PKL 2024 ప్లే ఆఫ్స్ చేరిన జట్లు ఇవే.. షెడ్యూల్ ఇదే! ఎలా చూడాలంటే?

ప్రోకబడ్డీ ప్రీమియర్ లీగ్(పీకేఎల్) సీజన్ 11 తుది దశకు చేరుకుంది. దిగ్విజయం లీగ్ దశ ముగిసి నాకౌట్ సమరానికి రంగం సిద్దమైంది. మొత్తం 12 జట్ల మధ్య జరిగిన ఈ టోర్నీలో ఒక్కో టీమ్ 22 మ్యాచ్‌లు ఆడాయి. టాప్-6లో నిలిచిన జట్లు ప్లే ఆఫ్స్‌కు అర్హత సాధించాయి. డిసెంబర్ 26 నుంచి నాకౌట్ మ్యాచ్‌లు జరగనున్నాయి.

పీకేఎల్ ఫ్లే ఆఫ్స్ ఫార్మాట్ ఏంటంటే..?
ఇతర టోర్నీలతో పోల్చితే ప్రోకబడ్డీ లీగ్ ప్లే ఆఫ్స్ ఫార్మాట్ విభిన్నంగా ఉంటుంది. ఈ టోర్నీలో మొత్తం 6 జట్లు ప్లే ఆఫ్స్ చేరుతాయి. టాప్-2లో నిలిచిన జట్లు నేరుగా సెమీఫైనల్-1 , సెమీఫైనల్-2 ఆడుతాయి. తర్వాతి నాలుగు జట్లు ఎలిమినేటర్-1, ఎలిమినేటర్-2 మ్యాచ్‌ల్లో తలపడుతాయి. ఎలిమినేటర్-1లో గెలిచిన జట్టు సెమీఫైనల్-1, ఎలిమినేటర్-2లో గెలిచిన జట్టు సెమీఫైనల్-2 ఆడుతాయి.

ప్లే ఆఫ్స్ చేరిన జట్లు..
22 మ్యాచ్‌ల్లో 16 విజయాలు సాధించిన హరియాణ స్టీలర్స్ టేబుల్ టాపర్‌గా నిలిచి సెమీఫైనల్-1కు అర్హత సాధించింది. 22 మ్యాచ్‌ల్లో 13 విజయాలు, 4 డ్రాలతో దబాంగ్ ఢిల్లీ కేసీ పాయింట్స్ టేబుల్ రన్నరప్‌గా నిలిచి సెమీఫైనల్-2కు క్వాలిఫై అయ్యింది. 22 మ్యాచ్‌ల్లో 13 విజయాలు 3 డ్రాలతో యూపీ యోధాస్ మూడో స్థానంలో.. పట్నా పైరేట్స్(22 మ్యాచ్‌ల్లో 13 విజయాలు, 2 డ్రాలతో) నాలుగో స్థానంలో.. యుముంబా(12 విజయాలు, 2 డ్రాలతో) ఐదోస్థానంలో.. జైపూర్ పింక్ పాంథర్స్(12 విజయాలు, 2 డ్రాలతో) ఆరో స్థానంలో నిలిచి ప్లే ఆఫ్స్‌కు అర్హత సాధించాయి.

12 విజయాలతో తెలుగు టైటాన్స్ ఏడో స్థానంలో నిలిచి ఏడో స్థానంలో సరిపెట్టుకుంది. పుణేరి పల్టాన్(9 విజయాలు 3 డ్రాలు), తమిళ్ తలైవాస్(8 విజయాలు, ఒక డ్రా), బెంగాల్ వారియర్స్(5 విజయాలు, 3 డ్రాలు), గుజరాత్ జెయింట్స్(5 విజయాలు, 3 డ్రాలు), బెంగళూరు బుల్స్(2 విజయాలు, ఒక డ్రా) వరుసగా చివరి ఐదు స్థానాలకు పరిమితమయ్యాయి.

ప్లే ఆఫ్స్ షెడ్యూల్..

డిసెంబర్ 26: ఎలిమినేటర్1: యూపీ యోధాస్ వర్సెస్ జైపూర్ పింక్ పాంథర్స్(రాత్రి 8గంటలకు)

డిసెంబర్ 26: ఎలిమినేటర్ 2: పట్నా పైరేట్స్ వర్సెస్ యు ముంబా(రాత్రి 9గంటలకు)

డిసెంబర్ 27: సెమీ ఫైనల్ 1:హర్యానా స్టీలర్స్ వర్సెస్ ఎలిమినేటర్-1 విజేత(రాత్రి 8గంటలకు)

డిసెంబర్ 27: సెమీ ఫైనల్ 2:దబాంగ్ ఢిల్లీ కేసీ వర్సెస్ ఎలిమినేటర్-2 విజేత(రాత్రి 9గంటలకు)

డిసెంబర్ 29: ఫైనల్ : సెమీస్-1 విజేత వర్సెస్ సెమీస్-2 విజేత(రాత్రి 8గంటలకు)

ఎలా చూడాలంటే..?
ప్రోకబడ్డీ ప్రీమియర్ లీగ్‌కు అధికారిక బ్రాడ్‌కాస్టర్‌గా స్టార్ స్పోర్ట్స్ వ్యవహరిస్తోంది. స్టార్ స్పోర్ట్స్ నెట్ వర్క్‌కు చెందిన డిస్నీ హాట్‌స్టార్‌తో పాటు స్టార్ స్పోర్ట్స్ ఛానెల్స్, భాషా చానెల్లో కూడా మ్యాచ్‌లు ప్రత్యక్ష ప్రసారం కానున్నాయి.