అదే మా కొంపముంచింది: వెస్టిండీస్ కెప్టెన్ షాయ్ హోప్

IND vs WI: ఇండోర్‌లోని హోల్కర్ స్టేడియంలో జరిగిన మూడో టీ20 మ్యాచ్‌లో భారత్ చేతిలో 14 పరుగుల తేడాతో పరాజయం పాలైన అనంతరం వెస్టిండీస్ కెప్టెన్ షాయ్ హోప్ స్పందించాడు. చాలా చిన్న విషయాలే మ్యాచ్ ఫలితాన్ని శాసిస్తాయని.. ఈ మ్యాచ్‌లోనూ అదే జరిగిందని పేర్కొన్నాడు. పరుగుల తేడా చాలా తక్కువగా ఉండటం వల్ల తాము ఎక్కడ తప్పు చేశామో స్పష్టంగా తెలుస్తోందని.. ముఖ్యంగా బౌలింగ్ లో ఎగ్జిక్యూషన్ ఇంకా మెరుగ్గా ఉండి ఉంటే ఫలితం వేరేలా ఉండేదని అభిప్రాయపడ్డాడు. బౌండరీల వద్ద కొన్ని పరుగులు నియంత్రించడంలో విఫలమయ్యామని, అలాంటి చిన్న పొరపాట్లే మ్యాచ్ ముగింపులో ప్రభావం చూపుతాయని తెలిపాడు.

IND vs WI: థ్రిల్లింగ్ పోరులో వెస్టిండీస్‌పై భారత్ విజయం!

అయితే భారత బ్యాటర్లు ప్రారంభంలో సృష్టించిన విధ్వంసం తర్వాత తమ బౌలర్లు పుంజుకున్న తీరును షాయ్ హోప్ మెచ్చుకున్నాడు. అభిషేక్ శర్మ, ఇషాన్ కిషన్ నిర్మిస్తున్న భాగస్వామ్యం ప్రమాదకరంగా మారిన సమయంలో రోస్టన్ చేజ్ కీలక వికెట్లు తీసి మ్యాచ్‌ను తమ వైపు తిప్పాడని అన్నాడు. టీమిండియాను 223 పరుగులకే ఆలౌట్ చేసి మ్యాచ్‌లో మళ్లీ నిలబడటానికి బౌలర్లు అందించిన సహకారం ప్రశంసనీయమని వెల్లడించాడు.

టాపార్డర్ వైఫల్యంపై స్పందిస్తూ.. పవర్ ప్లేలోనే కీలక వికెట్లు కోల్పోవడం జట్టును ఒత్తిడిలోకి నెట్టిందని అంగీకరించాడు. వేగంగా లక్ష్యాన్ని ఛేదించే సమయంలో ఆరంభంలో మంచి భాగస్వామ్యం నెలకొల్పితే మిడిలార్డర్ బ్యాటర్లకు సులువవుతుందని, కానీ ఒక్కరిద్దరిపైన నిందలు వేయలేమని చెప్పాడు. ఇది సమిష్టి వైఫల్యమని, 14 పరుగుల తేడా అనేది చాలా చిన్నదని, మరోసారి ఈ తప్పులను సరిదిద్దుకుని బరిలోకి దిగుతామని ధీమా వ్యక్తం చేశాడు.

Also Read

IND vs WI: ఊచకోత.. ఇండోర్‌లో అభిషేక్ శర్మ రికార్డుల విధ్వంసం!

భారత బౌలర్లపై ప్రశంసలు
రెండో ఇన్నింగ్స్‌లో పిచ్ పొడిగా ఉండటం మ్యాచ్‌పై ప్రభావం చూపిందని షాయ్ హోప్ అభిప్రాయపడ్డాడు. పొడి వాతావరణం వల్ల భారత పేసర్ అర్ష్‌దీప్ సింగ్ వేసిన రెండో, మూడో ఓవర్లలో బంతి కాస్త స్వింగ్ అయిందని పేర్కొన్నాడు. ఇలాంటి పరిస్థితుల్లో బ్యాటింగ్ చేయడం ఎవరికైనా కష్టమేనని, భారత బౌలర్లు యార్కర్లను అత్యంత కచ్చితత్వంతో వేశారని ప్రశంసించాడు. యార్కర్లను ఎలా వేయాలో టీమిండియా బౌలర్లు ఈ రోజు చేసి చూపించారని, ఆ క్రెడిట్ మొత్తం భారత బౌలింగ్ యూనిట్‌కే దక్కుతుందని షాయ్ హోప్ ప్రశంసించాడు.