Union Budget 2026: క్రీడా రంగంపై నిర్మలమ్మ కాసుల వర్షం!!

భారత క్రీడా రంగానికి కేంద్ర ప్రభుత్వం మరోసారి పెద్దపీట వేసింది. 2026-27 ఆర్థిక సంవత్సరానికి సంబంధించి ఆదివారం పార్లమెంటులో ప్రవేశపెట్టిన కేంద్ర బడ్జెట్‌లో యువజన వ్యవహారాలు, క్రీడల మంత్రిత్వ శాఖకు కేటాయింపులను భారీగా పెంచింది. క్రీడలను కేవలం ఒక ఆటగానే కాకుండా, ఉపాధి కల్పన, మౌలిక సదుపాయాల వృద్ధికి కీలకమైన రంగంగా ప్రభుత్వం గుర్తిస్తోందని కేంద్ర ఆర్థిక మంత్రి నిర్మలా సీతారామన్ తెలిపారు.

భారత క్రీడా రంగాన్ని ప్రపంచ స్థాయికి తీసుకెళ్లే లక్ష్యంతో, రాబోయే పదేళ్ల కోసం ప్రతిష్టాత్మకమైన 'ఖేలో ఇండియా మిషన్' రోడ్‌మ్యాప్‌ను ఆమె ఆవిష్కరించారు. తన తొమ్మిదవ బడ్జెట్ ప్రసంగంలో నిర్మలా సీతారామన్ క్రీడల ఆర్థిక ప్రాముఖ్యతను నొక్కి చెప్పారు. 'ఖేలో ఇండియా కార్యక్రమం ద్వారా ప్రారంభమైన క్రీడల అభివృద్ధిని మరింత ముందుకు తీసుకెళ్తూ.. రాబోయే 10 ఏళ్ల కాలంలో ఈ రంగాన్ని సమూలంగా మార్చడానికి మేం'ఖేలో ఇండియా మిషన్'ను ప్రారంభిస్తున్నాం' అని ఆమె పేర్కొన్నారు.

Union Budget 2026 Sports Funding Soars as Allocation Increases by Nearly Rs 2 800 Crore

రూ.2800 కోట్లు అదనంగా..

గతేడాది కంటే రూ.2800 కోట్ల అదనంగా క్రీడా రంగానికి కేటాయించారు. దాంతో 2026-27 ఆర్థిక సంవత్సరంలో క్రీడల మంత్రిత్వ శాఖ నికర వ్యయం రూ. 45,000 కోట్లు దాటింది.

2026-27 కేటాయింపు: సుమారు రూ. 45,482 కోట్లు

2025-26 కేటాయింపు: సుమారు రూ. 42,692 కోట్లు

పెరుగుదల: గతేడాదితో పోల్చితే దాదాపు రూ. 2,800 కోట్ల అదనపు నిధులు మంజూరయ్యాయి.

నిధులు ఎక్కడ ఖర్చు చేస్తారంటే?

ఈ పెరిగిన నిధులు ప్రధానంగా కింది విభాగాలకు మళ్లించనున్నారు:

ఖేలో ఇండియా మిషన్: కొత్తగా ప్రకటించిన 10 ఏళ్ల రోడ్‌మ్యాప్ అమలుకు ఈ నిధులు వెన్నెముకగా నిలుస్తాయి.

అంతర్జాతీయ వేదికలు: 2030లో అహ్మదాబాద్‌లో నిర్వహించనున్న 100వ కామన్వెల్త్ గేమ్స్, అలాగే 2036 ఒలింపిక్ బిడ్ కోసం స్టేడియంల ఆధునీకరణ, శిక్షణ కేంద్రాల నిర్మాణం వంటి మౌలిక సదుపాయాల కోసం భారీగా ఖర్చు చేయనున్నారు.

క్యాపిటల్ ఎక్స్‌పెండిచర్: స్వల్పకాలిక ఖర్చుల కంటే, దీర్ఘకాలిక ఆస్తుల సృష్టిపై కేంద్ర ప్రభుత్వం దృష్టి పెట్టింది.

ఉపాధి, యువజన అభివృద్ధి

ఈ బడ్జెట్ కేవలం పతకాల కోసమే కాదు, యువతకు ఉపాధి కల్పించే దిశగా కూడా అడుగులు వేస్తోంది. క్రీడా రంగంలో కోచింగ్, స్పోర్ట్స్ సైన్స్, ఈవెంట్ మేనేజ్మెంట్ మరియు క్రీడా పరికరాల తయారీ వంటి విభాగాల్లో ఉద్యోగ అవకాశాలను మెరుగుపరచడం ఈ నిధుల ముఖ్య ఉద్దేశం.

వ్యూహాత్మక ముందడుగు

క్రీడల మంత్రిత్వ శాఖకు నిలకడగా నిధులు పెంచడం వల్ల భారత క్రీడా వ్యవస్థలో స్థిరత్వం వస్తుందని విశ్లేషకులు భావిస్తున్నారు. ఈ నిధుల పెరుగుదల భారత క్రీడాకారుల అంతర్జాతీయ స్థాయి ప్రదర్శనను మెరుగుపరచడమే కాకుండా, క్రీడలను దేశ ఆర్థిక వ్యవస్థలో ఒక భాగం చేయనుంది.