Wimbledon 2021 Day 4: ఫెడరర్, బార్టీ, జ్వెరెవ్ ముందంజ.. స్వితోలినా ఔట్‌

మూడో రౌండ్‌కు క్రెజికోవా, బార్టీ..

గురువారం జరిగిన ఇతర మ్యాచ్‌ల్లో విజయం సాధించిన ఫ్రెంచ్‌ ఓపెన్‌ చాంపియన్‌ బార్బరా క్రెజికోవా (చెక్‌), టాప్‌ సీడ్‌ బార్టీ (ఆస్ట్రేలియా) మూడో రౌండ్లో అడుగుపెట్టారు. రెండో రౌండ్లో క్రెజికోవా 7-5, 6-4తో పెట్కోవిచ్‌ (జర్మనీ)పై విజయం సాధించింది. బార్టీ 6-4, 6-3తో బ్లికోవా (రష్యా)ను ఇంటిముఖం పట్టించింది. 16వ సీడ్‌ పవ్లిచెంకోవా (రష్యా) 7-5, 6-4తో ప్లిస్కోవా (చెక్‌)పై నెగ్గగా.. షెల్బీ రోజర్స్‌ (అమెరికా) 7-5, 6-4తో మరియా సకారి (గ్రీస్‌)ని ఓడించింది. అమెరికా టీనేజ్ సెన్సేషన్, 20వ సీడ్‌ గాఫ్‌ 6-4, 6-3తో వెస్నినా (రష్యా)పై, ఒస్తాపెంకో (లాత్వియా) 6-1, 3-6, 8-6తో కసట్కినా (రష్యా)పై గెలిచారు. సెవత్సొవా (ఉక్రెయిన్‌), బదోసా (స్పెయిన్‌), ముచోవా (చెక్‌), జియోర్జి (ఇటలీ) తర్వాతి రౌండ్‌ చేరుకున్నారు.

మెద్వెదెవ్‌ ముందంజ

పురుషుల సింగిల్స్‌ రెండో రౌండ్లో ఫెడరర్‌ 7-6 (7-1), 6-1, 6-4తో గాస్కెట్‌ (ఫ్రాన్స్‌)పై విజయం సాధించాడు. మ్యాచ్‌లో ఫెడరర్‌ 9 ఏస్‌లు, 49 విన్నర్లు కొట్టాడు. మెద్వెదెవ్‌ 6-4, 6-1, 6-2తో అక్లారెజ్‌ (స్పెయిన్‌)పై, జ్వెరెవ్‌ 7-5, 6-2, 6-3తో సాండ్‌గ్రెన్‌ (అమెరికా)ను గెలిచారు. ఎనిమిదో సీడ్‌ బటిస్టా అగట్‌ (స్పెయిన్‌) కష్టంగా ముందంజ వేశాడు. అయిదుసెట్ల పాటు సాగిన రెండో రౌండ్‌ మ్యాచ్‌లో అతడు 6-3, 6-3, 6-7 (3-7), 3-6, 6-3తో కెమనోవిచ్‌ (సెర్బియా)పై నెగ్గాడు.

సానియా జోడీ సంచలనం..

మహిళల డబుల్స్‌లో సానియా మీర్జా, బెథానీ మాటెక్‌ జోడీ రెండో రౌండ్లో ప్రవేశించింది. మొదటి రౌండ్లో ఈ జంట 7-5, 6-3తో ఆరో సీడ్‌ జోడీ దెసైరే క్రాజిక్‌ (అమెరికా), అలెక్సా గౌరాచి (చిలీ)లను ఓడించింది. ఆరంభంలో కాస్త ఇబ్బంది పడ్డ సానియా-మాటెక్‌ ద్వయం లయను అందుకున్నాక పూర్తి ఆధిపత్యాన్ని ప్రదర్శించింది. మరోవైపు పురుషుల డబుల్స్‌లో బోపన్న-దివిజ్‌ శరణ్‌ జోడీ 6-7 (6-7), 4-6తో కొంటినెన్‌ (ఫిన్లాండ్‌), రోజర్‌-వాసెలిన్‌ (ఫ్రాన్స్‌) జంట చేతిలో ఓడింది.