World Cup 2023: ఇంగ్లండ్‌ను ఇంటికి పంపించిన శ్రీలంక!

ENG vs SL: వన్డే ప్రపంచకప్ 2023లో డిఫెండింగ్ ఛాంపియన్ ఇంగ్లండ్ పరాజయాల పరంపర కొనసాగుతోంది. శ్రీలంక‌తో గురువారం జరిగిన మ్యాచ్‌లో సమష్టిగా విఫలమైన ఇంగ్లండ్ 8 వికెట్ల తేడాతో ఓటమిపాలైంది. మెగా టోర్నీలో ఇంగ్లండ్‌కు ఇది నాలుగో పరాజయం. ఇప్పటి వరకు ఐదు మ్యాచ్‌ల్లో 4 ఓడిన ఇంగ్లండ్.. సెమీస్ రేసు నుంచి తప్పుకుంది. చివరి నాలుగు మ్యాచ్‌లు గెలిచినా ఆ జట్టు సెమీస్ చేరే పరిస్థితి లేదు.

ఈ మ్యాచ్‌లో ముందుగా బ్యాటింగ్ చేసిన ఇంగ్లండ్ 156 పరుగులకే కుప్పకూలింది. బెన్ స్టోక్స్(73 బంతుల్లో 6 ఫోర్లతో 43), జానీ బెయిర్ స్టో(31 బంతుల్లో 3 ఫోర్లతో 30) టాప్ స్కోరర్లుగా నిలిచారు.
శ్రీలంక బౌలర్లలో లాహిరు కుమార(3/35), ఏంజెలో మాథ్యూస్(2/14), కాసున్ రజితా (2/36), మహీశ్ తీక్షణ(1/21) ఇంగ్లండ్ పతనాన్ని శాసించారు.

అనంతరం లక్ష్యచేధనకు దిగిన శ్రీలంక 25.4 ఓవర్లలో 2 వికెట్లకు 160 పరుగులు చేసింది. పాతుమ్ నిస్సంక(83 బంతుల్లో 7 ఫోర్లు, 2 సిక్స్‌లతో 77 నాటౌట్), సదీరవిక్రమా(54 బంతుల్లో 7 ఫోర్లు, సిక్స్‌తో 65 నాటౌట్) హాఫ్ సెంచరీలతో సత్తా చాటారు. ఇంగ్లండ్ బౌలర్లలో డేవిడ్ విల్లే(2/30) రెండేసి వికెట్లు తీసారు.

స్వల్ప లక్ష్యచేధనలో శ్రీలంకకు ఆదిలోనే గట్టి షాక్ తగిలింది. ఓపెనర్ కుశాల్ పెరెరా(4), కెప్టెన్ కుశాల్ మెండీస్(11)లను డేవిడ్ విల్లే పెవిలియన్ చేర్చాడు. దాంతో శ్రీలంక 23 పరుగులకే 2 వికెట్లు కోల్పోయి పీకల్లోతు కష్టాల్లో పడింది. ఈ పరిస్థితుల్లో నిస్సంక, సమరవిక్రమా జట్టును ఆదుకున్నారు. అసాధారణ బ్యాటింగ్‌తో అదిరిపోయే విజయాన్ని అందించారు. 54 బంతుల్లో పాతుమ్ నిస్సంక హాఫ్ సెంచరీ పూర్తి చేసుకోగా.. సమరవిక్రమా 44 బంతుల్లో అర్థశతకాన్ని అందుకున్నాడు.