IND vs AFG: అఫ్గాన్‌పై భారత్ ఘన విజయం.. సిరీస్ క్లీన్ స్వీప్!

అఫ్గానిస్థాన్‌తో మూడు టీ20ల సిరీస్‌ను టీమిండియా క్లీన్ స్వీప్ చేసింది. గురువారం ఢిల్లీ వేదికగా జరిగిన ఆఖరి టీ20లోనూ సమష్టిగా రాణించిన భారత్ 127 పరుగుల భారీ తేడాతో ఆతిథ్య అఫ్గానిస్థాన్‌ను చిత్తు చేసింది. వరుసగా మూడు మ్యాచ్‌ల్లోనూ భారత్ ఏకపక్ష విజయాలు నమోదు చేయగా.. అఫ్గాన్ కనీస పోటీ ఇవ్వలేకపోయింది.

ఈ మ్యాచ్‌లో ముందుగా బ్యాటింగ్ చేసిన భారత్ నిర్ణీత 20 ఓవర్లలో 7 వికెట్లకు 221 పరుగులు చేసింది. అభిషేక్ శర్మ(34 బంతుల్లో 9 ఫోర్లు, 11 సిక్స్‌లతో 108) భారీ శతకంతో చెలరేగగా.. సంజూ శాంసన్(35 బంతుల్లో 2 ఫోర్లు, 4 సిక్స్‌లతో 50) హాఫ్ సెంచరీతో సత్తా చాటాడు. అఫ్గాన్ బౌలర్లలో అజ్మతుల్లా ఒమర్జాయ్(2/37) రెండేసి వికెట్లు తీయగా.. రషీద్ ఖాన్, అబ్దుల్లా అహ్మద్‌జాయ్ చెరో వికెట్ పడగొట్టారు.

అనంతరం అఫ్గానిస్థాన్ 14.1 ఓవర్లలో 94 పరుగులకే ఆలౌటై ఘోర పరాజయాన్ని మూటగట్టుకుంది. కెప్టెన్ ఇబ్రహీం జడ్రాన్(16 బంతుల్లో 4 ఫోర్లు, సిక్స్‌తో 25) మినహా అంతా విఫలమయ్యారు. భారత బౌలర్లలో నితీష్ కుమార్ రెడ్డి(3/25), రవి బిష్ణోయ్(3/26) మూడేసి వికెట్లతో అఫ్గాన్ పతనాన్ని శాసించారు. జస్‌ప్రీత్ బుమ్రా, యశ్ ఠాకూర్‌కు చెరో వికెట్ దక్కింది. విధ్వంసకర శతకంతో చెలరేగిన అభిషేక్ శర్మకు ప్లేయర్ ఆఫ్ ది మ్యాచ్ అవార్డ్ దక్కింది.

IND vs AFG: వైభవ్‌కు మళ్లీ నిరాశే.. నోరు మెదపని శ్రేయస్ అయ్యర్ !

అభిషేక్ శర్మ ఊచకోత..

ఈ మ్యాచ్‌లో టాస్ ఓడి బ్యాటింగ్‌కు దిగిన భారత్‌కు అభిషేక్ శర్మ అదిరిపోయే స్కోర్ అందించాడు. విధ్వంసకర బ్యాటింగ్‌తో పరుగుల సునామీ సృష్టించాడు. ఆకాశమే హద్దుగా సిక్సర్లు బాదిన అభిషేక్ శర్మ.. బౌలర్లను ఊచకోత కోసాడు. ఈ క్రమంలో అంతర్జాతీయ టీ20ల్లోనే అత్యంత వేగవంతమైన సెంచరీ నమోదు చేశాడు.

కేవలం 30 బంతుల్లోనే 10 సిక్స్‌లు, 9 ఫోర్ల సాయంతో సెంచరీ పూర్తి చేసుకున్నాడు. తొలి బంతి నుంచే దూకుడుగా ఆడిన అభిషేక్ శర్మ.. 16 బంతుల్లోనే హాఫ్ సెంచరీ సాధించాడు. ఆ తర్వాత మరింత ధాటిగా ఆడి 14 బంతుల వ్యవధిలోనే సెంచరీ మార్క్ అందుకున్నాడు. ఇందులో 102 రన్స్ కేవలం బౌండరీల ద్వారానే వచ్చాయి. సంజూ శాంసన్‌తో కలిసి 9.5 ఓవర్లలోనే తొలి వికెట్‌కు 142 పరుగుల భారీ భాగస్వామ్యాన్ని అందించాడు.

తడబడిన మిడిలార్డర్..

అభిషేక్ ఔటైన అనంతరం భారత్ పరుగుల వేగం తగ్గింది. క్రీజులోకి వచ్చిన తిలక్ వర్మ(2) నిరాశపర్చగా.. హాఫ్ సెంచరీ అనంతరం సంజూ శాంసన్(50) ఔటయ్యాడు. శివమ్ దూబే(14), ఇషాన్ కిషన్(10), నితీష్ కుమార్ రెడ్డి(1) పెవిలియన్ చేరగా.. శ్రేయస్ అయ్యర్(29) నిదానంగానే ఆడాడు. దాంతో భారీ స్కోర్ చేస్తుందనుకున్న భారత్ 221 పరుగులకే పరిమితమైంది.

Also Read

IND vs AFG: అభిషేక్ శర్మ ఊచకోత.. బౌండరీలతోనే సెంచరీ!

రఫ్ఫాడించిన నితీష్ రెడ్డి..

భారీ లక్ష్య ఛేదనలో అఫ్గాన్ చేతులెత్తేసింది. అక్షర్ పటేల్, యశ్ ఠాకూర్, బుమ్రా అఫ్గాన్ టాపార్డర్‌ను పెవిలియన్ చేర్చగా.. నితీష్ కుమార్ రెడ్డి, రవి బిష్ణోయ్ మిడిలార్డర్ పని పట్టారు. దాంతో ఆ జట్టు కనీస పోటీ ఇవ్వలేకపోయింది. కెప్టెన్ ఇబ్రహీం జడ్రాన్ మినహా ఎవరూ చెప్పుకోదగ్గ స్కోర్ చేయలేదు.