క్రీజులోకి రాగానే ఇషాన్ కిషన్‌ను నవ్విస్తా: అభిషేక్ శర్మ

టీమిండియా స్టార్ బ్యాటర్ ఇషాన్ కిషన్‌ గురించి విధ్వంసకర ఓపెనర్ అభిషేక్ శర్మ ఆసక్తికర విషయాలు పంచుకున్నాడు. క్రీజులోకి రాగానే ఇషాన్ కిషన్ ఒత్తిడిలో కనిపిస్తాడని, తన జోన్‌లోనే ఉంటాడని చెప్పాడు. అతన్ని రిలాక్స్ చేయడానికి తాను ఓ జోక్ వేసి నవ్విస్తానని తెలిపాడు.

ఐదు టీ20ల సిరీస్‌లో భాగంగా ఇండోర్ వేదికగా జరిగిన నాలుగో మ్యాచ్‌లో టీమిండియా 14 పరుగుల తేడాతో వెస్టిండీస్‌పై గెలుపొందింది. ఈ విజయంతో ఐదు టీ20ల సిరీస్‌లో 2-1తో ఆధిక్యంలో నిలిచింది. మూడో టీ20లో అభిషేక్ శర్మ, ఇషాన్ కిషన్ రెండో వికెట్‌కు 108 పరుగులు జోడించారు.

అదే మా కొంపముంచింది: వెస్టిండీస్ కెప్టెన్ షాయ్ హోప్

ఈ ఇద్దరి అద్భుతమైన భాగస్వామ్యంతో టీమిండియా 223 పరుగుల భారీ లక్ష్యాన్ని నమోదు చేసింది. ఇషాన్ కిషన్, అభిషేక్ శర్మ మధ్య మంచి అనుబంధం ఉంది. ఈ ఇద్దరూ ఐపీఎల్‌లో సన్‌రైజర్స్ హైదరాబాద్‌కు ఆడుతున్న సంగతి తెలిసిందే. ఐపీఎల్‌లో ఎన్నో కీలక భాగస్వామ్యాలు నమోదు చేశారు. మూడో టీ20 అనంతరం తమ అనుబంధం గురించి మాట్లాడిన అభిషేక్ శర్మ.. ఆసక్తికర విషయాలు పంచుకున్నాడు.

ఇషాన్ కిషన్‌ను నవ్విస్తాం..

'ఇషాన్ కిషన్ బ్యాటింగ్‌కి వచ్చినప్పుడు ఒత్తిడిలో కనిపిస్తాడు. ముఖంలో ఏ మాత్రం నవ్వు ఉండదు. తన ఓన్ జోన్‌లో ఉండటానికి ఇష్టపడతాడు. అందుకే నేను తనని నవ్వించి కాస్త రిలాక్స్ చేయడానికి ప్రయత్నిస్తాను. మా ఇద్దరి మధ్య చాలా మంచి బాండింగ్ ఉంది. ఐపీఎల్‌లో కూడా మేం ఎన్నో భాగస్వామ్యాలు నెలకొల్పాం. ఒకరినొకరం బాగా అర్థం చేసుకుంటాం.

ఇషాన్ నంబర్ 3లో బ్యాటింగ్‌కి వచ్చినప్పుడు తొలి రెండు బంతులకు కాస్త ఒత్తిడి అనిపిస్తుంది. ఆ ఒత్తిడిని తీసేసి.. తను ఎప్పటిలాగే సహజంగా ఆడేలా చూడటమే నా లక్ష్యం. గతేడాది కాలంగా తను ఆడుతున్న తీరు చూస్తుంటే.. పిచ్ లేదా కండిషన్స్ గురించి మేం ఎక్కువగా మాట్లాడుకోవాల్సిన అవసరం లేదనిపిస్తుంది. క్రీజ్‌లో ఉన్నప్పుడు ఒకరి బ్యాటింగ్‌ను మరొకరం ఆస్వాదిస్తూ.. ఒకరికొకరు మద్దతుగా ఆడుతుంటాం.'అని అభిషేక్ శర్మ చెప్పుకొచ్చాడు.

Also Read

IND vs WI: అతని బ్యాటింగే గెలిపించింది: శ్రేయస్ అయ్యర్

అభిషేక్ విధ్వంసం..

ఈ మ్యాచ్‌లో ముందుగా బ్యాటింగ్ చేసిన భారత్ నిర్ణీత 20 ఓవర్లలో 223 పరుగులకు ఆలౌటైంది. అభిషేక్ శర్మ(30 బంతుల్లో 6 ఫోర్లు, 5 సిక్స్‌లతో 69) హాఫ్ సెంచరీతో రాణించగా.. ఇషాన్ కిషన్(18 బంతుల్లో 6 ఫోర్లు, సిక్స్‌తో 37), తిలక్ వర్మ(16 బంతుల్లో 4 ఫోర్లతో 28) దూకుడుగా ఆడారు. ప్రిన్స్ యాదవ్(6 బంతుల్లో 3 ఫోర్లతో 13 నాటౌట్) ఆఖరి ఓవర్‌లో వరుసగా బౌండరీలు బాది విలువైన పరుగులు చేశాడు.

అనంతరం వెస్టిండీస్ 20 ఓవర్లలో 7 వికెట్లకు 209 పరుగులే చేసి ఓటమిపాలైంది. కమిల్ పూరన్(27 బంతుల్లో 3 ఫోర్లు, 3 సిక్స్‌లతో 42), షిమ్రాన్ హెట్‌మైర్(26 బంతుల్లో 6 ఫోర్లు, 2 సిక్స్‌లతో 43), షమర్ స్ప్రింగర్(11 బంతుల్లో 2 ఫోర్లు, 4 సిక్స్‌లతో 35 నాటౌట్) టాప్ స్కోరర్లుగా నిలిచారు. భారత బౌలర్లలో అర్ష్‌దీప్ సింగ్(3/44) మూడు వికెట్లు తీయగా.. నమన్ ధీర్(2/39) రెండు వికెట్లు పడగొట్టాడు. అక్షర్ పటేల్, నితీష్ కుమార్ రెడ్డి తలో వికెట్ తీసారు.