ఆ సన్‌రైజర్స్ హైదరాబాద్ ఆటగాడిని చాలా తక్కువ అంచనా వేసారు: గౌతమ్ గంభీర్

చాలా తక్కువ అంచనా..

ఈ క్రమంలోనే గంభీర్.. స్టార్ స్పోర్ట్స్ క్రికెట్ కనెక్టెడ్ షోలో మాట్లాడుతూ నబీపై ప్రశంసల జల్లు కురిపించాడు.‘నా అభిప్రాయం ప్రకారం టీ20 క్రికెట్‌లో మహ్మద్ నబీని చాలా తక్కువ అంచనా వేసారు. కీరన్ పొలార్డ్, ఏబీ డివిలియర్స్, రషీద్ ఖాన్.. లేకుంటే డేవిడ్ వార్నర్‌ల గురించి మాత్రమే మాట్లాడారు. కానీ నబీ ప్రదర్శనను, సత్తాను ఎనాడు గుర్తించలేదు.

రావాల్సిన పేరు రాలేదు..

అతనో అద్భత ఫీల్డర్. సూపర్‌గా బౌలింగ్ చేయగలడు. తొలి 6 ఓవర్లలో కూడా బ్యాట్స్‌మెన్‌ను కట్టడి చేస్తాడు. ఐదు, ఆరు స్థానాల్లో బ్యాటింగ్ వచ్చి ధాటిగా ఆడగలడు. కానీ మనమెప్పుడూ ఆండ్రీ రస్సెల్ గురించే మాట్లాడుతాం. రస్సెల్ స్థాయిలో నబీ ఆడకున్నా.. అతనో నాణ్యమైన ఆల్‌రౌండరే. కానీ అతనికి రావాల్సిన పేరు మాత్రం రాలేదు. ఎందుకంటే క్రికెట్ అంతగా ఆడని అఫ్గానిస్థాన్ నుంచి వచ్చాడు కనుక ప్రజలు అంతగా అతని ఆటను గుర్తించలేదు.

సన్‌రైజర్స్ హైదరాబాద్ కాకుంటే..

ఐపీఎల్‌లో కూడా అతనికి రావాల్సిన అవకాశాలు రాలేదు. సన్ రైజర్స్ హైదరాబాద్ జట్టులో డేవిడ్ వార్నర్, జానీ బెయిర్ స్టో, రషీద్ ఖాన్, కేన్ విలియమ్సన్‌లతో నెలకొన్న పోటీ కారణంగా తుది జట్టులో అవకాశం దక్కలేదు. కానీ 14 మ్యాచ్‌లకు 14 ఆడుంటే నబీ ప్రభావం ఏంటో తెలిసేది. నబీ సన్ రైజర్స్ కాకుండా ఇతర ఏ జట్టులో ఆడినా అతనికి 14 మ్యాచ్‌ల్లో అవకాశం దక్కేది. అప్పుడు అతనెంటో ప్రపంచానికి తెలిసేది'అని గంభీర్ చెప్పుకొచ్చాడు.

మొత్తం 13 మ్యాచ్‌లే..

ఇక 2017లో ఐపీఎల్‌లో అడుగుపెట్టిన నబీ.. ఓవరాల్‌గా 13 మ్యాచ్‌లు మాత్రమే ఆడాడు. ఇందులో గత సీజన్‌లోనే 8 మ్యాచ్‌లు ఆడిన నబీ.. 8 వికెట్లు తీసాడు. ఓవరాల్‌గా 11 వికెట్లు పడగొట్టాడు. ఇందులోఈ ఆఫ్ స్పిన్నర్ బెస్ట్ 4/11. ఇక బ్యాటింగ్ చేసే అవకాశం పెద్దగా రాకపోయినప్పటికీ.. 148.35 స్ట్రైక్ రేట్‌తో 135 రన్స్ చేశాడు. ఇందులో గత సీజన్‌లో 115 పరుగులు నమోదు చేశాడు. ఈ సీజన్‌లో హైదరాబాద్‌కు నబీ చాలా కీలకం కానున్నాడు. అఫ్గానిస్థాన్ తరఫున ఇప్పటి వరకు 78 అంతర్జాతీయ టీ20లు ఆడిన నబీ.. 1347 పరుగులతో పాటు 69 వికెట్లు తీశాడు.

ఆ జట్టే ఐపీఎల్ 2020 టైటిల్ గెలుస్తోంది: కెవిన్ పీటర్సన్