ఆసీస్‌ను ఓడించి కివీస్ సెమీస్ ఫైనల్ బెర్తు కన్ఫమ్ చేసుకునేనా?

11 పాయింట్లతో మూడో స్థానంలో న్యూజిలాండ్

దీంతో ఆడిన 7 మ్యాచ్‌ల్లో ఐదింట గెలిచి 11 పాయింట్లతో న్యూజిలాండ్ మూడో స్థానంలో ఉంది. నాకౌట్‌లో ప్రవేశించాలంటే ఆస్ట్రేలియా, ఇంగ్లాండ్‌లతో జరిగే మ్యాచ్‌ల్లో ఒకదాంట్లో గెలవాల్సి ఉంటుంది. 2015 ప్రపంచకప్ ఫైనల్లో ఆసీస్ చేతిలో ఓటమికి బదులు తీర్చుకోవాలని కివీస్ ఉవ్విళ్లూరుతుంటే.. ఈ మెగా టోర్నీలో తమ ఆధిపత్యాన్ని కొనసాగించాలని ఆసీస్ భావిస్తోంది.

ముఖాముఖి రికార్డు

రెండు జట్ల మధ్య ఇప్పటివరకు 136 మ్యాచ్‌లు జరగ్గా 90 మ్యాచ్‌ల్లో ఆస్ట్రేలియా, 39 మ్యాచ్‌ల్లో న్యూజిలాండ్‌ నెగ్గాయి. ఏడింట్లో ఫలితం తేలలేదు. ఇక, ప్రపంచకప్ విషయానికి వస్తే ఇరు జట్ల మధ్య 10 మ్యాచ్‌లు జరగ్గా ఏడింట్లో ఆసీస్, మూడు మ్యాచ్‌ల్లో కివీస్‌ గెలుపొందింది.

టోర్నీలో అత్యధిక పరుగులు, వికెట్లు

బ్యాటింగ్‌లో ఓపెనర్లు కెప్టెన్‌ ఫించ్, వార్నర్, బౌలింగ్‌లో స్టార్క్, కమిన్స్‌ కంగారూలను ముందుండి నడిపిస్తున్నారు. ప్రస్తుత టోర్నీలో అత్యధిక పరుగుల, వికెట్ల వీరుల జాబితాలో అగ్రస్థానంలో ఉన్నది కూడా కంగారూలే. ఓపెనర్లు వార్నర్ (500), ఫించ్ (496) పరుగుల వరద పారిస్తున్నారు. వీరిద్దరూ ప్రతీ మ్యాచ్‌లోనూ మంచి భాగస్వామ్యాలను నమోదు చేయడంతో ఆసీస్‌కు ఎదురులేకుండా పోయింది. ఇక, బౌలింగ్‌లో స్టార్క్, బెరెన్‌డార్ఫ్, కమ్మిన్స్‌ను న్యూజిలాండ్ బ్యాట్స్‌మెన్ ఎలా ఎదుర్కొంటారో చూడాలి.

పెద్ద సమస్యగా మారిన ఓపెనర్ల పేలవ ఫామ్‌

న్యూజిలాండ్‌కు ఓపెనర్ల పేలవ ఫామ్‌ పెద్ద సమస్యగా మారింది. ఓపెనర్లు గప్టిల్, మన్రో స్థాయికి తగ్గ ప్రదర్శన చేయలేకపోతుండటంతో కివీస్‌కు సరైన ఆరంభాలు లభించడం లేదు. వీరిద్దరూ టోర్నీలో ఇప్పటివరకు ఒక్కో అర్ధ శతకం మాత్రమే చేశారు. అద్భుత ఫామ్‌తో గట్టెక్కిస్తున్న కెప్టెన్‌ విలియమ్సన్‌... పాక్‌తో మ్యాచ్‌లో సాధారణ స్కోరుకు పరిమితం కావడం ఓటమికి కారణమైంది. టేలర్ ఫర్వాలేదనిపిస్తున్నా... లాథమ్ కూడా పెద్దగా ప్రభావం చూపలేకపోతున్నాడు. ఆల్‌రౌండర్లు నీషమ్, గ్రాండ్‌హోమ్ అంచనాలకు మించి రాణిస్తున్నారు. బౌలింగ్‌లో బౌల్ట్, ఫెర్గూసన్, సౌథీ మంచి ఫామ్‌లో ఉన్నారు.