Asian Games 2026: ఒక్క మ్యాచ్ ఆడకుండానే సెమీస్.. అసోసియేట్ జట్లకు తీరని అన్యాయం!

Asian Games 2026: జపాన్‌లోని ఐచి-నగోయా వేదికగా జరుగుతున్న 2026 ఆసియా క్రీడల పురుషుల క్రికెట్ పోటీలలో ఓ అరుదైన, వివాదాస్పదమైన పరిణామం చోటుచేసుకుంది. స్టేడియంలోకి దిగి ఒక్క బంతి కూడా వేయకుండానే భారత్, పాకిస్తాన్ జట్లు నేరుగా సెమీఫైనల్స్‌లోకి అడుగుపెట్టాయి. ఐసీసీ ఉన్నత ర్యాంకింగ్స్ కారణంగా ఈ పెద్ద జట్లకు లబ్ధి చేకూరగా.. గ్రూప్ దశలో కష్టపడి గెలిచి క్వార్టర్ ఫైనల్స్‌కు చేరిన ఆఫ్ఘనిస్తాన్, హాంగ్‌కాంగ్ జట్లు మాత్రం ఆడకుండానే టోర్నీ నుంచి నిష్క్రమించాల్సి వచ్చింది.

IND vs AFG: మ్యాచ్ రద్దు.. సెమీస్‌లో అడుగుపెట్టిన టీమిండియా

అసలేం జరిగిందంటే?
ఐసీసీ అంతర్జాతీయ టీ20 ర్యాంకింగ్స్‌లో మెరుగైన స్థానాల్లో ఉన్న భారత్, పాకిస్తాన్, శ్రీలంక, బంగ్లాదేశ్ జట్లు నేరుగా క్వార్టర్ ఫైనల్స్‌కు అర్హత సాధించాయి. మిగిలిన జట్లు గ్రూప్ దశ మ్యాచులు ఆడి క్వార్టర్స్ చేరుకున్నాయి. అయితే క్వార్టర్ ఫైనల్స్ రోజున జపాన్‌లోని నిషిన్ నగరంలో ఎడతెరిపి లేకుండా కురిసిన వర్షం వల్ల భారత్-ఆఫ్ఘనిస్తాన్, పాకిస్తాన్-హాంగ్‌కాంగ్ మ్యాచ్‌లు టాస్ కూడా పడకుండానే రద్దయ్యాయి.

అసోసియేట్ జట్లకు ఎందుకు అన్యాయం జరిగింది?
గ్రూప్ దశలో అద్భుత ప్రదర్శన కనబర్చి జపాన్ ను ఓడించిన ఆఫ్ఘనిస్తాన్, ఒమన్‌పై విజయం సాధించిన హాంగ్‌కాంగ్ జట్టు ఎంతో ఆశతో క్వార్టర్స్‌లో అడుగుపెట్టాయి. మైదానంలో పోరాడి తమ ప్రతిభను నిరూపించుకునే అవకాశం లభించకుండానే వర్షం కారణంగా టోర్నీ నుంచి ఇంటిబాట పట్టాల్సి రావడం ఆయా జట్ల ఆటగాళ్లను, అభిమానులను తీవ్ర నిరాశకు గురిచేసింది. పెద్ద జట్లకు సవాలు విసిరే సువర్ణావకాశాన్ని చిన్న జట్లు కోల్పోయాయి.

Also Read

ఒక్క మ్యాచ్ ఆడకుండానే సెమీస్‌కు చేరిన పాకిస్తాన్!

రూల్స్ ఏం చెబుతున్నాయంటే?
ఆసియా క్రీడల క్రికెట్ రూల్స్ ప్రకారం క్వార్టర్స్ లేదా నాకౌట్ మ్యాచులకు ఎలాంటి రిజర్వ్ డే కేటాయించలేదు. ఒకవేళ వర్షం లేదా ఇతర కారణాల వల్ల మ్యాచ్ నిర్వహణ సాధ్యం కాకపోతే కనీస ఓవర్ల ఆట సాధ్యం కానప్పుడు మ్యాచ్‌ను రద్దుగా ప్రకటిస్తారు. రిజర్వ్ డే లేనందున ఐసీసీ టీ20 ర్యాంకింగ్స్‌లో అగ్రస్థానంలో ఉన్న జట్టును నిర్ణయించి తదుపరి రౌండ్ కు పంపుతారు.

ప్రస్తుతం ఐసీసీ టీ20 ర్యాంకింగ్స్‌లో టీమిండియా ప్రపంచంలోనే మొదటి స్థానంలో ఉంది. ఈ విచిత్రమైన నియమం కారణంగా ఒకవేళ రాబోయే సెమీఫైనల్స్, ఫైనల్ మ్యాచులు కూడా వర్షార్పణమైతే, భారత్ ఒక్క మ్యాచ్ కూడా ఆడకుండానే స్వర్ణ పతకాన్ని గెలుచుకునే అవకాశం ఉంది. నియమాలు పాతవే అయినప్పటికీ.. ప్రతికూల వాతావరణం వల్ల చిన్న జట్లకు తీరని అన్యాయం జరుగుతుందనే విమర్శలు వ్యక్తమవుతున్నాయి.