కెరీర్‌లో ఎప్పుడూ ఒక్క మంచి ప్రదర్శన చేయలేదు.. అతనికి రీఎంట్రీ కష్టమే: పాంటింగ్‌

రీఎంట్రీ కష్టమే

రికీ పాంటింగ్‌ తాజాగా ఏబీసీ గ్రాండ్‌స్టాండ్‌తో మాట్లాడుతూ... అంతర్జాతీయ కెరీర్‌లో ఎప్పుడూ ఉస్మాన్‌ ఖవాజా నుంచి ఒక మంచి ప్రదర్శన చూడలేదన్నాడు. ఖవాజాలో నిలకడైన ప్రదర్శన లేకపోవడమే అతనిపై వేటుకు కారణమన్నాడు. 'ఖవాజాకు ఆసీస్‌ జట్టులో చోటు కష్టమే. నేను ఎప్పుడూ అతనొక మంచి ప్లేయర్‌ అని ఫీలవుతూ ఉండేవాడిని. కానీ నేను ఆశించిన స్థాయిలో అంతర్జాతీయ ప్రదర్శన ఒక్కటి కూడా చేయలేదు. ఏదో కొన్ని మెరుపులు తప్పితే.. నిలకడ మాత్రం ఖవాజాలో ఎక్కడా కనిపించలేదు' అని పాంటింగ్‌ అన్నాడు.

అప్పుడైనా నిరాశపరచడనే అనుకుంటున్నా

'ఉస్మాన్‌ ఖవాజాకు నిలకడ ఉంటే ఆసీస్‌ జట్టులో కొనసాగేవాడు. అది లేకపోవడం వలనే జట్టులో చోటు కోల్పోయాడు. దేశవాళీ క్రికెట్‌లో ఖవాజా చేసిన పరుగులతో పోలిస్తే.. అంతర్జాతీయ క్రికెట్‌లో చాలా తక్కువ చేశాడు. దేశవాళీల్లో భారీ పరుగులు చేస్తే.. అంతర్జాతీయ క్రికెట్‌లో తేలిపోతారు. మనం ఎప్పుడూ గొప్ప ఆటగాళ్లమని రాసి ఉండదు. వచ్చిన అవకాశాన్ని ఒడిసి పట్టుకోవడంలోనే గొప‍్పతనం ఉంటుంది. ఈ సీజన్‌ సమ్మర్‌ క్రికెట్‌ ఆరంభమైన తర్వాత ఖవాజాకు అవకాశం వస్తుంది. అక్కడ నిరూపించుకుని మళ్లీ అవకాశం కోసం వేచిచూడాలి. ఒకవేళ మళ్లీ ఆడే అవకాశం వస్తే.. అప్పుడైనా నిరాశపరచడనే అనుకుంటున్నా' అని పాంటింగ్‌ పేర్కొన్నాడు.

ఆసీస్ తరఫున 44 టెస్టులు, 40 వన్డేలు

ఉస్మాన్‌ ఖవాజా ఆసీస్ తరఫున ఇప్పటివరకూ 44 టెస్టులు, 40 వన్డేలు ఆడాడు. వన్డేల్లో రెండు సెంచరీతో 1,554 పరుగులు చేయగా.. టెస్టుల్లో 8 సెంచరీలు, 14 హాఫ్‌ సెంచరీలతో 2,887 పరుగులు చేశాడు. అయితే ఈ తరహా ప‍్రదర్శన సరిపోదు అని పాంటింగ్ అంటున్నాడు. గతేడాది యాషెస్‌ సిరీస్‌లో భాగంగా మధ్యలో జట్టులో చోటు కోల్పోయిన ఖవాజాకు మళ్లీ ఆడే అవకాశం రాలేదు. ఖ‌వాజాతో పాటు పీట‌ర్ హ్యాండ్స్‌కోంబ్‌, మార్క‌స్ హ‌రీస్‌, షాన్ మార్ష్‌, మార్క‌స్‌ స్టొయినిస్‌, నాథ‌న్ కౌల్ట‌ర్ నైల్ కాంట్రాక్ట్‌లు కోల్పోయారు. వీరి స్థానాల్లో కొత్త‌గా మార్న‌స్ ల‌బుషేన్‌, ఆస్ట‌న్ ఆగ‌ర్‌, జో బ‌ర్న్స్‌, మిషెల్ మార్ష్‌, మాథ్యూ వెడ్‌, కేన్ రిచ‌ర్డ్‌స‌న్ కొత్త‌గా కాంట్ర‌క్ట్ పొందారు.