వరల్డ్ టీ20: పాక్‌పై భారత్ విజయం, మిథాలీపై ట్విట్టర్‌లో ప్రశంసల జోరు

గుయానా: కరేబియన్ దీవుల్లో జరుగుతున్న మహిళల వరల్డ్ టీ20లో హర్మన్ ప్రీత్ కౌర్ నాయకత్వంలోని టీమిండియా అద్భుత ప్రదర్శన చేస్తోంది. టోర్నీలో భాగంగా తొలి మ్యాచ్‌లో న్యూజిలాండ్‌పై విజయం సాధించిన భారత మహిళల జట్టు ఆదివారం చిరకాల ప్రత్యర్ధి పాకిస్థాన్‌పై అలవోక విజయాన్ని నమోదు చేసింది.

గుయానా వేదికగా ఆదివారం పాకిస్థాన్‌తో జరిగిన మ్యాచ్‌లో ఓపెనర్ మిథాలీ రాజ్‌ హాఫ్ సెంచరీతో రాణించడంతో టీమిండియా ఏడు వికెట్ల తేడాతో విజయం సాధించింది. టాస్‌ ఓడి మొదట బ్యాటింగ్‌ చేసిన పాక్‌ 20 ఓవర్లలో 7 వికెట్లకు 133 పరుగులే చేసింది. పాక్ నిర్దేశించిన 134 పరుగుల లక్ష్యాన్ని భారత్ మరో ఓవర్ మిగిలుండగానే 3 వికెట్లు కోల్పోయి అందుకుంది.

భారత మహిళల జట్టు 19 ఓవర్లలో 3 వికెట్లు మాత్రమే కోల్పోయి లక్ష్యాన్ని ఛేదించింది. పాక్‌కు పది పరుగుల పెనాల్టీ పడటంతో లక్ష్యం మరింత చిన్నదిగా మారింది. హాఫ్ సెంచరీతో జట్టును గెలిపించిన మిథాలీకి ప్లేయర్ ఆఫ్ ద మ్యాచ్ దక్కింది. ఈ మ్యాచ్‌లో భారత జట్టు ప్రదర్శనపై ట్విట్టర్‌లో ప్రశంసల వర్షం కురుస్తోంది.

టోర్నీలో భాగంగా బుధవారం జరగనున్న తన తర్వాతి మ్యాచ్‌లో భారత మహిళల జట్టు ఐర్లాండ్‌తో తలపడనుంది.