విండీస్‌ను కాపాడండి ప్లీజ్.. కోచ్ ఆవేదన!

టీమిండియాతో జరిగిన వన్డే, టీ20 సిరీస్‌లలో వెస్టిండీస్ క్రికెట్ జట్టు అద్భుతమైన పోరాట పటిమను కనబరిచింది. భారత జట్టుకు గట్టి పోటీ ఇచ్చిన అనంతరం వెస్టిండీస్ హెడ్ కోచ్ డారెన్ సామీ తమ దేశ క్రికెట్‌కు మద్దతుగా నిలవాలని కోరారు. ఆర్థిక సంక్షోభంతో కొట్టుమిట్టాడుతున్న వెస్టిండీస్ క్రికెట్‌కు ఎవరైనా ఒకరు ఆసరాగా నిలవాల్సిన అవసరం ఉందని ఆయన పిలుపునిచ్చారు. ఇండియాతో ముగిసిన ఈ సిరీస్ అనంతరం స్పాన్సర్లు ముందుకు వచ్చి తమ జట్టుపై పెట్టుబడులు పెడతారని ఆశాభావం వ్యక్తం చేశారు.

IND vs WI: ఇషాన్ కిషన్ ఊచకోత బుగ్గిపాలు.. ఆఖరి టీ20 రద్దు!

ఈ సందర్భంగా భారత క్రికెట్ బోర్డు, వెస్టిండీస్ క్రికెట్ బోర్డు మధ్య ఉన్న ఆర్థిక వ్యత్యాసాలను వెస్టిండీస్ కోచ్ డారెన్ సామీ ప్రస్తావించారు. భారత్ ఏదైనా ఐసీసీ టోర్నీలో బరిలోకి దిగితే కచ్చితంగా కప్ గెలవాలనే అంచనాలు ఉంటాయని, అందుకు తగ్గట్లే అవసరమైన అన్ని వనరులను సౌకర్యాలను వారికి బోర్డు సమకూరుస్తుందని వెల్లడించారు. కానీ వెస్టిండీస్ జట్టు మాత్రం ఎన్నో పరిమితులు, ఇబ్బందులు ఉన్నప్పటికీ అత్యుత్తమ ప్రదర్శన ఇవ్వడానికి కష్టపడాల్సి వస్తోందని చెప్పారు. ఇన్ని సవాళ్లు ఉన్నా తమ ఆటగాళ్లు చూపిస్తున్న ఆత్మవిశ్వాసంపై ఆయన సంతృప్తి వ్యక్తం చేశారు.

ఇక టీ20 సిరీస్‌లో ఆకట్టుకున్న ఆల్‌రౌండర్ రోస్టన్ చేజ్, స్పిన్నర్ గుడాకేష్ మోటీల ప్రదర్శనపై డారెన్ సామీ ప్రశంసల వర్షం కురిపించారు. బలమైన భారత బ్యాటింగ్ లైనప్‌ను కట్టడి చేయడంలో, పరుగులు రాకుండా ఒత్తిడి పెంచడంలో వీరిద్దరూ కీలక పాత్ర పోషించారని కొనియాడారు. ఎంతటి పిచ్‌కైనా అనుగుణంగా బౌలింగ్ చేయడానికి సరైన మానసిక దృఢత్వం ఉంటే చాలని వారు నిరూపించారని అన్నారు. ఈ సిరీస్‌లోనే అత్యధిక డాట్ బాల్స్ వేసిన బౌలర్లుగా వీరిద్దరూ నిలిచి ఉంటారని తాను భావిస్తున్నట్లు తెలిపారు.

Also Read

న్యూజిలాండ్ సిరీస్‌కు ముందు‌ బిగ్ షాక్!

సిరీస్ ప్రారంభానికి ముందు వెస్టిండీస్ జట్టుకు విజయావకాశాలు లేవని అంతా భావించారని, అయితే అది బయటి వ్యక్తుల అభిప్రాయం మాత్రమేనని డారెన్ సామీ అన్నారు. ఓ జట్టుగా తాము ఏ సవాలును తేలిగ్గా తీసుకోమని, చిన్న చిన్న అడుగులు వేస్తూ జట్టును ముందుకు తీసుకెళ్లేందుకు నిరంతరం శ్రమిస్తామని స్పష్టం చేశారు. ఈ పర్యటన ద్వారా లభించిన సానుకూల అంశాలతో భవిష్యత్తులో వెస్టిండీస్ క్రికెట్ పూర్వ వైభవం సాధిస్తుందనే నమ్మకాన్ని డారెన్ సామీ వ్యక్తం చేశారు.