Asian Games 2026: ఇవి పతకాలు కాదు.. భారత శక్తికి ప్రతీకలు: ప్రధాని మోదీ

By Uppala Shivaprasad

Published: Thursday, October 15, 2026, 19:41 [IST]

ఆసియా గేమ్స్ 2026లో పతకాలు సాధించిన అథ్లెట్లపై భారత ప్రధాని నరేంద్ర మోదీ ప్రశంసల జల్లు కురిపించారు. వారు సాధించిన ఈ పతకాలు కేవలం అంకెలకు మాత్రమే పరిమితం కాదని, క్రీడా రంగంలో భారత శక్తికి ప్రతీకలని తెలిపారు. ఆసియా క్రీడల్లో పతకాలు సాధించిన అథ్లెట్లను గురువారం ఢిల్లీలోని మేజర్ ధ్యాన్‌చంద్ స్టేడియంలో ప్రధాని మోదీ సన్మానించారు.

ఫుల్‌టాస్‌లు వేసి పిచ్‌ను అంటే ఎలా? భారత బౌలర్లపై గవాస్కర్ ఫైర్!

ఈ సందర్భంగా మాట్లాడుతూ.. అథ్లెట్లను ప్రత్యేకంగా అభినందించారు. వారు సాధించిన విజయాలు దేశంలో 140 కోట్ల మంది ప్రజలందరివని మోదీ స్పష్టం చేశారు. 'మన అథ్లెట్లు సాధించిన ఈ పతకాలు కేవలం అంకెలు మాత్రమే కాదు. ఇవి ఒక నూతన భారత క్రీడా శక్తికి ప్రతీక. విశ్వ వేదికలపై మన దేశ త్రివర్ణ పతాకాన్ని సగర్వంగా ఎగరవేయడమే అత్యున్నత విజయం. ఆసియా గేమ్స్‌లో మహిళా అథ్లెట్లు అద్భుత ప్రదర్శన కనబర్చారు.

PM Narendra Modi Felicitates Asian Games 2026 Medal-Winners Says They Made 140 Crore Indians Proud

మన మహిళా సోదరిమణులు ఏకంగా 11 స్వర్ణాలతో కలిపి మొత్తం 38 పతకాలను సాధించడం గొప్ప విషయం. విజేతగా నిలిచిన క్రికెట్, హాకీ టీమ్స్‌తో పాటు ఐదు స్వర్ణ పతకాలు సాధించిన ఆర్చరీ క్రీడాకారులకు ప్రత్యేక అభినందనలు. దేశ క్రీడా చరిత్రలో సరికొత్త అధ్యాయాన్ని లిఖించిన ఈ విజేతలు రాబోయే రోజుల్లో అంతర్జాతీయ వేదికలపై మరింతగా రాణించి దేశ కీర్తిని విశ్వవ్యాప్తం చేయాలి.'అని ప్రధాని మోదీ ఆకాంక్షించారు.

ఈ సందర్భంగా యువ అథ్లెట్లు ప్రధానికి తమ సంతకం చేసిన జెర్సీలు అందజేయగా.. 17 ఏళ్ల ఆర్చరీ ప్లేయర్ కుంకుమ్ మోహోద్ విల్లును జ్ఞాపికగా బహుకరించారు. జపాన్ వేదికగా జరిగిన ఆసియా గేమ్స్ 2026 టోర్నీలో భారత్ 21 స్వర్ణాలతో సహా మొత్తం 85 పతకాలు సాధించిన సంగతి తెలిసిందే.