ఇక ఫుట్‌బాల్ సమరం.. రేపే ఐఎస్‌ఎల్ షురూ! షెడ్యూల్ ఇదే.. హైదరాబాద్ మ్యాచ్ ఎప్పుడంటే..?

ముంబై: గత రెండు నెలలుగా ఐపీఎల్ 2020 సీజన్‌ను ఆస్వాదించిన క్రీడా అభిమానులు.. ఇక నుంచి ఫుట్‌బాల్ సమరంలో మునిగి తేలనున్నారు. శుక్రవారం నుంచే ఇండియన్ సూపర్ లీగ్ (ఐఎస్‌ఎల్) 2020-21 సీజన్ సందడి మొదలవ్వనుంది. 6 సీజన్లు దిగ్విజయంగా పూర్తి చేసుకున్న ఐఎస్‌ఎల్.. ఏడో సీజన్‌కు రంగం సిద్దమైంది. డిఫెండింగ్ చాంపియన్ ఏటీకే మోహన్ బగన్, కేరళ బ్లాస్టర్స్ ఎఫ్‌సీ మధ్య గోవా వేదికగా ఫస్ట్ మ్యాచ్ జరగనుంది.

ఈ సీజన్‌లో కొత్తగా ఎస్సీ ఈస్ట్ బెంగాల్ ఐఎస్‌ఎల్‌లో అరంగేట్ర చేయనుంది. కోల్‌కతాకే చెందిన ఎస్సీ ఈస్టెబెంగాల్, ఏటీకే మోహన్ బగాన్ జట్ల మధ్య పోటీని ఆసియాలోనే ప్రతిష్టాత్మకంగా భావిస్తారు. ఇక ఐఎస్‌ఎల్‌లో ఈ ఇరు జట్ల మధ్య నవంబర్ 27న జరగనుంది. కరోనా నేపథ్యంలో ఐపీఎల్ తరహాలోనే ఐఎస్‌ఎల్ కూడా ఖాళీ మైదానాల్లోనే బయో బబుల్ వాతావరణంలో జరగనుంది.

టోర్నీ మొత్తం గోవాలోని మూడు మైదానాల్లోనే నిర్వహించనున్నారు. కొత్త జట్టు రాకతో మొత్తం మ్యాచ్‌ల సంఖ్య 95 నుంచి 115కు పెరిగాయి. మొత్తం 11 క్లబ్స్ ఐపీఎల్ తరహాలోనే డబుల్ రౌండ్ రాబిన్ ఫార్మాట్‌లో ఆడనున్నాయి. టాప్-4లో నిలిచే జట్లు ప్లే ఆఫ్స్‌కు అర్హత సాధిస్తాయి.

తొలి 11 రౌండ్స్ మ్యాచ్‌ల్లో 6 డబుల్ హెడర్స్ ఉన్నాయి. ఇవన్నీ ఆదివారమే జరగనున్నాయి. ప్రస్తుతానికైతే 11 రౌండ్ల షెడ్యూల్ ప్రకటించిన ఫుట్ బాల్ స్పోర్ట్స్ డెవలప్‌మెంట్ లిమిటెడ్(ఎఫ్‌ఎస్‌డీఎల్).. మిగతా 55 లీగ్ మ్యాచ్‌ల షెడ్యూల్‌ను డిసెంబర్ తర్వాత ఏషియన్ ఫుట్‌బాల్ కాన్ఫిడరేషన్(ఎఎఫ్‌సీ) డేట్స్ ప్రకారం ఖారారు చేయనుంది. నవంబర్ 23న ఒడిషా ఎఫ్‌సీతో మన హైదరాబాద్ ఎఫ్‌సీ తొలి మ్యాచ్ ఆడనుంది.