Click it and Unblock the Notifications
ఏబీ ఉండటంతో స్వేచ్ఛగా ఆడాను
గ్లెన్ మ్యాక్స్వెల్ (41 బంతుల్లో 59; 5 ఫోర్లు, 3 సిక్సర్లు) ఐదేళ్ల తర్వాత ఐపీఎల్‌లో అర్ధ శతకం నమోదు చేశాడు. మ్యాక్స్‌వెల్‌కు 'మ్యాన్‌ ఆఫ్‌ ది మ్యాచ్' అవార్డు దక్కింది. ఈ సందర్భంగా మ్యాక్సీ మాట్లాడుతూ... 'మా ఆరంభాలు చాలా బాగున్నాయి. ఇది నా కొత్త ఫ్రాంచైజీ. వారు నాకు ఓ ప్రత్యేక పాత్ర ఇచ్చారు. మన తర్వాత బ్యాటింగ్‌ చేసేవాళ్లుంటే స్వేచ్ఛగా ఆడగలుగుతాం. నా తర్వాత ఏబీ డివిలియర్స్ ఉండటంతో స్వేచ్ఛగా ఆడాను. ఆస్ట్రేలియా క్రికెట్‌ జట్టులోని పాత్రే ఇక్కడా పోషిస్తున్నాను. జట్టు యాజమాన్యం, సహాయ సిబ్బంది, ఆటగాళ్లు నాకు అండగా నిలిచారు' అని అన్నాడు.
అలవాటు లేని పని
'అనుభవంతో పరుగులు చేశాను. మొదటి బంతి నుంచే బాదుతూ చివరి వరకు తీసుకెళ్లడం నాకు అలవాటు లేని పని. ఇది నా నాలుగో ఐపీఎల్ జట్టు కాబట్టి ఒత్తిడి ఉంటుంది. నేను మరింత మెరుగ్గా ఆడేందుకు అదే కారణమవుతోంది. నేను బౌలింగ్ చేసే అవకాశం కోసం వేచి చూస్తున్నా. వాషింగ్టన్‌ సుందర్‌ మా జట్టులో సూపర్‌స్టార్‌. నేను బౌలింగ్ ఎక్కువగా చేయకపోతే.. బ్యాటుతో మరిన్ని పరుగులు చేయగలను' అని మ్యాక్స్వెల్ తెలిపాడు. గతేడాది పంజాబ్‌ కింగ్స్‌ తరపున మ్యాక్స్వెల్ ఘోరంగా విఫలమయ్యాడు. 13 మ్యాచ్‌లాడి 108 పరుగులు మాత్రమే చేశాడు. మ్యాక్సీ తీవ్రంగా నిరాశపరచడంతో పంజాబ్‌ జట్టు అతన్ని రిలీజ్‌ చేసింది. ఐపీఎల్ 2021 వేలంలో బెంగళూరు మాక్స్‌వెల్‌ను రూ.14.25 కోట్లు పెట్టి కొనుగోలు చేసింది.
17వ ఓవర్‌ వేయడం కష్టంగా అనిపించింది
'హైదరాబాద్‌ ఇన్నింగ్స్‌లో 17వ ఓవర్‌ వేయడం కష్టంగా అనిపించింది. కెప్టెన్‌ విరాట్ కోహ్లీ నాపై నమ్మకంతో ఉండటం పట్ల సంతోషంగా ఉన్నాను. పిచ్‌ నుంచి నాకు సహకారం లభించింది. దానిని ఉపయోగించుకొని సన్‌రైజర్స్‌ను దెబ్బకొట్టాను. మరో ఓవర్‌ వేసేందుకూ సిద్ధంగానే ఉన్నా. కానీ మొహ్మద్ సిరాజ్‌ అద్భుతంగా బౌలింగ్ చేశాడు. పరిస్థితులను బట్టి చూస్తే జానీ బెయిర్‌స్టో క్యాచ్‌ కీలకం. ఏదేమైనా నాకు మరో అవకాశం లభించినందుకు ఆనందంగా ఉంది' అని షాబాజ్‌ అహ్మద్‌ పేర్కొన్నాడు. షాబాజ్‌ రెండు ఓవర్లలో 7 పరుగులు ఇచ్చి 3 వికెట్లు పడగొట్టాడు.
చేతులు చెమట పట్టాయి
'నా చేతులు చెమట పట్టాయి. నోబాల్స్‌ వేయడం మాత్రం తప్పే. సాధారణ పొరపాటు. ఇలాంటివి మరోసారి పునరావృతం కాకుండా చూసుకుంటా. ఒత్తిడితో కూడిన ఓవర్లు వేయాల్సి ఉంటుందని నాకు నేనే చెప్పుకున్నాను. మా కెప్టెన్‌కు నాపై విశ్వాసం ఉండటం సంతోషకరం. బంతి గరకుగా ఉన్నప్పుడే పరుగులు చేయడం సులభం. ఒక్కసారి బంతి నునుపుగా మారిందా షాట్లు ఆడటం కష్టమైపోతుంది. ఇక్కడ అన్ని మ్యాచుల్లో ఇలాగే జరుగుతోంది. విజయంపై ఎప్పుడూ నమ్మకంతో ఉండటం అవసరం' అని హర్షల్‌ పటేల్‌ చెప్పుకొచ్చాడు. హర్షల్‌ 4 ఓవర్లలో 25 పరుగులు ఇచ్చి 2 వికెట్లు పడగొట్టాడు.
SRH vs RCB: బెంగళూరు చేతిలో హైదరాబాద్‌ ఓటమి.. ఈ తప్పిదాలే సన్‌రైజర్స్‌ కొంపముంచాయి!!
