పాకిస్థాన్ బళ్లెం వీరుడికి ఫేక్ ట్వీట్ సెగ.. నీరజ్ చోప్రాను కొనియాడేందుకు సిగ్గు లేదా? అంటూ పాక్ ఫ్యాన్స్ రచ్చ

నీరజ్ చోప్రా నీ ఐడలా? సిగ్గు లేదా..

ముఖ్యంగా భారతీయ అథ్లెట్ అయిన నీరజ్ చోప్రాను పాకిస్తాన్ అథ్లెట్ అర్షద్ నదీమ్ 'ఐడల్' గా పేర్కొనడం ఏంటని పాక్ ఫ్యాన్స్ మండి పడ్డారు. తన కంటే ఒక ఏడాది చిన్నవాడైన నీరజ్‌ను ఐడల్‌గా పేర్కొనడం ఏంటనీ.. అందులో దాయాది దేశానికి చెందిన అథ్లెట్‌ను ఐడల్‌గా పేర్కొంటావా అంటూ తీవ్ర ఆగ్రహం వ్యక్తం చేశారు. ఒకవైపు మెడల్ గెలవక పోవడమే కాకుండా భారత అథ్లెట్‌ను పొగడటానికి సిగ్గులేదా? అని కూడా ప్రశ్నించారు. మరోవైపు భారత అభిమానులు మాత్రం నదీమ్‌ను అభినందించారు. క్రీడా స్పూర్తి అంటే ఇదేనని కొనియాడారు.

నదీమ్ పేరిట ఫేక్ ట్వీట్..

ఇరు దేశాల్లో ఈ ట్వీట్ వైరల్‌ అయిన కొద్ది సేపటికే అర్షద్ నదీమ్ ఖాతా నుంచి ట్వీట్ మాయమైంది. ఆ వెంటనే మరో ట్వీట్ కనిపించింది. 'టోక్యో ఒలింపిక్స్ జావెలిన్ త్రో పోటీలో స్వర్ణ పతకం గెలిచిన నీరజ్ చోప్రాకు శుభాకాంక్షలు' అంటూ ట్వీట్ చేశాడు. అర్షద్‌తో కావాలనే ఆ ట్వీట్ బలవంతంగా తీసేయించి.. మరో ట్వీట్ పెట్టించారని భారత అభిమానులు ఆరోపించారు. మరోవైపు పాక్ ఫ్యాన్స్ ఆగ్రహాన్ని తట్టుకోలేకే అర్షద్ నదీమ్ ఆ ట్వీట్ డిలీట్ చేసినట్లు కొంత మంది అభిప్రాయపడ్డారు. అయితే ఆ ట్విటర్ అకౌంట్ అర్షద్ నదీమ్‌దే కాదని తెలిసింది. ఎవరో అతని పేరుపై ఫేక్ అకౌంట్ క్రియేట్ చేసినట్లు స్పష్టమైంది. సాధారణంగా సెలెబ్రిటీలకు ఉండే బ్లూ టిక్ ఆ ఖాతాకు లేదు. పైగా పాకిస్థాన్ మీడియా సైతం అది ఫేక్ ట్విటర్ అకౌంటని తేల్చింది. ఫేక్ ట్వీట్ అని తెలిసినా అతనిపై ట్రోలింగ్ ఆగడం లేదు.

షేక్ హ్యాండ్ వైరల్

గతంలో కూడా నీరజ్ చోప్రా, నదీమ్ షేక్ హ్యాండ్ వైరల్‌గా మారింది. 2018 ఏషియన్ గేమ్స్‌లో కూడా వీరిద్దరూ పోటీ పడ్డారు. అప్పుడు నీరజ్ స్వర్ణ పతకం గెలవగా.. అర్షద్ నదీమ్ కాంస్య పతకం నెగ్గాడు. కాగా, పతకాలు బహుకరించిన తర్వాత నదీమ్, నీరజ్ తమ దేశ జెండాలను భుజాలపై వేసుకొని షేక్ హ్యాండ్ ఇచ్చు కోవడం అప్పట్లో వైరల్ అయ్యింది. ఇప్పటి వరకు జావెలిన్ త్రోలో 8 సార్లు ఫైనల్‌లో తలపడగా.. ప్రతీ సారి నీరజ్‌దే పై చేయి అయ్యింది.

ఐదో స్థానంలోనే పాక్ బళ్లెం వీరుడు..

టోక్యో ఒలింపిక్స్‌‌లో ఆదివారం జరిగిన జావెలిన్ త్రో ఫైనల్లో నీరజ్ చోప్రా 87.58 మీటర్లు విసరగా.. ఆ తర్వాత చెక్ రిపబ్లిక్ ఆటగాళ్లు వడ్లెచ్ 86.67 మీటర్లు, వాస్లీ 85.44 మీటర్లు విసిరి రజతం, కాంస్య గెలుచుకున్నారు. అయితే ఫైనల్ రౌండ్‌లో జర్మన్‌కు చెందిన వెబర్ నాలుగో స్థానంలో నిలవగా.. పాకిస్థాన్ బళ్లెం వీరుడు అర్షద్ నదీమ్ 84.62 మీటర్లు విసిరి ఐదో స్థానంతో సరిపెట్టుకున్నాడు. స్వర్ణం సాధించిన నీరజ్ చోప్రాపై సర్వ్రత్రా ప్రశంసల జల్లు కురుస్తున్న విషయం తెలిసిందే.