మలుపు తిప్పిన రొనాల్డో, రామోస్.. ఉత్కంఠ పోరులో గట్టెక్కిన పోర్చుగల్!

ఫిఫా ప్రపంచకప్ 2026 టోర్నీలో క్రిస్టియన్ రొనాల్డో సారథ్యంలోని పోర్చుగల్ తమ జోరును కొనసాగిస్తోంది. శుక్రవారం తెల్లవారుజామున జరిగిన నాకౌట్ పోరులో పోర్చుగల్ 2-1 తేడాతో క్రొయేషియాను ఓడించింది. ఉత్కంఠగా సాగిన మ్యాచ్‌లో క్రిస్టియన్ రొనాల్డో, సబ్‌స్టిట్యూట్ ప్లేయర్ గొన్సాలో రామోస్ అద్భుతమైన గోల్స్‌తో పోర్చుగల్ విజయంలో కీలక పాత్ర పోషించారు. ఈ గెలుపుతో పోర్చుగల్ ప్రి-క్వార్టర్స్‌కు అర్హత సాధించగా.. క్రొయేషియా ఇంటి బాట పట్టింది. ప్రి-క్వార్టర్స్‌లో స్పెయిన్‌తో పోర్చుగల్ అమీతుమీ తేల్చుకోనుంది.

ఫస్టాఫ్‌లో ఇరు జట్లు హోరాహోరీ తలపడటంతో గోల్స్ నమోదు కాలేదు. అయితే సెకండాఫ్ ప్రారంభమైన కాసేపటికే 53వ నిమిషంలో ఇవాన్ పెరిసిచ్ అద్భుతమైన లో-షాట్‌తో క్రొయేషియాకు 1-0 ఆధిక్యాన్ని అందించాడు. వరల్డ్ కప్‌ల్లో పెరిసిచ్‌కు ఇది 7వ గోల్. దాంతో అతను దావర్ సుకర్ (6 గోల్స్)ను అధిగమించి, ప్రపంచకప్‌లో క్రొయేషియా తరఫున అత్యధిక గోల్స్ చేసిన ఆటగాడిగా చరిత్ర సృష్టించాడు.

ఎవరీ బ్యూటీఫుల్ ట్విన్ సిస్టర్స్? ఫిఫా వరల్డ్‌కప్‌లో క్రేజీ సీన్! (వీడియో)

తొలి ఆటగాడిగా రొనాల్డో..

ఆ తర్వాత క్రొయేషియా కొట్టిన మరో గోల్‌ను అంపైర్ ఆఫ్‌సైడ్‌గా ప్రకటించారు. ఈ క్రమంలో 68వ నిమిషంలో పోర్చుగల్‌కు లభించిన పెనాల్టీని కెప్టెన్ క్రిస్టియానో రొనాల్డో గోల్‌గా మలిచి స్కోరును 1-1తో సమం చేశాడు. 41 ఏళ్ల వయసులో వరల్డ్ కప్ నాకౌట్ మ్యాచ్ ఆడిన తొలి ఆటగాడిగా రొనాల్డో రికార్డు సృష్టించాడు. అలాగే 9 నాకౌట్ మ్యాచ్‌ల్లో అతనికి ఇదే తొలి గోల్ కావడం విశేషం.

మ్యాచ్ ముగుస్తుందనగా.. 94వ నిమిషంలో (93:09) రాఫెల్ లియావో అందించిన క్రాస్‌ను గొన్సాలో రామోస్ హెడర్ ద్వారా గోల్ పోస్ట్‌లోకి పంపి పోర్చుగల్‌కు 2-1 ఆధిక్యాన్ని అందించాడు. చివరి నిమిషంలో (90+13వ నిమిషం) క్రొయేషియా డిఫెండర్ జోస్కో గార్డియోల్ బంతిని నెట్‌లోకి పంపినప్పటికీ, VAR సమీక్షలో అది ఆఫ్‌సైడ్‌గా తేలడంతో క్రొయేషియా ఓటమి ఖరారైంది.

మెస్సీ X రొనాల్డో పోరు ఎప్పుడంటే..?

మోడ్రిచ్‌కు వీడ్కోలు.. జోటాకు నివాళి..

ఈ ఓటమితో క్రొయేషియా దిగ్గజం లూకా మోడ్రిచ్ అంతర్జాతీయ కెరీర్ ముగిసినట్లయింది. మరోవైపు, దివంగత సహచర ఆటగాడు డియోగో జోటా ప్రథమ వర్ధంతి సందర్భంగా పోర్చుగల్ జట్టు ఈ విజయాన్ని సాధించింది. మ్యాచ్ అనంతరం రొనాల్డో ఈ గెలుపును జోటాకు అంకితం ఇచ్చాడు.