WPL 2024: దీప్తి శర్మ ఒంటరి పోరాటం.. ముంబై ఇండియన్స్ ఘన విజయం!

వుమెన్స్ ప్రీమియర్ లీగ్(డబ్ల్యూపీఎల్) 2024 సీజన్ ముంబై ఇండియన్స్ మరో విజయం సాధించింది. యూపీ వారియర్స్‌తో గురువారం జరిగిన మ్యాచ్‌లో సమష్టిగా రాణించిన ముంబై ఇండియన్స్ 42 పరుగుల భారీ తేడాతో గెలుపొందింది.

ఈ మ్యాచ్‌లో ముందుగా బ్యాటింగ్ చేసిన ముంబై ఇండియన్స్ నిర్ణీత 20 ఓవర్లలో 6 వికెట్లకు 160 పరుగులే చేసింది. నాట్ సీవర్ బ్రంట్(31 బంతుల్లో 8 ఫోర్లతో 45), అమెలియా కేర్(23 బంతుల్లో 6 ఫోర్లతో 39), హర్మన్‌ప్రీత్ కౌర్(30 బంతుల్లో 3 ఫోర్లు, సిక్స్‌తో 33) రాణించారు. యూపీ వారియర్స్ బౌలర్లలో చమరి ఆటపట్టు(2/27) రెండు వికెట్లు తీయగా.. రాజశ్వేరి గైక్వాడ్, దీప్తి శర్మ, సైమా థాకోర్ తలో వికెట్ పడగొట్టారు.

అనంతరం లక్ష్యచేధనకు దిగిన యూపీ వారియర్స్ నిర్ణీత 20 ఓవర్లలో 9 వికెట్లకు 118 పరుగులే చేసి ఓటమిపాలైంది. దీప్తి శర్మ(36 బంతుల్లో 6 ఫోర్లు, 2 సిక్స్‌లతో 53 నాటౌట్) ఒంటరి పోరాటం చేయగా.. మిగతా బ్యాటర్లు దారుణంగా విఫలమయ్యారు. ముంబై బౌలర్లలో షైకా ఇషాక్(3/27) మూడు వికెట్లు తీయగా.. నాట్ సీవర్ బ్రంట్(2/14), రెండు వికెట్లు పడగొట్టింది. షబ్నిమ్ ఇస్మాయిల్, హీలీ మాథ్యూస్, పూజా వస్త్రాకర్, సజీవన్ సజన తలో వికెట్ తీసారు.

ఈ సీజన్‌లో ముంబై ఇండియన్స్‌కు ఇది నాలుగో విజయం కాగా.. యూపీ వారియర్స్‌కు నాలుగో ఓటమి. ఈ గెలుపుతో ముంబై ఇండియన్స్ పాయింట్స్ టేబుల్‌లో టాప్-2లోకి దూసుకెళ్లింది.