Super Friday: ఒకే గేమ్... ఒకేరోజు... భారత్-కివీస్ మధ్య మూడు మ్యాచ్‌లు

By Nageshwara Rao M

Updated: Friday, January 24, 2020, 12:38 [IST]

Super Friday: India to play New Zealand in 3 cricket matches across the globe

హైదరాబాద్: రెండు దేశాలు... ఒకే గేమ్... కానీ ఒకే రోజు మూడు వేర్వేరు అంతర్జాతీయ మ్యాచ్‌లు. ఆ రెండు దేశాలు ఏంటో ఇప్పటికే మీకు అర్ధమయ్యే ఉంటాయి. భారత్-న్యూజిలాండ్. ఈ రెండు దేశాలు శుక్రవారం మూడు క్రికెట్‌ మ్యాచ్‌లు ఆడుతుండటం విశేషం.

విరాట్ కోహ్లీ సారథ్యంలోని మెన్ ఇన్ బ్లూ, ఇండియా ఎ, భారత అండర్-19 జట్టు. ఈ మూడు జట్లు న్యూజిలాండ్‌తో మూడు వేర్వేరు వేదికలలో రెండు ఖండాల్లో "సూపర్ ఫ్రైడే" రోజున తలపడుతున్నాయి. ఈ మూడు మ్యాచ్‌లు భారత క్రికెట్ అభిమానులకు నాన్-స్టాప్ క్రికెట్‌ను అందించనున్నాయి.

ఆక్లాండ్‌ వేదికగా న్యూజిలాండ్ సీనియర్ జట్టుతో కోహ్లీసేన, క్రైస్ట్‌చర్చ్‌ వేదికగా న్యూజిలాండ్-ఎతో, దక్షిణాఫ్రికా వేదికగా జరుగుతున్న అండర్‌-19 ప్రపంచకప్‌లో న్యూజిలాండ్ యువ జట్టుతో భారత యువ జట్టు తలపడనుంది. ఒకే రోజు ఒకే దేశంతో మూడు మ్యాచుల్లో భారత్‌ తలపడటం ఇదే తొలిసారి.

ఆరు వారాల సుదీర్ఘ పర్యటనలో

ఆరు వారాల సుదీర్ఘ పర్యటనలో భాగంగా కోహ్లీసేన న్యూజిలాండ్‌లో పర్యటిస్తోంది. ఈ పర్యటనలో భాగంగా 5 టీ20లు, 3 వన్డేలు, 2 టెస్టులు ఆడనుంది. ఐదు టీ20ల సిరిస్‌లో భాగంగా న్యూజిలాండ్-భారత్ జట్ల మధ్య తొలి టీ20 శుక్రవారం శుక్రవారం మధ్యాహ్నం 12.30 గంటలకు ప్రారంభమైంది.

టాస్ గెలిచిన టీమిండియా

ఈ మ్యాచ్‌లో టాస్ నెగ్గిన టీమిండియా కెప్టెన్ విరాట్ కోహ్లీ కివీస్‌ను బ్యాటింగ్‌కు ఆహ్వానించాడు. మరోవైపు భారత యువ జట్టు అండర్‌ 19 ప్రపంచకప్‌లో భాగంగా మధ్యాహ్నం 1.30 నుంచి న్యూజిలాండ్‌తో తలపడనుంది. ఈ మెగా టోర్నీలో భారత యువ జట్టు ఇప్పటికే శ్రీలంక, జపాన్‌‌పై విజయం సాధించింది.

న్యూజిలాండ్‌-ఎ జట్టుతో భారత్‌-ఎ జట్టు

దీంతో పాటు న్యూజిలాండ్‌-ఎ జట్టుతో భారత్‌-ఎ జట్టు తలపడుతోంది. ఈ మ్యాచ్ శుక్రవారం తెల్లవారు జామున 3.30 గంటలకే ప్రారంభమైంది. ఈ మ్యాచ్‌లో తొలుత బ్యాటింగ్ చేసిన న్యూజిలాండ్-ఏ జట్టు నిర్ణీత 50 ఓవర్లలో ఏడు వికెట్ల నష్టానికి 295 పరుగులు చేసింది. జార్జ్‌ (135) సెంచరీ సాధించాడు. భారత బౌలర్లలో ఇషాన్‌ మూడు, సిరాజ్‌ రెండు వికెట్లు తీశారు.