వరల్డ్ కప్ రికార్డు: 10లక్షల మంది, ఫ్యాన్స్‌తో నిండుతున్న స్టేడియాలు

పెద్ద సంఖ్యలో రష్యాకు అభిమానులు

ఈ వరల్డ్ కప్ కోసం ప్రపంచ వ్యాప్తంగా పెద్ద సంఖ్యలో అభిమానులు రష్యాకు చేరుకున్నారు. వరల్డ్ కప్ మ్యాచ్‌లను ప్రత్యక్షంగా వీక్షించేందుకు అభిమానులు పోటీ పడుతున్నారు. తాజాగా ఫిఫా విడుదల చేసిన నివేదిక ప్రకారం 10 లక్షల మందికిపైగా అభిమానులు మైదానాలకు వచ్చి మ్యాచ్‌లను వీక్షించారు.

21 మ్యాచ్‌లు ముగిసే సమయానికే

టోర్నీలో భాగంగా గురువారం డెన్మార్క్‌-ఆస్ట్రేలియా మధ్య మ్యాచ్‌ జరిగింది. రష్యా వేదికగా జరుగుతున్న ఈ వరల్డ్ కప్ టోర్నీలో ఇది 21వ మ్యాచ్‌. 21 మ్యాచ్‌లు ముగిసే సమయానికే 10 లక్షల మందికి పైగా అభిమానులు మ్యాచ్‌లను చూసేందుకు వచ్చినట్లు టోర్నీ నిర్వాహకులు అధికారికంగా నివేదిక విడుదల చేశారు.

97 శాతం గ్యాలరీలు అభిమానుల

టోర్నీలోని ప్రతి మ్యాచ్‌ కూడా 97 శాతం గ్యాలరీలు అభిమానులతో నిండుతున్నట్లు ఫిఫా అధికారులు తెలిపారు. మిగతా మ్యాచ్‌లతో పోల్చితే ఉరుగ్వే-ఈజిప్టు మధ్య జరిగిన మ్యాచ్‌కు అభిమానులు తక్కువ సంఖ్యలో హాజరయ్యారు.

ఈ మ్యాచ్‌ కోసం కేటాయించిన టిక్కెట్లలో ఆరు వేల టిక్కెట్లు అమ్ముడుపోలేదు.

రష్యాతో పాటు పలు దేశాలకు చెందిన అభిమానులు

టోర్నీ ప్రారంభమైనప్పటి నుంచి ఈ మ్యాచ్‌ వరకు రష్యాతో పాటు పలు దేశాలకు చెందిన అభిమానులు పెద్ద సంఖ్యలో స్టేడియాలకు వచ్చి మ్యాచ్‌లను వీక్షించారని ఫిఫా అధికారులు వెల్లడించారు.