చరిత్ర సృష్టించిన దివ్యా దేశ్‌ముఖ్.. వరల్డ్ కప్ కైవసం!

భారత స్టార్ చెస్ ప్లేయర్ దివ్య దేశ్‌ముఖ్ చరిత్ర సృష్టించింది. ఫిడే మహిళల చెస్ వరల్డ్ కప్ టైటిల్‌ గెలిచిన తొలి భారత ప్లేయర్‌గా నిలిచింది. తెలుగు తేజం కోనేరు హంపితో జరిగిన ఫైనల్లో దివ్య దేశ్‌ముఖ్ 2.5-1.5 తేడాతో విజేతగా నిలిచింది. మూడు రోజుల పాటు హోరాహోరీగా సాగిన ఈ మ్యాచ్‌ ఫలితాన్ని టై బ్రేకర్ ద్వారా తేల్చారు. తొలి రెండు గేమ్స్ డ్రా కావడంతో సోమవారం టై బ్రేకర్ మ్యాచ్‌లు నిర్వహించారు.

టై-బ్రేకర్స్‌లో 10 నిమిషాల వ్యవధితో కూడిన రెండు ర్యాపిడ్ గేమ్స్ నిర్వహించారు. ఈ ర్యాపిడ్ గేమ్ ప్రతీ ఎత్తుకు 10 సెకన్ల ఇంక్రిమెంట్ సమయం మాత్రమే ఉంటుంది. ట్రై బ్రేకర్‌లో మొదటి ర్యాపిడ్ గేమ్ కూడా డ్రాగా ముగిసింది. ఈ గేమ్‌లో కోనేరు హంపి, దివ్య దేశ్‌ముఖ్ హోరీహోరీగా తలపడ్డారు. ఈ గేమ్ కూడా ఆఖరి ఎత్తు వరకు ఉత్కంఠగా సాగింది. ఈ గేమ్‌లో ఇరువురు డ్రాకు అంగీకరించారు.

రెండో ర్యాపిడ్ గేమ్‌లో దివ్య దేశ్‌ముఖ్ నల్లపావులతో ఆడి, అద్భుతమైన ప్రదర్శన కనబరిచింది. ఈ గేమ్‌లో కోనేరు హంపి ఒక కీలకమైన ఎండ్-గేమ్ పొరపాటు చేసింది. ఈ తప్పిదాన్ని సద్వినియోగం చేసుకున్న 19 ఏళ్ల దివ్య దేశ్‌ముఖ్ విజయాన్ని సొంతం చేసుకుంది. కోనేరు హంపి ఓటమిని అంగీకరించి గేమ్ నుంచి వైదొలిగింది. హంపి చేసిన తప్పిదాలు దివ్య దేశ్‌ముఖ్‌కు కలిసొచ్చాయి.

ఈ చారిత్రక విజయంతో 19 ఏళ్ల దివ్య దేశ్‌ముఖ్ గ్రాండ్‌మాస్టర్ హోదాను అందుకుంది. భారత మహిళా చెస్ చరిత్రలో ఈ ఘనత సాధించిన నాలుగో క్రీడాకారిణిగా నిలిచింది. ప్రపంచకప్‌ను గెలుచుకోవడం ద్వారా దివ్య దేశ్‌ముఖ్ 2026లో జరిగే ప్రతిష్టాత్మక క్యాండిడేట్స్ టోర్నమెంట్‌కు అర్హత సాధించింది. ప్రపంచ ఛాంపియన్‌షిప్‌కు అర్హత సాధించేందుకు ఈ టోర్నీ ఉపయోగపడనుంది.

ఇద్దరు భారత చెస్ ప్లేయర్స్ ఫైనల్‌కు చేరుకోవడం, అందులో దివ్య విజయం సాధించడం భారత చెస్ చరిత్రలో ఒక కీలక మైలురాయిగా నిలిచింది. దివ్య విజయం యువతరం ఆటగాళ్లకు స్ఫూర్తినిచ్చింది.