Australia Open 2022: క్వార్టర్స్‌లో సానియా జోడీ! జ్వెరవ్‌కు షాక్.. నాదల్ దూకుడు!

నాదల్ దూకుడు..

ఆదివారం జరిగిన పురుషుల సింగిల్స్‌ ప్రిక్వార్టర్‌ ఫైనల్లో ఆరో సీడ్‌ నాదల్‌ 7-6 (16/14), 6-2, 6-2తో అడ్రియన్‌ మనారినో (ఫ్రాన్స్‌)పై గెలుపొందాడు. 2007 నుంచి ఈ టోర్నీలో బరిలోకి దిగిన ప్రతిసారీ నాదల్‌ కనీసం క్వార్టర్‌ ఫైనల్‌కు చేరుకున్నాడు. 2013లో ఈ టోర్నీకి దూరంగా ఉన్న నాదల్‌ 2016లో మాత్రం తొలి రౌండ్‌లో ఓడిపోయాడు. మనారినోతో 2 గంటల 40 నిమిషాలపాటు జరిగిన మ్యాచ్‌లో నాదల్‌కు తొలి సెట్‌లో తీవ్ర ప్రతిఘటన ఎదురైంది. 81 నిమిషాలపాటు సాగిన తొలి సెట్‌లో నాదల్‌ నాలుగుసార్లు సెట్‌ పాయింట్లను కాపాడుకున్నాడు.

జ్వెరవ్‌కు షాక్..

కెనడాకు చెందిన 14వ సీడ్‌ డెనిస్‌ షపోవలోవ్‌ 2 గంటల 21 నిమిషాల్లో 6-3, 7-6 (7/5), 6-3తో జ్వెరెవ్‌ను బోల్తా కొట్టించి క్వార్టర్‌ ఫైనల్లో నాదల్‌తో పోరుకు సిద్ధమయ్యాడు. ఐదోసారి ఆస్ట్రేలియన్‌ ఓపెన్‌ ఆడుతున్న షపోవలోవ్‌ తొలిసారి క్వార్టర్‌ ఫైనల్‌ బెర్త్‌ సంపాదించాడు. ఇతర ప్రిక్వార్టర్‌ ఫైనల్స్‌లో ఏడో సీడ్‌ బెరెటిని (ఇటలీ) 7-5, 7-6 (7/4), 6-4తో 19వ సీడ్‌ కరెనో బుస్టా (స్పెయిన్‌)పై, 17వ సీడ్‌ గేల్‌ మోన్‌ఫిల్స్‌ (ఫ్రాన్స్‌) 7-5, 7-6 (7/4), 6-3తో కెచ్‌మనోవిచ్‌ (సెర్బియా)పై గెలిచారు.

సాకారి, బదోసా ఔట్

మాడిసన్‌ కీస్‌ (అమెరికా) 6-3, 6-1తో బదోసాను ఓడించగా... 21వ సీడ్‌ జెస్సికా పెగూలా (అమెరికా) 7-6 (7/0), 6-3తో సాకరిపై గెలిచింది. ఇతర ప్రిక్వార్టర్‌ ఫైనల్స్‌లో టాప్‌ సీడ్, ప్రపంచ నంబర్‌వన్‌ యాష్లే బార్టీ (ఆస్ట్రేలియా) 6-4, 6-3తో అమండా అనిసిమోవా (అమెరికా)పై, నాలుగో సీడ్‌ క్రిచికోవా (చెక్‌ రిపబ్లిక్‌) 6-2, 6-2తో మాజీ నంబర్‌వన్‌ అజరెంకా (బెలారస్‌)పై విజయం సాధించి క్వార్టర్‌ ఫైనల్లోకి దూసుకెళ్లారు.