ఎంతో వేదనకు గురయ్యా..
2016 ఆస్ట్రేలియన్ ఓపెన్ సందర్భంగా డోపింగ్ పాల్పడిందనే కారణంతో షరపోవాపై నిషేధం విధించారు. మెల్డోనియం అనే ఉత్త్రేరకాన్ని వాడినట్టు తేలడంతో ఆమెను తొలుత రెండేళ్లు బహిష్కరించారు. కానీ షరపోవా ఉద్దేశపూర్వకంగా ఆ డ్రగ్ తీసుకోలేదని తేలడంతో నిషేధాన్ని 15 నెలలకు పరిమితం చేశారు. ఈ నిషేద ఉదంతంపై మారియా ‘ద పాయింట్'అనే డాక్యుమెంటరీలో మాట్లాడింది. ‘ఆరోజు (మార్చి 7, 2016) మ్యాచ్కోసం సిద్ధంకావాలనుకుంటూ ఉదయం నిద్రలేచా. కానీ నాపై నిషేధం విధించారని తెలిసి తీవ్ర ఆందోళనకు, అసహనానికి లోనయ్యా. మరెంతో వేదన చెందా. ఆ వార్త నన్నెంతో కలిచివేసింది' అని 33 ఏళ్ల మరియా తెలిపింది.
నా తల్లి ఓదార్చింది..
‘ఆటపట్ల నా చిత్తశుద్ధి ఎలాంటిదో నాకు తెలుసు. నన్ను నేను రక్షించుకొనేందుకు, నాపై ఎవరెవరో వ్యక్తం చేసే అభిప్రాయాలు, ఇచ్చే తీర్పులకు దూరంగా ఉండేందుకు ఆనాడు విలేకరుల సమావేశం అనంతరం నా మొబైల్లో సామాజిక మాధ్యమాల నెట్వర్క్లన్నింటినీ తీసేశా' అని వెల్లడించింది. నిషేధకాలంలో తల్లిదండ్రులు తనకు ఎంతో అండగా నిలిచారని తెలిపింది. ముఖ్యంగా.. టెన్నిస్ ఆడకపోతే జీవితమే లేదనుకోవడం సరికాదంటూ తల్లి తనను ఓదార్చిందని షరపోవా పేర్కొంది.
ప్రైజ్మనీ రూ. 277 కోట్ల 76 లక్షలు
తన 16 ఏళ్ల సుదీర్ఘకెరీర్లో 645 మ్యాచ్లు గెలిచిన షరపోవా..171 మ్యాచ్లో ఓడింది. ఓవరాల్ కెరీర్లో 3,87,77,962 డాలర్లు (రూ. 277 కోట్ల 76 లక్షలు) ప్రైజ్మనీ రూపంలో అందుకుంది. 2004-వింబుల్డన్, యూఎస్ ఓపెన్-2006, ఆస్ట్రేలియన్ ఓపెన్-2008, ఫ్రెంచ్ ఓపెన్-2012, 2014లతో మొత్తం ఐదు గ్రాండ్స్లామ్ సింగిల్స్ టైటిల్స్ గెలుచుకుంది. ఓవరాల్గా 36 సింగిల్స్ టైటిల్స్ నెగ్గింది. 2005 (ఆగస్టు 22)లో వరల్డ్నెంబర్ వన్ ర్యాంక్ అందుకుంది. 21 వారాల పాటు అగ్రస్థానంలోనే కొనసాగింది.