బెంగళూరు Vs పంజాబ్: గేల్ ఆడితే మా వద్ద ప్లాన్ ఉంది

గేల్ ఆడితే మా వద్ద ప్లాన్ ఉంది

పంజాబ్‌ తొలి మ్యాచ్‌లో గేల్‌ ఆడలేదు. ఈరోజు జరిగే రెండో మ్యాచ్‌లో కూడా గేల్‌ ఆడే అవకాశాలు తక్కువగా ఉన్నట్లు తెలుస్తోంది. ఈ నేపథ్యంలో బెంగళూరు జట్టు ప్రధాన కోచ్ డానియేల్ వెటోరి మాట్లాడుతూ 'చిన్నసామి స్టేడియంలో క్రిస్ గేల్ నిరూపించుకోవాల్సిందేమీ లేదు. ఒకవేళ గేల్‌ను పంజాబ్ ఆడించినా.. అతడిని కట్టడి చేసేందుకు తమ వద్ద గేమ్ ప్లాన్ ఉంది' అని అన్నాడు.

2011 నుంచి ఏడు సీజన్లలో బెంగళూరుకు

క్రిస్ గేల్‌ 2011 నుంచి ఏడు సీజన్లలో బెంగళూరు తరఫున ఆడాడు. బెంగళూరుకు 85 మ్యాచ్‌లాడిన క్రిస్ గేల్ 3000కు పైగా పరుగులు చేశాడు. అతడి ఐపీఎల్ స్ట్రైక్ రేట్ 151.20గా ఉంది. బెంగళూరులోని చిన్నసామి స్టేడియంలో పరిస్థితులు గేల్‌కు బాగా తెలుసు. 2013 ఐపీఎల్‌ ఎడిషన్‌లో గేల్‌ ఇక్కడే 175 పరుగులు సాధించాడు.

వేలంలో క్రిస్ గేల్‌ను కొనుగోలు చేసిన పంజాబ్

దీంతో రెండో మ్యాచ్‌లో క్రిస్ గేల్‌ ఆడితే ఎలా ఎదుర్కోవాలో అన్న దానిపై ఇప్పుడు బెంగళూరు దృష్టి సారించింది. కాగా, ఐపీఎల్ పదకొండో సీజన్‌లో క్రిస్ గేల్‌ను ఆర్‌సీబీ వదులుకోవడంతో వేలంలో కనీస ధరకు పంజాబ్‌ కొనుగోలు చేసిన సంగతి తెలిసిందే. ఢిల్లీతో జరిగిన మొదటి మ్యాచ్‌లో గేల్‌ను ఆడించలేదు.

క్రిస్ గేల్ బరిలోకి దిగితే ఓటమి భయం

శుక్రవారం తమతో జరిగే మ్యాచ్‌లో పంజాబ్ జట్టు క్రిస్ గేల్‌ను బరిలోకి దించితే ఓడిపోతామనే గుబులు బెంగళూరులో ఇప్పుడే మొదలైంది. వచ్చే మూడేళ్లను దృష్టిలో పెట్టుకుని యాజమాన్యం ఈ ఏడాది ఐపీఎల్‌ వేలంలో ఆటగాళ్లను కొనుగోలు చేసిందని, అందుకే క్రిస్ గేల్‌ను బెంగళూరు యాజమాన్యం తీసుకోలేదని కెప్టెన్ విరాట్ కోహ్లీ వెల్లడించిన విషయం తెలిసిందే.