FIFA World Cup 2026 టైటిల్ గెలిచే నాలుగు జట్లు ఇవే!

ఫుట్‌బాల్ ప్రపంచంలోనే అతి పెద్ద పండుగ అయిన ఫిఫా ప్రపంచకప్ 2026 టోర్నీకి రంగం సిద్దమైంది. మరికొద్ది గంటల్లో ఈ మెగా టోర్నీకి తెరలేవనుంది. అమెరికా, కెనడా, మెక్సికో సంయుక్తంగా ఆతిథ్యం ఇస్తున్న ఈ టోర్నీలో తొలిసారి 48 జట్లు పోటీపడుతున్నాయి. దాంతో టైటిల్ ఎవరిని వరిస్తుందనేది ఉత్కంఠగా మారింది. అయితే నాలుగు జట్లకు టైటిల్ గెలిచే అవకాశాలు ఉన్నాయి.

1. అర్జెంటీనా

డిఫెండింగ్ ఛాంపియన్ అర్జెంటీనా టైటిల్ రేసులో ముందుంది. 2022 ప్రపంచకప్‌తో పాటు 2024 కోపా అమెరికా విజయాలతో అర్జెంటీనా ఫుట్‌బాల్ క్రీడలోనే ఎదురులేని శక్తిగా ఎదిగింది. కోచ్ లియోనెల్ స్కలోని పర్యవేక్షణలో జట్టు ఒక క్రమశిక్షణ గల కుటుంబంలా పనిచేస్తోంది. జూలియన్ ఆల్వారెజ్, ఎన్జో ఫెర్నాండెజ్, అలెక్సిస్ మ్యాక్ అలిస్టర్ వంటి యువకులు వరల్డ్ క్లాస్ ప్లేయర్లుగా రాణిస్తున్నారు.పెనాల్టీ షూటౌట్‌లలో ప్రత్యర్థులను ఇబ్బంది పెట్టడంలో గోల్ కీపర్ 'ఎమిలియానో' మార్టినెజ్ కీలకం కానున్నాడు.

ప్రస్తుతం మెస్సీ వయసు 39 ఏళ్లు. ఆయన ఫిట్‌నెస్‌పై సందేహాలు ఉన్నాయి. అతను జట్టుకు దూరమైతే నడిపించే నాయకుడు ఎవరా? అనేది ప్రశ్నార్థకంగా మారింది. డిఫెన్స్ ఆటగాళ్ల వయసు పైబడటం కూడా అర్జెంటీనాకు బలహీనతగా మారింది.

2. ఫ్రాన్స్

గత రెండు ప్రపంచకప్‌ల్లోనూ ఫైనల్స్ చేరడం ద్వారా ఫ్రాన్స్ తన ఆధిపత్యాన్ని చాటుకుంది. స్టార్ ఆటగాడు కైలియన్ ఎంబాప్పే నాయకత్వంలో ఈసారైనా టైటిల్ అందుకోవాలనే పట్టుదలతో ఉంది. ఫ్రాన్స్ జట్టుకు గల అతిపెద్ద బలం బెంచ్ స్ట్రెంత్. ఒక ఆటగాడు అందుబాటులో లేకున్నా.. అతనికి సమానమైన నైపుణ్యం కలిగిన మరో ముగ్గురు సిద్ధంగా ఉంటారు.

వారి మెరుపు వేగంతో కూడిన కౌంటర్ అటాక్‌లు ఏ రక్షణ విభాగినైనా ఛేదించగలవు. అయితే, గ్రీజ్మాన్ వంటి అనుభవం గల క్రీడాకారులు జట్టుకు దూరమైతే ఆ స్థానాన్ని భర్తీ చేయడం సవాలుగా మారవచ్చు. అలాగే, జట్టులో అంతర్గత సమన్వయం, కోచింగ్ సిబ్బందితో ఉండే సంబంధాలు ప్రదర్శనను ప్రభావితం చేసే అవకాశం ఉంది.

FIFA World Cup 2026: కన్నీటి పర్యంతమైన మ్యాచ్ రిఫరీ!

3. బ్రెజిల్

గత రెండు దశాబ్దాలుగా వరల్డ్ కప్ గెలవని బ్రెజిల్.. యువ ప్రతిభావంతులతో మళ్ళీ పుంజుకుంటోంది. వినీషియస్ జూనియర్, రోడ్రిగో ప్రస్తుతం ప్రపంచంలోని అత్యుత్తమ వింగర్లుగా నిలిచారు. వీరితో పాటు యువ సంచలనం ఎండ్రిక్ జత కలవడం జట్టుకు అదనపు బలాన్ని ఇస్తుంది.

అయితే, నాకౌట్ దశలలో ఐరోపా జట్లతో ఆడేటప్పుడు బ్రెజిల్ తరచుగా తడబడుతుంటుంది. ముఖ్యమైన సమయాల్లో ఒత్తిడిని తట్టుకోవడం వారికి ప్రధాన సవాలు. అదనంగా, జట్టులో అచ్చమైన 'ప్లేమేకర్' లోపం స్పష్టంగా కనిపిస్తోంది. నెయ్మార్ అందుబాటులో ఉన్నా.. గాయాల కారణంగా ఆయన పూర్తిస్థాయిలో రాణిస్తారా అనే సందేహంగా మారింది.

FIFA World Cup 2026: గెలిచినా ఒరిజినల్ కప్ ఇవ్వరు.. ఎందుకో తెలుసా?

4. స్పెయిన్

యూరో 2024 విజేతగా నిలిచిన స్పెయిన్.. హాట్ ఫేవరేట్‌గా బరిలోకి దిగుతోంది. తమ సాంప్రదాయ 'టికి టాకా' ఆటతీరు నుంచి బయటకు వచ్చి, వేగవంతమైన, అటాకింగ్ గేమ్‌‌ను అలవర్చుకున్నారు. లామిన్ యమల్, నికో విలియమ్స్ వంటి యువ వింగర్లు జట్టు స్వరూపాన్నే మార్చేశారు. రోడ్రి నాయకత్వంలో మిడ్‌ఫీల్డ్ విభాగం అత్యంత బలంగా ఉంది.

అయితే, కోల్పోయిన అవకాశాలను గోల్స్‌గా మలచడంలో స్పెయిన్ అప్పుడప్పుడు విఫలమవుతోంది. ఒక క్లినికల్ ఫినిషర్ లేకపోవడం వారికి ప్రధాన లోపం. అలాగే, ప్రపంచకప్ వంటి మెగా టోర్నీ ఒత్తిడిని యువ ఆటగాళ్లు ఎలా ఎదుర్కొంటారనేది వేచి చూడాలి.

ఉత్తర అమెరికా ఖండంలో జరగనున్న ఈ టోర్నీలో వాతావరణ పరిస్థితులు, సుదీర్ఘ ప్రయాణాలు ఆటగాళ్లపై ప్రభావం చూపవచ్చు. అర్జెంటీనా, ఫ్రాన్స్, బ్రెజిల్, స్పెయిన్ జట్లు అగ్రపథంలో ఉన్నప్పటికీ.. ఇంగ్లండ్, పోర్చుగల్, జర్మనీ వంటి జట్లు కూడా కప్పు గెలిచే సత్తా కలిగి ఉన్నాయి. 2026 ప్రపంచకప్ ఫుట్‌బాల్ అభిమానులకు ఖచ్చితంగా ఒక గొప్ప విందు కానుంది.