సాయంత్ర సమయంలో పింక్ బాల్‌తో ఇబ్బందులు: డే/నైట్ టెస్టుపై పుజారా

ఎస్‌జీ పింక్ బాల్‌తో ఇప్పటివరకు ఆడలేదు

"ఎర్రబంతితో ఆడిన తీరులోనే పింక్ బాల్ ఉంటుందని నా అభిప్రాయం. ఎస్‌జీ పింక్ బాల్‌తో ఇప్పటివరకు నేను ఆడలేదు. కానీ, ఎస్‌జీ పింక్‌ బంతి సాధారణ బంతిలా ఉంటుదని నాకు అనిపిస్తుంది. బంతుల తయారీలో ఎస్‌జీ మెరుగుపడింది. ఇటీవల దక్షిణాఫ్రికాతో జరిగిన టెస్టు సిరీస్‌లో ఉపయోగించిన బంతిపై ఆటగాళ్లంతా సంతృప్తి చెందారు" అని పుజారా తెలిపాడు.

2016 దులీప్ ట్రోఫీ ఎడిషన్‌లో

2016 దులీప్ ట్రోఫీ ఎడిషన్‌లో కూకబుర్రా పింక్ బాల్‌తో ఆడిన పుజారా(453) పరుగులతో అగ్రస్థానంలో నిలిచాడు. ఇందులో రెండు సెంచరీల కూడా ఉన్నాయి. కాగా, కోల్‌కతా వేదికగా జరిగే డే/నైట్ టెస్టు కోసం బీసీసీఐ ఇప్పటికే 72 ఎస్జీ పింక్ బాల్స్‌ను ఆర్డర్ ఇచ్చిన సంగతి తెలిసిందే. దీనిపై పుజారా తన అనుభవాన్ని పంచుకున్నాడు.

ఆ అనుభవం కచ్చితంగా నాకు సహకరిస్తుంది

"2016/17లో పింక్‌ బంతితో ఆడాను. దీనిని ప్రయోజనంగా పరిగణించలేము. అయితే, ఆ అనుభవం కచ్చితంగా నాకు సహకరిస్తుంది. మీరు పింక్ బాల్‌తో ఆడినప్పుడు, ఏ సమయంలో ఏమి ఆశించాలో... ఏమి ఆశించికూడదో తెలుసు. కాబట్టి ఆ అనుభవం సహాయపడుతుంది" అని పుజారా చెప్పుకొచ్చాడు.

పింక్ బాల్‌తో ఇబ్బందులు తలెత్తుతాయి

"సాయంత్ర సమయంలో పింక్ బాల్‌తో ఇబ్బందులు తలెత్తుతాయి. అయితే, ప్రాక్టీస్ చేస్తే వాటిని అధిగమించవచ్చు. కాబట్టి మ్యాచ్ ఆడటానికి ముందు ప్రాక్టీస్ సెషన్లు అవసరం. అవకాశం వచ్చినప్పుడల్లా పింక్ బాల్‌తో ప్రాక్టీస్ చేస్తాను" అని అన్నాడు. ఇక, భారత్‌లో డే/నైట్ టెస్టు మ్యాచ్ నిర్వహించడం మంచి చర్యగా అభివర్ణించాడు.