6, 4, 6, 1, 6: వాన రాకపోయి ఉంటే.. వెస్టిండీస్ బౌలర్ల పని ఖతమే!

IND vs WI: భారత్, వెస్టిండీస్ జట్ల మధ్య బెంగళూరులోని చిన్నస్వామి స్టేడియంలో జరిగిన చివరి టీ20 మ్యాచ్ వర్షం కారణంగా రద్దయినప్పటికీ.. భారత యువ ఆల్‌రౌండర్ నమన్ ధీర్ తన విధ్వంసకర బ్యాటింగ్‌తో అభిమానులను అమితంగా ఆకట్టుకున్నాడు. ఈ టీ20 సిరీస్ పొడవునా తన స్పిన్ బౌలింగ్‌తో ప్రత్యర్థి బ్యాటర్లను మెప్పించిన నమన్ ధీర్‌కు బ్యాటింగ్ లో సరైన ఛాన్సులు లభించలేదు. లభించిన కొన్ని అవకాశాల్లో కూడా భారీ షాట్లకు యత్నించి త్వరగానే పెవిలియన్ చేరాడు. అయితే బెంగళూరు మ్యాచ్‌లో మాత్రం కేవలం 6 బంతుల్లోనే తన బ్యాటింగ్ పవర్ ఏంటో ప్రపంచానికి చాటిచెప్పాడు.

IND vs WI: ఇషాన్ కిషన్ ఊచకోత బుగ్గిపాలు.. ఆఖరి టీ20 రద్దు!

భారత ఇన్నింగ్స్ 7వ ఓవర్ ప్రారంభంలో చిరుజల్లులు పడుతుండగా క్రీజులోకి వచ్చిన నమన్ ధీర్.. తొలి బంతి నుంచే విండీస్ బౌలర్లపై విరుచుకుపడ్డాడు. కీమో పాల్ బౌలింగ్ లో మొదటి బంతిని స్క్వేర్ లెగ్ మీదుగా సిక్సర్‌గా తరలించగా.. రెండో బంతిని మిడ్-ఆఫ్ దిశగా ఫోర్ బాదాడు. మూడో బంతిని లాంగ్-ఆఫ్ మీదుగా స్టేడియం దాటించి జట్టు స్కోరును 100 దాటించాడు. ఆ తర్వాత షమర్ స్ప్రింగర్ వేసిన బంతిని కూడా సిక్సర్‌గా మలిచి కేవలం 6 బంతుల్లోనే 3 సిక్సర్లు, ఒక ఫోర్ తో 400 స్ట్రైక్ రేట్ తో 24 పరుగులు రాబట్టాడు. సరిగ్గా నమన్ ధీర్ ఊపుమీదున్న సమయంలో వర్షం పెరిగిపోయి మ్యాచ్ రద్దు కావడం విండీస్ బౌలర్లకు పెద్ద ఊరటగా మారింది.

ఈ విధ్వంసంతో నమన్ దీర్ ఓ అరుదైన మైలురాయిని చేరుకున్నాడు. ఇన్నింగ్స్ ఎదుర్కొన్న తొలి 3 బాల్స్ లోనే 16 పరుగులు (6,4,6) సాధించి గతంలో దినేష్ కార్తీక్ నెలకొల్పిన రికార్డును సమం చేశాడు. 2018 నిదాహాస్ ట్రోఫీ ఫైనల్లో బంగ్లాదేశ్ బౌలర్ రుబెల్ హుస్సేన్ బౌలింగ్ లో దినేష్ కార్తీక్ కూడా వరుసగా 6,4,6 పరుగులు రాబట్టగా.. ఇప్పుడు నమన్ ధీర్ ఆ రికార్డు జాబితాలో నిలిచాడు.

Also Read

IND vs WI: వైభవ్ సూర్యవంశీకి నిరాశే.. రెండు మార్పులతో భారత్!

బ్యాటింగ్‌లోనే కాకుండా ఈ సిరీస్ పొడవునా బౌలింగ్‌లోనూ నమన్ ధీర్ అద్భుతమైన ప్రదర్శన కనబరిచాడు. ప్రత్యర్థి బ్యాటర్లు అతడి బౌలింగ్ లో సిక్సర్లు కొట్టడం అంత సులువు కాలేదు. విశేషమేమిటంటే.. ఈ సిరీస్‌లో ఐదు సార్లు తన బౌలింగ్లో సిక్సర్ తిన్న మరుసటి బంతికే బ్యాటర్‌ను ఔట్ చేసి వికెట్ తీయడం అతని వికెట్ టేకింగ్ సామర్థ్యానికి అద్ధం పడుతోంది. వర్షం పడకుండా ఉంటే నమన్ ధీర్ ఆడిన ఈ ఇన్నింగ్స్ బెంగళూరులో చాలా మంది విండీస్ బౌలర్ల కెరీర్లకు సవాలుగా మారేదని క్రికెట్ విశ్లేషకులు అభిప్రాయపడుతున్నారు.