అందుకే భువనేశ్వర్ కుమార్‌ను పక్కన పెట్టాం: శ్రేయస్ అయ్యర్

ఐదు టీ20ల సిరీస్‌లో భాగంగా న్యూజిలాండ్‌‌తో జరుగుతున్న నాలుగో మ్యాచ్‌లోనూ టీమిండియా టాస్ గెలిచి బౌలింగ్ ఎంచుకుంది. పిచ్ కండిషన్స్ నేపథ్యంలోనే ఈ నిర్ణయం తీసుకున్నామని టీమిండియా టీ20 కెప్టెన్ శ్రేయస్ అయ్యర్ అన్నాడు. తుది జట్టులో రెండు మార్పులు చేశామని చెప్పిన అయ్యర్.. వైభవ్ స్థానంలో ఇషాన్ కిషన్, భువనేశ్వర్ కుమార్ ప్లేస్‌లో మయాంక్ యాదవ్ ఆడుతున్నట్లు తెలిపాడు. టీమ్ కాంబినేషన్‌లో భాగంగానే ఈ నిర్ణయం తీసుకున్నామని చెప్పాడు.

IPL 2027: ముంబై ఇండియన్స్‌లో మార్పులు.. తెలుగోడికి కీలక పదవి!

క్లీన్ స్వీప్ మా లక్ష్యం..

'మేం ముందుగా బౌలింగ్ చేస్తాం. మా ప్రణాళికలను కొనసాగిస్తాం. గత మ్యాచ్‌లో మా జట్టు అద్భుత ప్రదర్శన కనబర్చింది. తొలి బంతి నుంచే మా ప్లేయర్లు సత్తా చాటారు. ముఖ్యంగా అక్కడి కండిషన్స్‌కు తగ్గట్లు ఆడటం నన్ను బాగా ఆకట్టుకుంది. ఏ బంతి వేసినా బౌండరీలు వస్తుండటంతోనే యార్కర్లతో కట్టడి చేశాం. న్యూజిలాండ్‌లో మైదానాలు విభిన్నంగా ఉంటాయి. దానికి తోడు ఇక్కడి చల్లటి గాలి మమ్మల్ని వెంటాడుతోంది.

ఇక్కడి వాతావరణం మరీ చల్లగా ఉంది. అయితే ఎలాంటి పరిస్థితుల్లోనైనా మెరుగైన ప్రదర్శన చేయడమే లక్ష్యంగా పెట్టుకున్నాం. సిరీస్ గెలిచినంత మాత్రాన మా పని అయిపోలేదు. క్లీన్ స్వీప్ చేయడమే మా లక్ష్యం. గత ఫలితాలు ఎలా ఉన్నా సరే.. మైదానంలో దూకుడుగా ఆడటమే ముఖ్యం. జట్టులోని మా కుర్రాళ్లకు కూడా ఇదే చెప్పాం. మా ఆటగాళ్లంతా ఉత్సాహంగా ఉన్నారు. ఈ పిచ్ ఎలా ఉంటుందో చెప్పలేం. పిచ్‌పై మంచి గడ్డి ఉంది కాబట్టి బౌన్స్, స్వింగ్ ఉంటుందని ఆశిస్తున్నాం. తుది జట్టులో రెండు మార్పులు చేశాం. వైభవ్ స్థానంలో ఇషాన్.. భువనేశ్వర్ కుమార్ ప్లేస్‌లో మయాంక్ యాదవ్ జట్టులోకి వచ్చారు.'అని శ్రేయస్ అయ్యర్ చెప్పుకొచ్చాడు. ఈ సిరీస్‌లో వరుసగా నాలుగు మ్యాచ్‌ల్లో అయ్యర్ టాస్ గెలవడం గమనార్హం.

పవర్ ప్లేలోనే కట్టడి చేయాలి..

మరోవైపు ఈ మ్యాచ్ గెలిచేందుకు కావాల్సిన ప్రణాళికలను సిద్దం చేసుకున్నామని న్యూజిలాండ్ కెప్టెన్ మిచెల్ సాంట్నర్ తెలిపాడు. గాలి సవాల్‌గా మారనుందని, తుది జట్టులో ఒక మార్పు చేశామని వెల్లడించాడు. కైల్ జెమీసన్ స్థానంలో నాథన్ స్మిత్ జట్టులోకి వచ్చాడని చెప్పాడు. 'ఈ రోజు కొత్త మైదానం, కొత్త పిచ్‌పై మంచి క్రికెట్ ఆడేందుకు ప్రయత్నిస్తాం. పిచ్‌పై గడ్డి ఉంది కాబట్టి బౌలర్లకు సహకారం లభించవచ్చు. ఇక్కడ క్రీజులో కుదురుకుంటే భారీగా పరుగులు చేయవచ్చు. మా బ్యాటర్లు బాగా ఆడుతున్నారు. కానీ బౌలర్లే వికెట్లు తీయాలి. పవర్ ప్లేను దాటడం చాలా ముఖ్యం. ఫీల్డింగ్‌ తప్పిదాలను కూడా సవరించుకోవాలి.

విపరీతమైన గాలులతో క్యాచ్‌లు పట్టడం కష్టమే. కానీ క్యాచ్‌లు పడితేనే మ్యాచ్‌లు గెలవగలం. భారత బ్యాటర్లు పవర్ ప్లేలో చాలా దూకుడుగా ఆడుతున్నారు. ఇషాన్ కిషన్ రాకతో వాళ్ల బ్యాటింగ్ మరింత బలంగా మారింది. పవర్‌ప్లేలోనే వారిని కట్టడి చేయాలి. మిడిల్ ఓవర్లలో పరుగులు నియంత్రించాలి. మా జట్టులో ఒక మార్పు చేశాం. కైల్ జెమీసన్ స్థానంలో నాథన్ స్మిత్ ఆడుతున్నాడు.'అని మిచెల్ సాంట్నర్ చెప్పుకొచ్చాడు.

Also Read

టీమిండియాలో అతను మరో బుమ్రా: హనుమ విహారి

తుది జట్లు:

న్యూజిలాండ్: ఫిన్ అలెన్, టీమ్ సీఫెర్ట్, డారిల్ మిచెల్, గ్లేన్ ఫిలిప్స్, బెవాన్ జాకోబ్స్, మైఖేల్ బ్రేస్‌వెల్, మిచెల్ సాంట్నర్, నాథన్ స్మిత్, ఆడమ్ మిల్నే, జాకోబ్ డఫీ, మాథ్యూ ఫిషర్.

భారత్: అభిషేక్ శర్, సంజూ శాంసన్, ఇషాన్ కిషన్, శ్రేయస్ అయ్యర్(కెప్టెన్), తిలక్ వర్మ, నితీష్ కుమార్ రెడ్డి,నమన్ ధీర్, అక్షర్ పటేల్, అర్ష్‌దీప్ సింగ్, మయాంక్ యాదవ్, ప్రిన్స్ యాదవ్.