IPL 2027: ఇంపాక్ట్ ప్లేయర్ రూల్ కొనసాగించాల్సిందే: ఆర్‌సీబీ కోచ్

వివాదాస్పదంగా మారిన ఇంపాక్ట్ ప్లేయర్ రూల్‌ను కొనసాగించాల్సిందేనని ఆర్‌సీబీ బ్యాటింగ్ కోచ్, మెంటార్ దినేశ్ కార్తీక్ అన్నాడు. ఈ రూల్ కారణంగా ఆల్‌రౌండర్లకు నష్టం జరుగుతుందనే వాదనను అంగీకరించిన కార్తీక్.. ఐపీఎల్ 2027 సీజన్ ముగిసే వరకు కొనసాగించాల్సిందేనని అభిప్రాయపడ్డాడు.

మెగా వేలం తర్వాత తీసుకొచ్చిన ఈ నిబంధనను సైకిల్ పూర్తికాకుండానే తొలగించడం సరికాదన్నాడు. తాజాగా ఓ ఇంటర్వూలో ఈ రూల్‌పై ప్రత్యేకంగా మాట్లాడిన దినేశ్ కార్తీక్.. తదుపరి మెగా వేలం వరకు ఎలాంటి మార్పులు చేయవద్దని సూచించాడు. ప్రతీ జట్టు ఈ రూల్‌ను దృష్టిలో పెట్టుకొని ఆటగాళ్లను కొనుగోలు చేసిందనే విషయాన్ని గుర్తు చేశాడు.

అందుకే ఆర్‌సీబీ అంటే అభిమానులకు అంత ప్రేమ: క్రికెట్ బ్యూటీ

హఠాత్తుగా రూల్ తీసేయడం సరికాదు..

'ఐపీఎల్ 2025 మెగా వేలం తర్వాత జట్లు ఇంపాక్ట్ ప్లేయర్ రూల్‌ను దృష్టిలో ఉంచుకునే తమ కాంబినేషన్‌ను ఎంచుకున్నాయి. ఇప్పుడు హఠాత్తుగా ఈ రూల్‌ను తొలగిస్తే.. కొన్ని జట్లకు అన్యాయం జరుగుతుంది. 12 మంది ఆటగాళ్లతో వ్యూహాలు రచించిన జట్ల కన్నా.. 11 మందితో బలంగా ఉండే జట్లకు ఈ మార్పు ప్రయోజనం చేకూరుస్తుంది. అందుకే ఈ సైకిల్ ముగిసే వరకు ఈ రూల్‌ను కొనసాగించడమే సరైనది.

ఈ రూల్ వచ్చిన కొత్తలో హై-స్కోరింగ్ మ్యాచ్‌లు, హోరాహోరీ ఛేజింగ్‌లతో ఆసక్తికరంగా అనిపించింది. కానీ గత సీజన్‌లో ఆ జోరు కనిపించలేదు. చాలా మ్యాచ్‌లు ఏకపక్షంగా ముగిసాయి. ఈ రూల్ దాని ప్రాభావాన్ని కోల్పోయింది. ముఖ్యంగా ఈ రూల్ కారణంగా భారత జట్టుకు నాణ్యమైన ఆల్ రౌండర్లు లభించే అవకాశాలు లేకుండా పోయాయి.

Also Read

కోహ్లీని తప్పించి నన్ను ఆర్‌సీబీ కెప్టెన్ చేయాలనుకున్నారు: పార్దీవ్ పటేల్

ఫ్రాంచైజీల అభిప్రాయం కోరిన బీసీసీఐ

వాస్తవానికి ఇంపాక్ట్ ప్లేయర్ రూల్‌ను కూడా సైకిల్ మధ్యలోనే తీసుకొచ్చారు. ఇప్పుడు దానిని మళ్లీ మధ్యలోనే తీసేయడం సరి కాదు. అందుకే 2027 వరకు దీనిని కొనసాగించి, ఆ తర్వాత ఈ రూల్‌పై సమీక్ష జరపడం ఉత్తమం. ఏదైనా కొత్త నిబంధనను సైకిల్ ఆరంభంలోనే తీసుకురావాలి.'అని దినేశ్ కార్తీక్ చెప్పుకొచ్చాడు.

భారత క్రికెట్ దిగ్గజాలు రోహిత్ శర్మ, విరాట్ కోహ్లీతో పాటు అనేకమంది ఈ ఇంపాక్ట్ రూల్‌ను వ్యతిరేకించిన సంగతి తెలిసిందే. దాంతో ఈ రూల్‌పై బీసీసీఐ సమీక్ష చేపట్టింది. 10 ఫ్రాంచైజీల అభిప్రాయాలను కోరింది. ఐపీఎల్ 2027 మినీ వేలానికి ముందు ఈ రూల్‌ కొనసాగించడంపై స్పష్టత రానుంది.