మామ జడలు విప్పిన ఈ మ్యాచ్ గుర్తుందా! (వీడియో)

సరిగ్గా 19 ఏళ్ల క్రితం ఇదే రోజు(2007 సెప్టెంబర్ 24) భారత క్రికెట్ జట్టు అదిరిపోయే విజయాన్ని అందుకుంది. చిరకాల ప్రత్యర్థి పాకిస్థాన్‌ను చిత్తు చేసి విశ్వవిజేతగా నిలిచింది. అరంగేట్ర టీ20 ప్రపంచకప్ 2007లో ఏ మాత్రం అంచనాలు లేకుండా బరిలోకి దిగిన భారత్.. అద్వితీయమైన ప్రదర్శనతో తొలి టీ20 ప్రపంచకప్‌ను ముద్దాడింది. మహేంద్ర సింగ్ ధోనీ సారథ్యంలో భారత్ అదరగొట్టింది. దాయాదీ పాకిస్థాన్‌తో ఉత్కంఠగా సాగిన ఫైనల్లో ధోనీ సేన 5 పరుగుల తేడాతో గెలుపొందింది.

అది నా కోచింగ్ కెరీర్‌లోనే కఠిన నిర్ణయం.. ఆ రాత్రి నిద్ర కూడా పట్టలేదు: గంభీర్

ఈ మ్యాచ్‌లో ముందుగా బ్యాటింగ్ చేసిన భారత్ నిర్ణీత 20 ఓవర్లలో 5 వికెట్లకు 157 పరుగులే చేసింది. ప్రస్తుత టీమిండియా హెడ్ కోచ్, అప్పటి ఓపెనర్ గౌతమ్ గంభీర్(54 బంతుల్లో 8 ఫోర్లు, 2 సిక్స్‌లతో 75) హాఫ్ సెంచరీతో రాణించగా.. రోహిత్ శర్మ(16 బంతుల్లో 2 ఫోర్లు, సిక్స్‌తో 30 నాటౌట్) దూకుడుగా ఆడాడు. పాకిస్థాన్ బౌలర్లలో ఉమర్ గుల్(3/28) మూడు వికెట్లు తీయగా.. మహమ్మద్ ఆసిఫ్, సోహైల్ తన్వీర్ తలో వికెట్ తీసారు.

ఐకానిక్ క్యాచ్..

అనంతరం పాకిస్థాన్ 19.3 ఓవర్లలో 152 పరుగులు చేసి ఓటమిపాలైంది. ఇమ్రాన్ నజీర్(14 బంతుల్లో 4 ఫోర్లు, 2 సిక్స్‌లతో 33), మిస్బా ఉల్ హక్(38 బంతుల్లో 4 సిక్స్‌లతో 43) రాణించినా ఫలితం లేకపోయింది. భారత బౌలర్లలో ఆర్‌పీ సింగ్(3/26), ఇర్ఫాన్ పఠాన్(3/16) మూడేసి వికెట్లు తీయగా.. జోగిందర్ శర్మ(2/20) రెండు వికెట్లు పడగొట్టాడు. శ్రీశాంత్ ఒక వికెట్ తీసాడు. జోగిందర్ శర్మ వేసిన ఆఖరి ఓవర్‌లో మిస్బా ఉల్ హక్ ఇచ్చిన క్యాచ్‌ను శ్రీశాంత్ అందుకున్నాడు. ఈ క్యాచ్‌ భారత క్రికెట్‌ చరిత్రలోనే ఐకాన్‌గా నిలిచింది.

అంచనాలు లేకుండా ..

ఈ విజయం భారత క్రికెట్ చరిత్రనే మార్చేసింది. 1983 ప్రపంచకప్ తర్వాత భారత్ గెలిచిన రెండో ప్రపంచకప్ ఇదే కావడం గమనార్హం. వాస్తవానికి టీ20 ఫార్మాట్‌ను బీసీసీఐ వ్యతిరేకించింది. దాంతోనే ఈ మెగా టోర్నీకి సచిన్, ద్రవిడ్ వంటి సీనియర్ ఆటగాళ్లను దూరంగా ఉంచి.. యువ ఆటగాళ్లను పంపించింది. మహేంద్ర సింగ్ ధోనీని సారథిగా ఎంపిక చేసింది. ఈ కుర్రాళ్ల జట్టును చూసి భారత్ లీగ్ దశలోనే వెనుదిరుగుతుందని అంతా అనుకున్నారు. కానీ ధోనీ సేన అనూహ్య విజయంతో అందర్నీ ఆకట్టుకుంది.

Also Read

Asian Games 2026: మూడో రోజు ఒక స్వర్ణం.. మరో రెండు పతకాలు ఖాయం!

అయితే ఈ ప్రపంచకప్ మ్యాచ్‌లను చాలా మంది ప్రత్యక్ష ప్రసారం చూడలేకపోయారు. అప్పుడు ఇప్పటిలా ఓటీటీ.. ఛానెల్స్ సౌకర్యం లేకపోవడంతో రేడియోలో ఈ మ్యాచ్ కామెంట్రీని మెజార్టీ అభిమానులు విన్నారు. ఓవైపు వినాయక నిమజ్జనం.. మరోవైపు ఈ విజయంతో అభిమానులు ఊగిపోయారు. నైంటీస్ కిడ్స్‌కు అయితే ఈ మ్యాచ్ ఓ మధురానుభూతి. ఈ మ్యాచ్ మీకు గుర్తుందా..?