IND vs WI: ఆ ఒక్క తప్పిదమే మా ఓటమిని శాసించింది: వెస్టిండీస్ కెప్టెన్

బౌలింగ్ వైఫల్యమే తమ ఓటమిని శాసించిందని వెస్టిండీస్ కెప్టెన్ షై హోప్ అన్నాడు. భారత ఓపెనింగ్ జోడీని విడదీయడంలో తమ బౌలర్లు విఫలమయ్యారని తెలిపాడు. ఇంకాస్త కట్టుదిట్టంగా బౌలింగ్ చేసి భారత ఓపెనర్లను ఔట్ చేసి ఉంటే ఫలితం మరోలా ఉండేదని అభిప్రాయపడ్డాడు.

మూడు వన్డేల సిరీస్‌లో భాగంగా గౌహతి వేదికగా బుధవారం జరిగిన రెండో మ్యాచ్‌లో సమష్టిగా రాణించిన భారత్ 8 వికెట్ల తేడాతో వెస్టిండీస్‌ను చిత్తు చేసింది. 406 పరుగుల భారీ లక్ష్యాన్ని భారత్ 43.3 ఓవర్లలోనే ఛేదించింది. 2 వికెట్లు మాత్రమే కోల్పోయి 407 పరుగులు చేసి 39 బంతులు మిగిలి ఉండగానే విజయాన్ని అందుకుంది.

IND vs WI: శుభ్‌మన్ గిల్ ద్విశతకం.. భారత్ ఘన విజయం!

ఆ ఇద్దరే మా ఓటమికి కారణం..

ఈ మ్యాచ్ అనంతరం మాట్లాడిన షై హోప్..ఈ మ్యాచ్‌ ఓడినా సానుకూలంశాలు చాలా ఉన్నాయని చెప్పాడు. 'నిజానికి ఈ మ్యాచ్‌లో మేం ఓడినా.. సానుకూలంశాలు చాలా ఉన్నాయి. ముఖ్యంగా మా బ్యాటింగ్ విభాగం అదరగొట్టింది. వరుసగా రెండు మ్యాచ్‌ల్లోనూ మేం పోరాడే లక్ష్యాలను నమోదు చేశాం. ఈ సిరీస్‌లో మేం సాధించిన పురోగతి ఇదే. కానీ ప్రపంచంలోనే అత్యుత్తమ బ్యాటర్లతో పోటీ పడుతున్నప్పుడు పొరపాట్లకు ఏ మాత్రం అవకాశం ఇవ్వొద్దు.

భారత్ ఓపెనర్లు అలాంటి అదిరిపోయే ఆరంభం ఇస్తే మ్యాచ్ గెలవడం చాలా కష్టం. ఈ గెలుపు క్రెడిట్ పూర్తిగా వారిదే. వాళ్లు నిజంగా చాలా బాగా ఆడారు. మా బౌలింగ్ ఇంకాస్త కట్టుదిట్టంగా ఉండి ఉంటే 400 పరుగులను కాపాడుకునేవాళ్లం. గత మ్యాచ్ కంటే ఈ మ్యాచ్‌లో మా బ్యాటింగ్ చాలా బాగా ఉంది. ముఖ్యంగా భారత స్పిన్నర్లను సమర్థవంతంగా ఎదుర్కొన్నాం. మ్యాచ్ పరిస్థితుల నేపథ్యంలోనే విటెలా లావ్స్‌తో ఆలస్యంగా బౌలింగ్ చేయించాను. అతనికి ఇక్కడి పరిస్థితులు కొత్త. కానీ అతను బాగా బౌలింగ్ చేశాడు. నేర్చుకోవాల్సింది ఇంకా చాలా ఉంది. కానీ మున్ముందు అతను మరింత బలంగా పుంజుకుంటాడనే నమ్మకం ఉంది.'అని షై హోప్ చెప్పుకొచ్చాడు.

Also Read

అది సీక్రేట్ ఎవరికీ చెప్పను.. మ్యాచ్ మలుపు తిరిగిందక్కడే: రోహిత్ శర్మ

భారత్ రికార్డ్ విజయం..

ఈ మ్యాచ్‌లో ముందుగా బ్యాటింగ్ చేసిన వెస్టిండీస్ నిర్ణీత 50 ఓవర్లలో 7 వికెట్లకు 405 పరుగుల భారీ స్కోర్ చేసింది. జాన్ క్యాంబెల్(68 బంతుల్లో 9 ఫోర్లు, 5 సిక్స్‌లతో 101), కెప్టెన్ షై హోప్(94 బంతుల్లో 8 ఫోర్లు, 3 సిక్స్‌లతో 104), అమీర్ జంగూ(77 బంతుల్లో 13 ఫోర్లు, 3 సిక్స్‌లతో 114) శతకాలతో చెలరేగారు. భారత బౌలర్లలో కుల్దీప్ యాదవ్, గుర్నూర్ బ్రార్, జడేజా రెండేసి వికెట్లు తీయగా.. ప్రసిధ్ కృష్ణ ఒక వికెట్ పడగొట్టాడు. వన్డే క్రికెట్‌ చరిత్రలోనే వెస్టిండీస్‌కు ఇది రికార్డ్ స్కోర్.

అనంతరం భారత్ 44 ఓవర్లలో 2 వికెట్లకు 407 పరుగులు చేసి 39 బంతులు మిగిలి ఉండగానే విజయాన్ని అందుకుంది. శుభ్‌మన్ గిల్(130 బంతుల్లో 25 ఫోర్లు, 8 సిక్స్‌లతో 217 నాటౌట్) అజేయ డబుల్ సెంచరీతో సత్తా చాటగా.. రోహిత్ శర్మ(75 బంతుల్లో 10 ఫోర్లు, 6 సిక్స్‌లతో 101) సెంచరీతో కదం తొక్కాడు. వన్డే క్రికెట్ చరిత్రలోనే ఇది రెండో అత్యధిక పరుగుల ఛేజింగ్‌ కాగా.. భారత్‌కు మాత్రం ఆల్‌టైమ్ రికార్డ్ ఛేజింగ్.