2012లో వివాహం
2012లో మాజీ మోడల్, టీవీ ప్రజెంటర్ కైలీతో క్లార్క్ వివాహం జరిగిన సంగతి తెలిసిందే. క్లార్క్, కైలీ దంపతులకు ప్రస్తుతం నాలుగేళ్ల కుమార్తె కెల్సే ఉంది. గత ఏడాది నుంచి కైలీకి దూరంగా ఉంటున్న క్లార్క్.. ఇటీవల కూతురు కెల్సే 4వ పుట్టిన రోజు వేడుకల్లో భార్యతో సరదాగా గడిపాడు. గత కొంతకాలంగా క్లార్క్ భార్యతో గొడవపడుతున్నట్లు వార్తలు వచ్చాయి. అయితే గతేడాది గొడవలు అధికం కావడంతో ఇద్దరూ వేర్వేరుగా ఉంటున్నట్లు తెలిసింది.
కుమార్తెను చూసుకోవడానికి
కూతురు 4వ పుట్టినరోజు వేడుకలు, క్లార్క్ తల్లిదండ్రుల 50వ పెళ్లిరోజు వేడుకలలో క్లార్క్, కైలీ దంపతులు సఖ్యతగానే ఉన్నట్లు సన్నిహితులు తెలిపారు. ఇంతలోనే ఇద్దరు విడాకులు తీసుకున్నట్లు ప్రకటించి అందర్నీ ఆశ్చర్యపరిచారు. ఒకరినొకరు పరస్పరం గౌరవించుకుంటూ తమ కుమార్తెను ఇద్దరం చూసుకోవడానికి కట్టుబడి ఈ నిర్ణయానికి వచ్చామని క్లార్క్ దంపతులు పేర్కొన్నారు. తమ ప్రైవసీని గౌరవించాల్సిందిగా అందరికి విజ్ఞప్తి చేశారు.
కోర్టు వెలుపలే విడాకులు
క్లార్క్, కైలీ దంపతులు కోర్టు వెలుపలే తమ విడాకుల ప్రక్రియను పూర్తి చేయాలని భావిస్తున్నట్టుగా సమాచారం తెలుస్తోంది. 5 నెలల కిత్రం క్లార్క్ దంపతులు విడిపోయారనే ప్రచారం జరిగింది. అయితే.. కైలీ ఆ వార్తలను ఖండించారు. తమ బంధం బలంగా ఉందన్నారు. కైలీతో పెళ్లికి ముందు మోడల్ లారా బింగిల్తో క్లార్క్కు నిశ్చితార్థం జరిగింది. కానీ.. ఏవో కారణాలతో వారిద్దరు 2010లో విడిపోయారు. అనంతరం అవతార్ హీరో సామ్ వర్తింగ్టన్ను బింగిల్ 2014లో వివాహం చేసుకుంది.
పరస్పర అంగీకారంతో విడిపోయాం
విడాకులపై క్లార్క్ స్పందించాడు. 'కైలీ, నేను ఒకరినొకరు గౌరవించుకుంటున్నాం. పరస్పర అంగీకారంతో విడిపోయి పాప భవిష్యత్ గురించి బాధ్యత తీసుకోవాలని నిర్ణయించుకున్నాం. ఇన్నిరోజులు మాకు అండగా నిలిచిన కుటుంబ, సన్నిహితులకు కృతజ్ఞతలు. కుటుంబ సభ్యులు కొన్ని విషయాలు రహస్యంగా ఉంచగలిగారు' అని తెలిపాడు.
2015లో క్రికెట్ గుడ్ బై
2011లో మాజీ కెప్టెన్ రికీ పాంటింగ్ నుంచి క్లార్క్ కెప్టెన్సీ బాధ్యతలు తీసుకున్నాడు. అనతికాలంలోనే ఆసీస్ క్రికెట్ జట్టును నడిపించడంలో సక్సెస్ అయ్యాడు. ఆసీస్కు ఎన్నో అద్భుతమైన విజయాలను అందించి పాంటింగ్కు సరైన వారసుడిగా పేరు సంపాదించాడు. 12 ఏళ్ల సుదీర్ఘ క్రికెట్ కెరీర్లో 115 టెస్టులు, 245 వన్డేలు, 34 టీ20 మ్యాచ్లు ఆడాడు. 2015లో జరిగిన యాషెస్ సిరీస్ అనంతరం క్లార్క్ క్రికెట్ గుడ్ బై చెప్పాడు.