ఐదేళ్ల తర్వాత వన్డే సిరీస్‌ నెగ్గిన విండీస్‌.. అఫ్గాన్‌కు వరుసగా 11 వన్డే ఓటమి!!

పూరన్‌ విజృంభణ:

రెండో వన్డేలో తొలుత బ్యాటింగ్‌ చేసిన విండీస్‌ నిర్ణీత 50 ఓవర్లలో తొమ్మిది వికెట్ల నష్టానికి 247 పరుగులు చేసింది. వికెట్ కీపర్ నికోలస్‌ పూరన్‌ (67; 50 బంతుల్లో 7x4, 3x6), ఓపెనర్ ఎవిన్‌ లూయిస్‌ (54; 75 బంతుల్లో 6x4, 1x6) అర్ధ సెంచరీలు చేశారు. షై హోప్ (43), షిమ్రాన్ హెట్మియర్ (34) రాణించారు. అఫ్గాన్‌ బౌలర్ నవీన్‌ అల్‌ హక్‌ (3/60) మూడు వికెట్లు పడగొట్టాడు.

చెలరేగిన విండీస్‌ బౌలర్లు:

అనంతరం లక్ష్య ఛేదనకు దిగిన అఫ్గాన్‌ 45.4 ఓవర్లలో 200 పరుగులకు ఆలౌటైంది. నజీబుల్లా జద్రాన్‌ (56; 66 బంతుల్లో 7x4, 1x6) అర్ధ సెంచరీతో రాణించినా.. మిగతా బ్యాట్స్‌మెన్‌ భారీ పరుగులు చేయడంలో విఫలమయ్యారు. హజ్రతుల్లా జజాయ్ (23), రహమత్ షా (33), మహ్మద్ నబీ (32) పరుగులు చేశారు. విండీస్‌ బౌలర్లలో కాట్రెల్‌, రోస్టన్‌ ఛేజ్‌, వాల్ష్‌ చెరో మూడు వికెట్లు తీసి విజయంలో కీలక పాత్ర పోషించారు.

ఐదేళ్ల తర్వాత వన్డే సిరీస్‌:

ఈ విజయంతో మూడు వన్డేల సిరీస్‌ను 2-0తో విండీస్‌ ఒక మ్యాచ్‌ మిగిలుండగానే గెలుపొందింది. దీంతో ఐదేళ్ల తర్వాత విండీస్‌ వన్డే సిరీస్‌ను తమ ఖాతాలో వేసుకుంది. చివరిసారిగా విండీస్‌ 2014 ఆగస్టులో బంగ్లాను ఓడించి సిరీస్ నెగ్గింది. మరోవైపు అఫ్గాన్‌కు ఇది వరుసగా 11 వన్డే ఓటమి. ప్రపంచకప్ నుండి అఫ్గాన్‌ పరాజయాల పరంపర కొనసాగుతోంది.

సెలబ్రేట్‌ చేసుకోవాలనుంది:

విండీస్‌ కెప్టెన్‌ పొలార్డ్‌ మాట్లాడుతూ... 'సిరీస్ విజయం చాలా సంతోషంగా ఉంది. ఆటగాళ్లతో కలిసి సెలబ్రేట్‌ చేసుకోవాలనుంది. చాలా కాలం తర్వాత సిరీస్ విజయం కాబట్టి గెలుపును ఆస్వాదించాల్సిన అవసరముంది. ఓపెనర్లు మంచి పునాది వేశారు. పూరన్ బాగా బ్యాటింగ్ చేసాడు. హెట్మియర్ పరిస్థితికి అనుగుణంగా ఆడాడు. బౌలర్లు తమ పని పూర్తిచేశారు. ఫైనల్‌ మ్యాచ్‌ గెలవడానికి ప్రయత్నిస్తాం' అని అన్నాడు.