గాబ్రియెల్‌కు గజ్జలో గాయం.. తడబడి నిలబడిన ఇంగ్లండ్!

రెండు బంతుల్లో 2 వికెట్లు...

భారీవర్షం కారణంగా మైదానం చిత్తడిగా మారడంతో మ్యాచ్‌ గంటన్నర ఆలస్యంగా ప్రారంభమైంది. టాస్‌ గెలిచిన వెంటనే విండీస్‌ కెప్టెన్‌ హోల్డర్‌ ఫీల్డింగ్‌కే మొగ్గు చూపాడు. వాతావరణం అనుకూలంగా ఉండడంతో విండీస్‌ ఆరంభం నుంచే పేస్‌ అటాకింగ్‌ చేసింది. అయితే నలుగురు పేసర్లు దాడి చేసినా ఓపెనింగ్‌ జోడీ జో బర్న్స్‌, సిబ్లే ఆచితూచి ఆడింది. కొద్ది సేపటికే స్పిన్నర్‌ ఛేజ్‌తో బౌలింగ్‌ చేయించిన విండీస్‌ వ్యూహం ఫలించింది. ఛేజ్‌ తన తొలి ఓవర్లోనే బర్న్స్‌ను వికెట్ల ముందు దొరకబుచ్చుకున్నాడు. వెంటనే లంచ్‌ను ప్రకటించగా... ఆ సమయానికి ఇంగ్లండ్‌ 13.2 ఓవర్లలో 29 పరుగులు చేసింది. అయితే విరామం తర్వాత ఆతిథ్య జట్టుకు మరో షాక్‌ తగిలింది. వచ్చీరాగానే అదే ఓవర్‌లో మూడో బంతికి క్రాలే డకౌట్‌ కావడంతో ఇంగ్లండ్‌ షాక్‌కు గురైంది.

జోరూట్-సిబ్లీ కీలక ఇన్నింగ్స్

అయితే స్కోరు 29/2గా ఉన్న దశనుంచి రెండు అర్ధ సెంచరీ భాగస్వామ్యాలు ఇంగ్లండ్‌ను ఆదుకున్నాయి. ముందుగా సిబ్లీ, కెప్టెన్‌ జో రూట్‌ (23) కలిసి జట్టు ఇన్నింగ్స్‌ను నిలబెట్టే ప్రయత్నం చేశారు. తొలి టెస్టులో ‘మ్యాన్‌ ఆఫ్‌ ద మ్యాచ్‌'గా నిలిచిన పేసర్‌ గాబ్రియెల్‌ 7 ఓవర్లు మాత్రమే వేసి గజ్జల్లో గాయంతో కొద్ది సేపు తప్పుకోవడం విండీస్‌ బౌలింగ్‌ను బలహీనపర్చింది. అయితే జోసెఫ్‌ అల్జారి చక్కటి అవుట్‌స్వింగర్‌తో రూట్‌ను అవుట్‌ చేయడంతో 52 పరుగుల మూడో వికెట్‌ పార్ట్‌నర్‌షిప్‌కు తెర పడింది.

శతక భాగస్వామ్యం...

టీ బ్రేక్ టైమ్‌కు ఇంగ్లండ్‌ స్కోరు 112 పరుగులకు చేరింది. మూడో సెషన్‌ మొదలయ్యాక సిబ్లీ 164 బంతుల్లో అర్ధసెంచరీ పూర్తి చేసుకున్నాడు. ఆ తర్వాత సిబ్లీ, స్టోక్స్‌ కలిసి చక్కటి బ్యాటింగ్‌ ప్రదర్శన కనబర్చారు. పట్టుదలగా ఆడి క్రీజ్‌లో పాతుకుపోయిన వీరిద్దరు ప్రత్యర్థి బౌలర్లను సమర్థంగా ఎదుర్కొంటూ పరుగులు సాధించారు. 68 పరుగుల వద్ద సిబ్లీ ఇచ్చిన క్యాచ్‌ను స్లిప్‌లో హోల్డర్‌ జారవిడవగా...కొద్ది సేపటికే 119 బంతుల్లో స్టోక్స్‌ హాఫ్‌ సెంచరీ పూర్తయింది. అనంతరం ఈ జోడీని విడదీసేందుకు విండీస్‌ బౌలర్లు ఎన్ని ప్రయత్నాలు చేసినా సఫలం కాలేకపోయారు. ఎలాంటి రిస్కీ షాట్లకు వెళ్లకుండా వికెట్‌ను కోల్పోకూడదనే రీతిలో సాగిన ఈ జోడీ ఆటతీరుతో ఇంగ్లండ్‌ 200 ప్లస్‌ స్కోరును సాధించి తొలిరోజును ఆశాజనకంగా ముగించింది.

ఆరోజు సచిన్ అలా చేయకుంటే సెహ్వాగ్ ఇంత సక్సెస్ సాధించేవాడు కాదు