Australia Open: యాష్లే బార్టీ అదరహో.. 42 ఏళ్ల తర్వాత ఫైనల్లో ఆసీస్ మహిళ!

17 గేమ్స్‌ మాత్రమే..

సెమీస్‌ చేరే క్రమంలో 17 గేమ్‌లు మాత్రమే కోల్పోయిన బార్టీ.. అదే జోరును కొనసాగించింది. ఆమెకు కీస్‌ ఏమాత్రం పోటీ ఇవ్వలేకపోయింది. మ్యాచ్‌లో బార్టీ 20 విన్నర్లు కొట్టగా.. కీస్‌ ఎనిమిది మాత్రమే కొట్టింది. ఆరు బ్రేక్‌ పాయింట్లలో నాలుగింటిని సద్వినియోగం చేసుకున్న బార్టీ.. తన సర్వీసులో ఎదుర్కొన్న రెండు బ్రేక్‌ పాయింట్లనూ కాపాడుకుంది.

ఆమె టోర్నీలో ఇప్పటివరకు ఒకే ఒక్కసారి సర్వీసును కోల్పోవడం గమనార్హం. ఇంతకుముందు వింబుల్డన్‌, ఫ్రెంచ్‌ ఓపెన్‌ టైటిళ్లు గెలిచిన బార్టీ.. ఇప్పుడు మూడో గ్రాండ్‌స్లామ్‌ టైటిల్‌ కోసం తహతహలాడుతోంది. ''ఫైనల్‌ చేరడాన్ని నమ్మలేకపోతున్నా. సొంతగడ్డపై ఆస్ట్రేలియన్‌ ఓపెన్‌లో ఆడడం నాకెంతో ఇష్టం. ఇప్పుడు నాకు టైటిల్‌ గెలిచే అవకాశముంది'' అని మ్యాచ్‌ అనంతరం బార్టీ వ్యాఖ్యానించింది.

పటిష్టంగా ప్రత్యర్థి..

తొలి గ్రాండ్‌స్లామ్‌ టైటిల్‌ కోసం ఆరాటపడుతోన్న డానియెల్‌ కొలిన్స్‌.. ఫైనల్లో బార్టీని ఢీకొట్టనుంది. 27వ సీడ్‌ కొలిన్స్‌ సెమీఫైనల్లో 6-4, 6-1తో ఏడో సీడ్‌ స్వైటెక్‌ (చెక్‌)ను ఓడించింది. ఆమె రెండు సెట్లలోనూ తొలి గేముల్లోనే ప్రత్యర్థి సర్వీసును బ్రేక్‌ చేసింది. రెండు సెట్లలోనూ 4-0 ఆధిక్యంలోకి దూసుకెళ్లి.. ఆ తర్వాత పైచేయి సాధించింది. ఏడు ఏస్‌లు, 27 విన్నర్లు కొట్టిన ఆమె..13 అనవసర తప్పిదాలు మాత్రమే చేసింది.

డబుల్స్ చాంప్ ఆస్ట్రేలియా..

ఆస్ట్రేలియా ఆటగాళ్ల మధ్యే పురుషుల డబుల్స్‌ ఫైనల్‌ జరగనుంది. కిర్గియోస్‌-కొకినాకిస్‌ జంట (ఆస్ట్రేలియా) టైటిల్‌ పోరులో మాథ్యూ ఎబ్డెన్‌-మ్యాక్స్‌ పుర్సెల్‌ (ఆస్ట్రేలియా) జోడీని ఢీకొట్టనుంది. సెమీస్‌లో కిర్గియోస్‌-కొకినాకిస్‌ ద్వయం 7-6 (7-4), 6-4తో గ్రానోలర్స్‌ (స్పెయిన్‌), జెబలోస్‌ (అర్జెంటీనా) జోడీని ఓడించగా.. ఎబ్డెన్‌-పుర్సెల్‌ జోడీ 6-3, 7-6 (11-9)తో రాజీవ్‌ రామ్‌ (అమెరికా), సలిస్‌బరీ (బ్రిటన్‌) ద్వయంపై గెలిచింది.

రసవత్తర పోరు నేడే..

పురుషుల సింగిల్స్‌లో ఆసక్తికర సమరానికి వేళైంది. శుక్రవారమే సెమీఫైనల్స్‌. 21వ గ్రాండ్‌స్లామ్‌ టైటిల్‌తో రికార్డు సృష్టించాలనుకుంటున్న ఆరో సీడ్‌ రఫెల్‌ నాదల్‌ (స్పెయిన్‌).. ఇటలీకి చెందిన ఏడో సీడ్‌ బెరెటినిని ఢీకొంటాడు. బెరెటిని గురించి నాదల్‌ గొప్పగా మాట్లాడాడు. ''బెరెటిని ప్రపంచంలో మేటి ఆటగాళ్లలో ఒకడు. గెలవాలంటే నేను నా అత్యుత్తమ ఆట ఆడాలి'' అని వ్యాఖ్యానించాడు. మరో సెమీఫైనల్లో నాలుగో సీడ్‌ సిట్సిపాస్‌ (గ్రీస్‌)తో రెండో సీడ్‌ మెద్వెదెవ్‌ (రష్యా) తలపడతాడు. వీళ్లిద్దరు 2021 ఆస్ట్రేలియన్‌ ఓపెన్‌ సెమీఫైనల్లోనూ తలపడడం విశేషం. ఆప్పుడు మెద్వెదెవ్‌ పైచేయి సాధించాడు. కానీ ఫైనల్లో జకోవిచ్‌ చేతిలో ఓడిపోయాడు.