Hong Kong Sixes: పాక్, యూఏఈ చేతిలో ఓడిన భారత్!

హాంగ్ కాంగ్ సిక్సెస్ 2026 టోర్నీలో భారత్‌ వరుసగా రెండు మ్యాచ్‌ల్లో ఓటమిపాలైంది. శుక్రవారం పాకిస్థాన్‌తో జరిగిన మ్యాచ్‌లో 4 వికెట్లతో ఓడిన కృనాల్ పాండ్యా సారథ్యంలోని భారత్.. శనివారం ఉదయం యూఏఈతో జరిగిన మ్యాచ్‌లో 6 వికెట్ల తేడాతో చిత్తయ్యింది. ఈ వరుస పరాజయాలతో గ్రూప్ సీలో అట్టడుగు స్థానంలో నిలిచి టైటిల్ రేసు నుంచి తప్పుకుంది. కన్సోలేషన్ ట్రోఫీ కోసం జరిగే బౌల్ సెమీఫైనల్స్‌ రౌండ్‌లో భారత్ తలపడనుంది.

IND vs NZ: భారత వన్డే జట్టులోకి జమ్మూ సెన్సేషన్!

యూఏఈ చేతిలో చిత్తు..

యూఏఈతో శనివారం జరిగిన మ్యాచ్‌లో ముందుగా బ్యాటింగ్ చేసిన భారత్ నిర్ణీత 6 ఓవర్లలో 94 పరుగులకు ఆలౌటైంది. రాహుల్ త్రిపాఠి(7 బంతుల్లో ఫోర్, 3 సిక్స్‌లతో 24), నటరాజన్(14 బంతుల్లో 3 ఫోర్లు, 4 సిక్స్‌లతో 38) టాప్ స్కోరర్లుగా నిలిచారు. కృనాల్ పాండ్యా(8 బంతుల్లో 2 ఫోర్లు, సిక్స్‌తో 15) పర్వాలేదనిపింగా.. నితీష్ రాణా(6), రాహుల్ తెవాటియా(1), శశాంక్ సింగ్(1) తీవ్రంగా నిరాశపర్చారు. యూఏఈ బౌలర్లలో జాహిద్ అలీ(3/32) మూడు వికెట్లు పడగొట్టాడు.

అనంతరం యూఏఈ 4.2 ఓవర్లలోనే వికెట్ నష్టపోకుండా 97 పరుగులు చేసి సునాయస విజయాన్నందుకుంది. కెప్టెన్ ఖలిద్ షా(14 బంతుల్లో 3 ఫోర్లు, 6 సిక్స్‌లతో 52 నాటౌట్) విధ్వంసకర హాఫ్ సెంచరీతో రాణించగా.. అన్ష్ టండూన్(12 బంతుల్లో 2 ఫోర్లు, 5 సిక్స్‌లతో 39 నాటౌట్) సత్తా చాటాడు.

పాక్ చేతిలోనూ ఓటమి..

శుక్రవారం జరిగిన మ్యాచ్‌లో ముందుగా బ్యాటింగ్ చేసిన భారత్ 6 ఓవర్లలో 5 వికెట్లకు 88 పరుగులే చేసింది. శశాంక్ సింగ్(11 బంతుల్లో 2 ఫోర్లు, 5 సిక్స్‌లతో 40) ఒక్కడే రాణించగా.. రాహుల్ త్రిపాఠి(9), నితీష్ రాణా(14 బంతుల్లో ఫోర్, 2 సిక్స్‌లతో 19), రాహుల్ తెవాటియా(0), కృనాల్ పాండ్యా(0) తీవ్రంగా నిరాశపర్చారు. టీ నటరాజన్(6 బంతుల్లో 2 ఫోర్లతో 12 నాటౌట్) అజేయంగా నిలిచాడు. పాకిస్థాన్ బౌలర్లలో అబ్దుల్ సమద్(2/10) రెండు వికెట్లు తీయగా.. అహ్మద్ డానియల్, ముమమ్మద్ షెహ్‌జాద్ తలో వికెట్ తీసారు.

Also Read

హాంగ్ కాంగ్ సిక్సెస్ టోర్నీ రూల్స్ ఇవే!

అనంతరం పాకిస్థాన్ 3.5 ఓవర్లలో 2 వికెట్లకు 91 పరుగులు చేసి సునాయస విజయాన్ని అందుకుంది. ఖవాజా నఫే(12 బంతుల్లో 2 ఫోర్లు, 5 సిక్స్‌లతో 41), అబ్బాస్ అఫ్రిది(8 బంతుల్లో ఫోర్, 5 సిక్స్‌లతో 35) దూకుడుగా ఆడారు. భారత బౌలర్లలో శశాంక్ సింగ్, రాహుల్ తేవాటియా తలో వికెట్ తీసారు. భారత జట్టు నిండా ఐపీఎల్ స్టార్లున్నా వరుసగా రెండు మ్యాచ్‌ల్లో ఓడిపోవడాన్ని భారత అభిమానులు జీర్ణించుకోలేకపోతున్నారు.