భారీ పరుగులు చేశానంటే అందుకు కారణం ఓపిగ్గా ఉండటమే. విండీస్‌తో వన్డే సిరీస్‌లో ఓపిక అనేది కీలక పాత్ర పోషించదని కచ్చితంగా చెప్పగలను. దాంతోనే మేము చాలా కాలం తర్వాత విండీస్‌ గడ్డపై సిరీస్‌ గెలిచాం" అని మ్యాన్ ఆఫ్ ద మ్యాచ్ అవార్డు అందుకున్న తమీమ్‌ తెలిపాడు.

తొలుత బ్యాటింగ్ చేసిన బంగ్లా 6 వికెట్లకు 301 పరుగులు

బసెటెరె వేదికగా జరిగిన మూడో వన్డేలో తమీమ్‌ ఇక్బాల్‌ (103), మహ్మదుల్లా (67 నాటౌట్‌) చెలరేగడంతో తొలుత బ్యాటింగ్ చేసిన బంగ్లాదేశ్‌ నిర్ణీత ఓవర్లలో 6 వికెట్లకు 301 పరుగులు చేసింది. అనంతరం భారీ లక్ష్యంతో బరిలోకి దిగిన వెస్టిండిస్ 50 ఓవర్లలో 6 వికెట్లకు 283 పరుగులే చేయగలిగింది. గేల్‌ (73), హోప్‌ (64) రాణించారు.

ఆఫ్రిది సిక్సర్ల రికార్డును సమం చేసిన గేల్‌

తొమ్మిదేళ్ల తర్వాత వెస్టిండీస్‌ గడ్డపై బంగ్లాదేశ్‌‌కు ఇదే తొలి సిరీస్‌ విజయం. ఇదిలా ఉంటే ఈ మ్యాచ్‌లో క్రిస్‌ గేల్‌ మరో అరుదైన మైలురాయిని అందుకున్నాడు. అంతర్జాతీయ క్రికెట్‌లో అత్యధిక సిక్సర్లు బాదిన ఆటగాళ్ల జాబితాలో పాకిస్తాన్‌ మాజీ క్రికెటర్‌ షాహిద్‌ ఆఫ్రిదితో కలిసి సంయుక్తంగా అగ్రస్థానంలో నిలిచాడు. బంగ్లాదేశ్‌తో జరిగిన మూడో వన్డేలో గేల్‌(73; 66 బంతుల్లో 6 ఫోర్లు, 5 సిక్సర్లు) ఈ ఘనత సాధించాడు. ఈ మ్యాచ్‌లో ఐదో సిక్సర్‌ను సాధిండం ద్వారా క్రిస్ గేల్‌ తన కెరీర్‌లో 476వ సిక్సర్‌ను నమోదు చేశాడు. దీంతో ఆఫ్రిది(476 సిక్సర్లు) సిక్సర్ల రికార్డును గేల్‌ సమం చేశాడు.