World Athletics Championships: సాబ్లే ఊరించి ఊసురుమనిపించాడు..!

ముగ్గురు విన్నర్లు కూడా..

ఈ విభాగంలో ఒలింపిక్‌ చాంపియన్, మొరాకోకు చెందిన సూఫియాన్‌ బకాలి (8 నిమిషాల 25.13 సె.), లమేచా గిర్మా (ఇథియోపియా - 8 నిమిషాల 26.01 సె.), కాన్సెస్‌లన్‌ కిప్రు టో (కెన్యా - 8 నిమిషాల 27.92 సెకన్లు) వరుసగా స్వర్ణ, రజత, కాంస్యాలు గెలుచుకున్నారు. ముగ్గురు మెడల్ విన్నర్లు కూడా తమ పర్సనల్, సీజన్ బెస్ట్ కంటే ఎక్కువ టైమ్ తీసుకున్నారు.

రోజస్ ట్రిపుల్ ధమాకా..

వెనిజులా స్టార్‌ అథ్లెట్, ఒలింపిక్‌ స్వర్ణ పతక విజేత యులిమర్‌ రోజస్‌ మరోసారి అద్భుత ప్రదర్శనతో ట్రిపుల్‌ జంప్‌లో సత్తా చాటింది. వరుసగా మూడో ప్రపంచ చాంపియన్‌షిప్‌లోనూ రోజస్‌ పసిడితో మెరిసింది. ఫైనల్లో రోజస్‌ 15.47 మీటర్ల దూరం దూకి మొదటి స్థానంలో నిలిచింది. ఈ పోటీలో షనీకా రికెట్స్‌ (అమెరికా - 14.89 మీ.) రజతం సాధించగా, టోరీ ఫ్రాంక్లిన్‌ (అమెరికా - 14.72 మీ.) కాంస్యం గెలుచుకుంది. అథ్లెటిక్స్‌ ప్రపంచ చాంపియన్‌షిప్‌లో రోజస్‌కు ఇది హ్యాట్రిక్‌ స్వర్ణం కావడం విశేషం. 2017 (లండన్‌), 2019 (దోహా)లలో కూడా ఆమె బంగారు పతకాన్ని అందుకుంది.

ప్రాక్టీస్ లేకుండానే..

ట్రిపుల్‌ జంప్‌లో ప్రస్తుత ప్రపంచ రికార్డు (15.74 మీటర్లు) రోజస్‌ పేరిటే ఉంది. తన రెండో ప్రయత్నంలోనే 15.47 మీటర్లు నమోదు చేసిన రోజస్‌ తర్వాతి నాలుగు ప్రయత్నాల్లో కూడా దానిని దాటలేకపోయింది. దాంతో పోలిస్తే చాలా తక్కువ దూరం ఆమె దూకగలిగినా...ఈ మెగా ఈవెంట్‌లో బంగారం గెలుచుకునేందుకు అది సరిపోయింది. 'రికార్డు స్థాయిలో ఎక్కువ దూరం దూకాలనే బరిలోకి దిగినా అది సాధ్యం కాలేదు. అయితే తాజా ఫలితంతో చాలా సంతోషంగా ఉన్నా. ఇంత మంది ప్రేక్షకుల మధ్య మళ్లీ పోటీలో నిలవడం గొప్పగా అనిపిస్తోంది. పెద్దగా సన్నాహకాలు లేకుండానే ఇక్కడికి వచ్చాను. గాయాలతో కూడా ఇబ్బంది పడ్డాను. అయితే వాటన్నింటినీ అధిగమించి ఇక్కడ గెలవగలిగాను' అని రోజస్‌ వ్యాఖ్యానించింది.